¶Jr herrn ich bit ewr gunſt vnd gnad Vernembt ein boͤſe miſſethat Die hat gethan ein pecken knecht Vnd der het ſein vernunfft nit recht Als ich euch dan beſcheyden will Sein vater het gelts vnd guts vill Vnd was ſein veterlicher mut Wie er den ſun auff alles gut Moͤcht ziehen auff ein ſitlich leben Thet jm ein gutte zerung geben Vnd gab jm auch die leer da bey Laß yederman ſein wer er ſey Vnd halt dich bey den lewtten ſtill Huͤt dich voꝛ frawen vnd voꝛ ſpill Laß dich nit vber geen den wein Huͤt dich wo boͤß geſellen ſein Als bald du ire werck verſteeſt Ye weytter du dan von jn geeſt Ye baß es dir kumbt zu gewin Mein lieber ſun nun far du hin Vnd brauch dich deiner iugen recht Dann mancher boͤſer falſcher knecht Gibt offt den iungen boͤſen rat Das mancher kuͤmbt in groſſe not Das ſelbig du mit fleyß betracht Nun dar far hin mit gutter nacht Er danckt dem vater zuͤchtigkleych Vnd zoch doꝛt hin in Oſterreych Jn ein groſſe ſtat heyſt Wienn Begund einem pecken ein ſten Vnd der was reych wie ich euch ſag Arbayt er funff woch vnd vier tag Darnach er von jm vrlaub nam Vnd bald auß der ſtat von Wienn kam Vnd zoch das landt auff vnd nider Darnach kam er gen Wienn wider Vnd thet wie ander wilde buben Verſpilt ſich auff der pecken ſtuben Das er jm zipffel vnd ſack nit het Er dacht wie er den dingen thet Vnd ſan es hinden vnd voꝛn auß Wie er kem in ſeins mayſters hauß Eins boͤſen het er ſich vemeſſen Der teuͤffel het jn gar beſeſſen Stall ſich jns hauß vnter die ſtiegen Do lag er ein weyle verſchwigen Biß das die finſter nacht viel an Die werckſtub was nit weyt daruon Darinn do lag ein knecht vnd ruͤt Als mancher frummer dienſtknecht thut Der was fleyſſig in ſein ſachen Wolt fruͤ auff ſteen vnd pꝛot bachen Vnd der ſelbig knecht entſchlieff Der Barthel heymlich einhin lieff Vnd dacht wie er ſein ſach volendt Ein beyhel trug er in der hendt Ein groß do man die ſcheyt mit kleubt Schlug er dem knecht hart in ſein heubt Sein leben bald ein ende nam Jn dem die frum hauß diern kam Die erſchlug er an der ſtiegen Zugs hin dan vnd ließ ſie ligen Vnd dacht jm wie er weytter thet Der peck der lag in ſeinem beth Vnd was gleych in jm ſelbs zu ſtoͤꝛt Vnd daucht jn wie er etwas hoͤꝛt Vnd das der handel ſtuͤnd nit recht Die maydt wer vneins mit dem knecht Er ſtund bald auff vnd legt ſich an Vnd wolt den hader vnterſtan Als einem haußwirt zu gepuͤrt Der teuͤffel het den her gefurt Der knecht vnd maydt ermoͤꝛdet het Dem pecken thet er auch alſo Was das nit ein groſſer iamer Darnach gieng er in die kamer Do lag die frumme fraw vnd ruͤt Die muͤſt vergieſſen do ir plut Vnd muͤſt ir leben alſo enden Der Barthel moͤꝛdets mit ſein henden Noch ließ er ſich nit erſetten Suͤchet vmb zu andern betten Do fandt er ein kindt das iſt war Das was etwas alt ſiben jar Vnd was ein maydlein merckt mich eben Das het den ſelbing pecken knecht So barmhertzig an geſehen Vnd alſo freuͤntlich zu jm jehen O lieber Barthel laß mich leben Jch wil dir all mein tocken geben Jch wil dir zaygen meins vaters ſchluͤſſel Der moͤꝛder ſchneyd jm ab ſein dꝛuͤſſel Das es alſo mit todt ab gieng Ein anders er darnach an fieng Vnd ſuchet in dem hauß mit fleyß Biß das er fandt pꝛot wein vnd ſpeyß Vnd auch ein gut ſum̃ gelts darzu Darnach wolt er nit haben ruͤ Als dan thnnthun ſolche boͤſe buben Gieng wider auffauß der pecken ſtuben Vnd gab auß gelt als die beſten Do waren etlich die wol weſten Das er voꝛ het gehabt kein gelt Jn dem der iamer wardt gemelt Wie man den pecken vnd ſein geſindt So iamerlich ermoͤꝛdet findt Der boͤß wicht mercket wol die mer Sagt nit das er der moͤꝛder wer Er ſeufftzet vnd klopffet an ſein hertz Als pꝛecht es jm ein groſſen ſchmertz Das do ſein mayſter vnd ſein herr So iamerlich ermoͤꝛdet wer Hub an iemerlich zu klagen Vnd halff die leych zum grab tragen Doch ſach er niemant froͤlich an Von ſtundtan hub er