Christliches Ehren-Gedächtniß Der Weiland Viel Ehr und Tugendreichen Frawen Sophien/ gebohrnen Gretschinn Des ... Herrn Martin Bierwolffs ... Rahtsverwandten der löblichen Stadt Kneiphoff Königsberg [et]c. hertzlieben Ehgenossen

WAs hoͤr ich? was erzehlt man mir? Jhr koͤñt in dieſes Leid Euch finden/ Die Trawrigkeit/ das wilde Thier/ Durch Krafft des Glaubens uͤberwinden? Vnd raͤumet ewer Hertz allein Des Allerhoͤchſten Willen ein? Jſt dieſem alſo/ welches ich Denn hertzlich wil gewuͤnſchet haben; So ſag ich/ daß in Warheit ſich GOtt reg' in Euch durch ſeine Gaben: Denn bey ſo tieffen Wunden Ruh Vnd Sanfftmuth ſteht nicht Menſchen zu. Sonſt moͤchte gleich ſich ewer Hauß Faſt uͤber Maß vnd Weiſe kraͤncken/ Vnd weint' auch ſchier den Pregel aus/ Es wuͤrd' es niemand Euch verdencken/ Dem ewer Vnheil vnd Verluſt So gruͤndlich iſt/ als mir/ bewuſt. Jch habe/ duͤnckt mich/ ſie gekant/ Hab offtmals ihre Trew empfunden / Es hielten Klugheit vnd Verſtand Sich inniglich mit ihr verbunden Die Die Gottesfurcht der Vnſchuld Ruhm War ſonderlich ihr Eigenthum. Sie hat des HErren Hauß geehrt/ Jſt nie ohn Vrſach heim geblieben/ Hat fleiſſig Gottes Wort gehoͤrt Es in ihr Hertzens-Buch geſchrieben/ Damit es moͤcht' in Lieb vnd Pein Stets ihres Lebens Richtſchnur ſeyn. Sie hat dem Armut wol gethan/ Es nie im Hertzen wo verachtet/ Geliebt der guͤldnen Einfalt Bahn/ Der Demut hertzlich nachgetrachtet/ Dem Nechſten Dienſthafft ſich erzeigt/ Vnd allzeit ihren Mund geſchweigt. Was Zucht die wehrte Tochter hegt/ Was Tugend an Jhr wird geſpuͤret/ Wird Jhr der Mutter zu gelegt/ Sie hat ſie alſo angefuͤhret/ War ihre Pfleg vnd Vnterricht Selbs aller Tugend Preiß vnd Liecht. Der hochbetagten Mutter thar Jch nicht ohn Sorg vnd Furcht erwehnen/ Der Der ſie ein Stab im Alter war/ Jch moͤcht' erregen ihre Thraͤnen/ Die auch ohn das in ſolcher Pein Vnmuͤglich ſchier zu hemmen ſeyn. Jn was fuͤr Lieb vnd hohem Wehrt Hat ſie Sie jederzeit gehalten/ Wenn ſie der Kranckheit Laſt beſchwert Die offtmals uber Jhr muß walten/ Wie hat ſie ſich mit Jhr geletzt Als ſchon der Tod an Sie geſetzt! Jhr/ liebſte Muter/ ſprach ſie: ſeht/ Jhr muͤſſt auch mich noch uͤberleben/ O bleibet ferner am Gebet/ Laſſt nichts Euch aus dem Glauben heben! Bleibt wie ihr laͤngſt geweſen ſeyd Vnd ſieget auch in dieſem Streit. Jhr habt ſo manches Creutz verſucht/ Vnd ſeyd noch allzeit obgelegen/ So tragt auch willig dieſe Zucht/ Laſſt ewre Hoffnung nichts bewegen: Vnd ſeyd nicht laß vnd Schwachheit voll Nun Euch die Krohne werden ſol. Dieß Dieß ſprach ſie vnd viel ander Ding Zwar ſtandhafft doch mit ſchvacher Zungẽ/ Biß ihr die Sprache gantz vergieng/ Auch das Gehoͤr ihr ward bezwungen/ Der Tod zu letzt geſchlichen kam Vnd