Klag-Schrifft Bey unverhofftem/ früzeitigem und hochbetrawrlichem aber seeligem Ableiben Des Ehrenvesten ... Hn. Jacob Bierwolffs/ [et]c.

JN dem anjetzt der warme Vorjahrs- Windt Lufft Erd vnd Fluth durch ſchoͤne Krafft beweget/ Daß Feld vnd Wald wie new gebohren ſind/ Vnd alles ſich der Trawrigkeit entſchlaͤget/ Der Baͤum ſich gruͤn anleget: So mus der Jugend Lentz vnd Zier Schon gute Nacht vns geben/ Herr Bierwolff eilet todt von hier/ O ſchnoͤde Zeit! O jaͤmmerliches Leben. Jch kenn' Jhn wol von Kindes-Beinen auff/ Er hatte ſtets gerichtet die Gedancken Auff gute Kunſt vnd aller Tugend lauff/ Vnd eilte fort gewuͤnſchet vnd ohn wancken Jn jhren engen Schrancken/ )( ij Er Er pflag der Wolluſt leichten Schaar Geſtreng zu wieder ſtreben/ Vnd jetzund liegt er auff der Bahr/ O ſchnoͤde Zeit/ O jammerliches Leben! Der Pohlen Reich war durch vnd durch jhm kunt/ Vnd Anfangs zwar war Cracow ſein Behagen/ Diß zeiget' jhm der Weißheit tieffen Grund/ Vnd nachmals lies er ſich noch weiter tragen Der Tugend nach zu jagen/ Rein/ Scheld' vnd Seyne ſahen jhn Kunſt Lehr vnd Klugheit heben/ Dem Tode kuntt' er nicht entziehn/ O ſchnoͤde Zeit/ O jaͤmmerliches Leben! Er koͤmpt zwar heim vnd gruͤſſt ſein Vaterland Vnd laͤſſet ſehn der Gaben groſſe Scharen/ Beſcheidenheit/ Witz/ Sprachen vnd Verſtand/ Gleich wie ein Schiff aus Jndien koͤmpt gefahrẽ Mit ſchoͤnen frembden Wahren/ Sollt' Sollt' aber nicht ſein reiffer Sinn Jn Ehren dißfals ſchweben? Der Todt reiſſt Jhn zu ploͤtzlich hin/ O ſchnoͤde Zeit/ O jaͤmmerliches Leben! Auch Gluͤckes-Gunſt hat ſich zuͤ jhm gethan/ Vnd ſeiner nie von Jugend auff vergeſſen/ Was einer wil nach allem Wunſch vnd Wahn/ Daſſelbe war jhm reichlich zu gemaͤſſen Das Jhn doch nicht beſeſſen/ Was nimmt er mit? ein Buch allein Ein Leinen-Tuch daneben Das andre laͤſſt er alles ſeyn. O ſchnoͤde Zeit/ O jaͤmmerliches Leben! Ohn zweiffel hat ſich manches Frawen-Bild An jhm ergetzt/ jhr ſehnliches Verlangen Mit Hoffnung Jhn zu kriegen nur geſtillt/ Daß ſie Jhn/ kaͤhm er etwa heim gegangen/ Aus Liebe moͤcht' vmbfangen/ Wie ſich der Ruͤſtbaum ſieht vmbher Vmb- Vmbſchraͤnckt von jungen Reben: Ja wenn er nicht geſtorben waͤhr'/ O ſchnoͤde Zeit/ O jammerliches Leben! Wo iſt ſein Glimpff vnd ſuͤſſe Freundlichheit Vnd was Jhn pflag im leben zu begleiten? Jhr Muſen/ kompt vnd traget vmb Jhn Leidt/ Zerreiß aus Noht/ Apollo/ deine Seiten/ Jhr Schaͤffer koͤmpt von weiten/ Schlagt ewre Bruſt vnd werfft von Euch Die Floͤhten ſampt den Staͤben/ Vnd klagt mit mir vmb dieſe Leich: O ſchnoͤde Zeit/ O jaͤmmerliches Leben. Jhr Nymfen auff/ entwiſcht dem geilen Pan/ Der Euch vmb Fluͤſſ' vmb Berg' jetzt nach wil lauffen/ Kommt alle ſchwartz vnd trawrig angethan/ Laſſt niemals nach das Haar Euch aus zurauf- Bringt Blumen her mit hauffen. (fen/ Jhr Parcen/ wuſtet jhr Jhm nicht Ein Ein laͤnger Garn zu weben? Was nuͤtzt Jhm doch ſo kurtzes Liecht? O ſchnoͤde Zeit/ O jaͤmmerliches Leben! Du/ Gottesfurcht/ traͤgſt der Gerechtẽ-Lohn/ Wol dem der dir bemuͤht iſt nach zu ſchlachten/ Wind Jhm nun auch die ewig Ehren Krohn'/ Als er pflag dich ſein hoͤſtes Gut zu achten/ Vnd bloß nach dir zu trachten. Als er an dieſer ſchnoͤden Welt Nie gros hat wollen kleben/ Vertauſch Jhm mit des Himmels-Zelt/ Die ſchnoͤde Zeit/ das jaͤmmerliche Leben. Du thuſt es? ja/ wie wol iſt Er daran/ Wir meinen fruͤ verſcheiden ſey zu Schade/ Doch wer bey Gott am beſten ſtehen kan/ Daß ſich ſein Geiſt des Leibes bald entlade/ Hat ſonderliche Gnade/ Wir eilen ſaͤmptlich in das Grab/ Vergehn wie Schatten eben/ Wer Wer eilends ſtirbt/ legt eilends ab Die ſchnoͤde Zeit das jaͤmmerliche Leben. Vnd ſoltt' es ſeyn die Kunſt vnd Wiſſen- ſchafft? Das kurtze Gluͤck? Seht alles was wir kennen/ Was hat beſtandt vnd wird nicht fort gerafft? Die gantze Welt iſt nur ein Traum zu nennen/ Vnd ſoll zu letzt verbrennen/ Wer ſie recht kennt wird jmmerzu Fuͤr Furcht vnd Schrecken beben: Der Todt verkuͤrtzt durch wahre Rhue Die ſchnoͤde Zeit/ das jaͤmmerliche Leben.

S. D.