ſich daruon Vnd dacht wie dan der ſchuldig thut Ergreyfft man dich du haſts nit gut Wan du haſts ye than mit der handt Ein ſtat iſt Regenſpurg genandt Jn der ſein vater ſaß mit hauß Bey dem do gieng er ein vnd auß Sein vater was erber vnd frum̃ Vnd weſt gar nit ein woꝛt darum̃ Vnd das ſein falſcher boͤſer ſun Ein ſolich boͤß werck het gethun Wie wol er het zu jm gemelt Mein ſun von wan kuͤmbt dir das gelt Das du ſo offt zu wein yetz laufſt Vnd zu ſchoͤne kleyder kaufſt Bald het er ſich einer luͤg beſunnen Spꝛach er hetz mit ſpilen gewunnen Vnd gieng den reychen gleych da her Jn dem do kamen boͤſe mer Wie er die funff moꝛdt het gethan Do nam man jn gefencklich an Er ſaß zwar nit lang in der ſchꝛentz Der Kayſer ſchꝛayb do hin behentz Man ſolt jn ſchicken bald gen Wienn Die herrn lieſſen es nit lang an ſteen Lieſſen jn gar wol befriden Jm ſchiff an ein ketten ſchmyden Do fur er mit den andern hien Biß das er kam hin ab gen Wien Wardt vber jn ſchnell vnd behendt Ein ſolich ſchwer vrteyl erkendt Solt jm auch nit werden ringer Man ſolt jm ſein zehen finger Ein nach dem andern ab hacken Vnd mit heyſſen zangen zwacken Vnd wan man mit der einen riß Die weyl der painlein ſeer zu pliß Biß das die ander auch wardt hayß Do mit der hencker weyter rayß Jn ſein leyb vnd das es roch Der arm ſchꝛay mit grimmen och Zu glauben iſt das yederman Die dꝛitt marter fieng ſich an Als ir dan yetzund hoͤꝛen werdt Er wardt gepunden an ein pferdt Vnd wardt geſchlayfft an all die ſtat Der funff merck die man zu Wienn hat Vnd darnach ſchlayfft man fur das thoꝛ Do ſtundt gar manig menſch daruoꝛ Der wolt ſehen die groſſen not Vnd wie doch enden wolt ſein todt Als er nun auff die haubtſtat kam Der hencker ein groſſen pfall her nam Do mit er jn dan yetz ſolt ſpiſſen Der hencker het auch nit gut wiſſen Wie er das werck ſolt fahen an Wann er hets voꝛ nit mer gethan Yedoch ſo het er kein erbarm Die ſpitz ſetzt er jm in waydt darm Vnd dꝛucket als ein ſtarcker knecht Der arm ſchꝛay er geet nit recht Zeuch auß vnd ſtoß jn anders ein Vnd das die pitter marter mein Deſter lenger an mir moͤcht wern Das wil ich alles leyden gern Wan ich es woll verſchuldet han Vnd het ich hundert moͤꝛdt gethan Betruͤbt es mich alſo hart Das ich dem iungen maydlein zart Sein leben nam auch an der ſtat Das mich ſo ſchon vnd freuͤntlich bat Lieber Barthel laß mich leben Jch wil dir all mein tocken geben Wan ich daſſelbig woꝛt betracht So geet mir zu ein omacht Ein yederman kans verſten Es het kain andern ſchatz dann den Wolt es mir geben mit der kiſten Das es nuͤr moͤcht ſein leben friſten Jn boͤßheyt was ich gantz erblindt Das ich ermoͤꝛdt das ſelbig kindt Darumb ſo bit ich arm vnd reych Das ir woͤlt alle innigkleych Bitten got vnd die mutter ſein Das mir die pitter marter mein Helff mir das ich nit werdt verloꝛen Bey jm ein herr ſtundt parfuß oꝛden Der ſelb ſein leyblich bruder was Vil ſchoͤner ding er jm fur laß Solt an ſehen ſein arme ſeel Vnd die opffer ſant Michael Er antwoꝛt jm mit woꝛtten leyb Bruder ich wil mit allem fleyß Als war als du mein bruder biſt Wil ich ſterben als ein rechter chꝛiſt Das woꝛt erbarmt vil lewt on zall Fuͤnff ſtund die lebt er am pfall O ein yederman nem zu hertzen Wie er mit dem groſſen ſchmertzen Dannocht alſo lang mocht leben Vnd mocht red vnd antwurt geben Er ſpꝛach got wil mir gnad erzaygen Mein haubt wil ich aufft recht hãdt naygẽ Veltz widerumb auff lincken handt So wirdt ich in die hell geſandt Gar bald ſein leben nam ein endt Sein haubt ſich do nit anderſt wendt Playb auff der rechten ſeytten ſtet Dauon all menſchen hoffnung het Er wer ein kindt der ſeligkayt Bit wir Maria die reynen maydt Sie woͤl vns vmb jr kindt erwerben Das wir alle ſelig ſterben Vnd wern im glauben nit verirt Cuntz Haß hat das dicht coꝛrigirt Die moͤꝛt ſindt geſchehen fur war Jm tauſent funff hundert vnd vier jar