Sie im Schlaff von hinnen nam. Was hat ſie Euch fuͤr Ehr' vnd Trew/ Herr Bierwolff / jederzeit erwieſen? Jhr habt dieſelbe mancherley Jn ewrer Klage ſelbs geprieſen/ Geſtanden daß in Glimpff vnd Trew Sie ewre Rhu geweſen ſey. Wie hat ſie ewer Hauß in Hut Vnd fleiſſig Auffſicht ſtets gefaſſet/ Gebracht in Auffwachs ewer Gut/ Den Vnrath uͤberall gehaſſet/ Jn allen Winckeln zu geſehn Daß Schade nirgends wo geſchehn. Wo laſſ' ich ihre Schweſter hie/ Die Lieb vnd Raht in ihr verlohren? Wo Ench / Fraw Knoblochim/ die Sie Fuͤr andre Schweſter hielt' erkohren? Wir Wir wiſſen wol daß jederzeit Jhr drey ein Hertz geweſen ſeyd. O moͤchte man Euch ihren Tod Jetzt hoͤren in geheim beklagen/ Sehn ewre Thraͤnen oder Noht Man wuͤrde Sachen hoͤren ſagen/ Die wuͤrdig waͤren/ daß die Zeit Sie braͤcht' aus der Vergeſſenheit. Vergeß' ich billich meiner ietzt? Jch weiß was ihre Gunſt vnd Guͤte. Jn vielen Wegen mir genuͤtzt/ Jch kenn' ihr redliches Gemuͤte/ Das ſtets in Kranckheit vnd Gefahr Faſt mehr als hochbekuͤmmert war. Wer recht vmb dieſe Sachen weis Die meine Fauſt nicht kan erreichen Vmb ihrer edlen Tugend Preiß/ Vnd ſieht ſo ploͤtzlich ſie verbleichen/ Wie ſolt' ihm ewre Noht vnd Pein Nicht mehr als recht vnd billich ſeyn? GOtt wirck' in Euch Beſtaͤndigkeit/ Vnd laß' Euch ſeinen Troſt erblicken/ Daß Daß ihr Euch ſaͤmptlich in dieß Leid/ Als Chriſten zuſteht/ moͤget ſchicken/ Jhr ſeht was dißfalls iſt veruͤbt Hat alſo vnſerm GOtt beliebt. Bedenckt es wie ſie auff die Bahn Des Todes ſo behertzt getretten/ Wie ſie ſo Chriſtlich hat gethan/ Wie einem jeden abgebehten/ Vnd nachmahls vnbeſorgt vnd frey An dieſen Kampff gegangen ſey. Danckt GOtt/ vnd laſſet kein mal nach Des ſchoͤnen Endes zu erwehnen/ Vnd haltet Chriſtlich davon Sprach' Vnd gieſſt daruͤber auch wol Thraͤnen/ Nur daß ihr wieder Raht erfaſſt Vnd Euch die Hoffnung troͤſten laſſt. Jhr wiſſt/ ſie iſt voran geſchickt/ Hat alles Siegreich uͤberwunden/ Wird mehr von keiner Angſt beſtrickt/ Hat alle Guuͤg' vnd Luſt empfunden: Wir kommen ſaͤmptlich auch von hier/ Der morgen/ ich wil heut/ zu Jhr. Bleibt Bleibt in getrewer Freundſchafft ſtehn/ Sucht frommer Tugend nach zu ſtreben/ Laſſt Mißverſtand vnd Argwohn gehn/ Nehmt nichts ſo gar genaw vnd eben: Des Schwachen wartet in gemein Vnd GOtt wird mit dem Guten ſeyn. Fuͤr allen ſehnt Euch ſtets hinauff/ Vnd ſeyd der Zukunfft nur gewaͤrtig/ Vollendet ſtuͤndlich ewren Lauff/ Vnd ſeyd mit ewrer Rechnung fertig: Dieweil der HErr gemein erſcheint Vmb die Zeit da es niemand meint. Du aber/ GOtt/ der vnſre Zeit Vnd Leben hat in ſeinen Haͤnden/ Komm hilff vns aus zur Seligkeit Lehr vnſern Lauff vns froͤlich enden: Sey vnſer Troſt vnd Zuflucht hier Vnd nimm vns ſelig auff zu dir!