Klag- und Trost-Reimchen Bey seligem wiewol hochbetrübtem Abschied aus dieser Welt Des weiland HochEdelgebohrnen Herrn Joachim Wilhelm von Brumsee/ auf Robitten Sudlack und etc. ErbHerrn

GLeich wie die Voͤgel in gemein/ So bald ſie wol gefluͤgelt ſeyn/ Sam̃t allen wild- uñzahmen Thieren Stracks von den Eltern ſich verlieren/ Erwehlen einen fernen Wald Zu jhrem Sitz und Auffenthalt/ Die Neſter jhrer Arth nach bawen Vnd auff die Zucht der Jungen ſchawen. Die Altten werden mitler weil Dem Strick und anderm Fall zu theil/ Daß/ die vonnander ſind genommen/ Zuſammen wieder nimmer kommen. So giengen auch der Bremſen vier/ So bald die Krafft ſie ließ von hier Dem in der Frembde nach zu ſtreben Worvon ſie kuͤnfftig koͤnnen leben. Die ſtehn nach adelicher Kunſt Vnd die/ o Mars/ nach deiner Gunſt Geſampt auff Lob und Ruhm befliſſen/ Wo dieſe ſeyn kan man nicht wiſſen. Jn Jn deſſen ſetzt der wilde Tod Den Vatter hie auff Charons Boht Das jhn hat eingebracht den Schatten Die keinen wieder her geſtatten. Nun moͤgen ſie dort immerhin Durch Kunſt bereichern jhren Sinn/ Laß ſie was Plato wuſt' erlernen Jhr Lob ſey kunt den guͤldnen Sternen. Sie kommen heim mit groͤſſerm Gut Als Bacchus vor von Ganges Flut Vnd als Aemil kam heim gegangen Nach dem er/ Perſes/ dich gefangen. Sie machen froh jhr gantzes Hauß Vnd alles ſehe froͤlich aus/ Das beſte wird dennoch gebrechen Den Vatter werden ſie nicht ſprechen. Er iſt dahin der liebe Mann Den niemand gnug beklagen kan/ Sie moͤgen ſonſt auff alles bawen Jhn werden ſie nicht wieder ſchawen. Der Der ſie ſo vaͤterlich gemeint/ Was tugendhafft und loͤblich ſcheint Mit allem Fleiß gelehrt hat faſſen Hergegen was nicht tauglich/ laſſen. Mit jederman vertraͤglich war Der liegt jetzt auff der Todten Bar. Jhn recht von Hertzen nicht beklagen Daß waͤr' ein Hertz aus Steinen tragen. Klagt/ edle Fraw/ und thut euch weh Gieſſt aus den Augen eine See/ Jhr ſeyd mit jhm in Liebes-Banden Die vier und dreiſſig Jahr geſtanden. Wie er des Creutzes ſchwere Laſt Mit euch hat wacker angefaſſt Getroſt an ewrem Joch gezogen/ Kam Vngluͤck auff euch zu geflogen. Aus dem jhr gantzer ſiebenzehn Belebter Kinder habt geſehn/ Der euch zugleich in Luſt und Schmertzen Geliebet hat von gantzem Hertzen. Der Der ſolche Sorge fuͤr euch trug Wenn GOtt euch wo mit Kranckheit ſchlug/ Wie fromm und redlich er geweſen Das laſſt in ewren Thraͤnen leſen. Herr Letwitz fuͤhrt im gleichen Leid/ Jhr Kinder klaget allerſeit/ Der Bruder und die Vettern muͤſſen Viel Thraͤnen uͤber jhm vergieſſen. Vmb jhn thun klaͤglich Feld und Sat Als wuͤſten ſie faſt nirgends Raht/ Von aller Noht die jhr erlitten Erſchalle Sudlack und Robitten. Wenn ſonderlich durch ſolch Beſchwer Nur etwas zu gewinnen waͤr Vnd er erweckt durch eure Zehren Koͤntt' in diß Leben wieder kehren. Weint euch die Augen zehnmal aus Nichts deſſen was das Leichen-Haus Bereit hat zu ſich eingenommen Wird auff die Welt her wieder kommen. Hin Hinuntter iſt ein breiter Weg Herauff iſt auch kein ſchmaler Steg/ Es iſt nach ſo viel tauſent Jahren Noch keiner her zu ruͤck gefahren. Wann jhr des Glaubens Kinder ſeyd Vnd hoffet auff die Ewigheit Vnd ſehnt euch in ein ander Leben Jhr werdet euch zu frieden geben. War jhm denn hier nur eitel Luſt Nur eitel Gnuͤg und Rhu bewuſt? Hat er in ſeinen Lebens-Tagen Kein Creutz kein Vngemach getragen? Er hat ſehr jung und zart erkant Des Vatters Zucht und ſtrenge Hand Die Ernſt und Eiffer laſſen walten Vnd jhn nur knechtiſch nicht gehalten. Der Hoff zu Altenburg macht auch Jhm manches Wetter manchen Rauch/ Waſ Vnmuht iſt jhm nicht geſchehen Als er die Frembde hat geſehen. Vnd Vnd als er wieder heimwerts kam Vnd jhn der Heyraht-Orden nahm Was Leiden welche Hertzens Wunden Hat er im ſelben nicht empfunden? Da jhn des Todes wilde Macht Vmb die neun Kinder hat gebracht/ Vnd da bey ſolcher Noht fuͤr allen Der letzte Sohn jhm hingefallen. Das jhm das Hertz am meiſten fraß/ Als jhm ſein Feld darzu verſaß/ Sein Korn blieb auff dem Acker liegen Weil er nicht Schnitter kuntte kriegen. Fuͤr dieß und tauſend andre Noht Mißgoͤnnt jhr jhm den ſelign Tod Den er in Warheit hat empfunden Jn Chriſti Blut und thewren Wunden? Wie ſanfft und friedlich fuhr er hin/ Sein Heiland lag jhm in den Sinn Den ließ er Simeon gleich klingen Als man nicht gnug jhm kuntte ſingen. Er Er wolte behten fort und fort Vnd ob er gleich mit keinem Wort Jſt iemand ie zu nah getretten Hat er doch allen abgebehten. Jetzt lebt er aller Guͤte voll Die man ihm wuͤnſchen kan und ſol/ Wol jhm/ der aller Noht entgangen/ Wol uns wenn wir zu jhm gelangen!