Gedächtnis bey adelicher Leichbestattung Dem Weiland HochEdlen Gestrengen und Vesten Herrn Balthasar von Brunnen/ Seiner Churfürstl. Durchl. zu Brandenburg Friedrich Wilhelmen ... Geheimen Rahte

OB dieß nun deiner Arbeit lohnt/ Die/ edle Seele/ du gewohnt Auff aller Tugend Gut zu wenden/ Jn dem du durch nicht-Menſchen-Fleiß Geſucht an den Port an-zu-laͤnden/ Wo Gnuͤge wohnt ſampt Rhue vnd Preiß? Du legſt dich auff den Ruͤcken nieder/ Vnd ſchlaͤffſt die eiſen-harte Nacht/ Dein Geiſt iſt hin vnd koͤmpt nicht wieder/ Schlaͤgt aller Welt Thun aus der acht/ Du biſt als die ſo nie geweſen/ Ohn was man noch von dir kan leſen. Dein Mund ſpricht nicht ein Woͤrtlein Dem doch der Keyſer gab Gehoͤr/ (mehr/ Von deſſen Weißheit gnug kan melden Selbſt Brandenburg die wehrte Zucht Der ewig-hochberuͤhmten Helden/ Die offtmahls Raht bey dir geſucht. Die Hand/ durch die wir vnſre Klagen Dem Landes-Fuͤrsten kunt gethan/ Die Die beydes Recht wuſt auffzuſchlagen Vnd alles im Juſtinian Nur mit dem erſten Grieff kunt' haben/ Liegt gantz erſtarrt vnd wird begraben. Trug dieſer Fuͤſſe todte Krafft Dich in die Welt nach Wiſſenſchafft? Hat dieß Haupt den Verſtandt geheget/ Durch deſſen Glantz vnd guͤldnes Liecht Ein Land offt Sturm vnd Wellen leget? Hofft' ich durch dieſes Angeſicht Zuletzt noch auch erfrewt zu werden/ Daß meine Noht doch wuͤrde kunt Dir/ Friedrich Wilhelm Liecht der Erden/ Durch eines Muſen-Freundes Mundt/ Nach dem Verachtung vnſern Orden Bekrieget/ vnd faſt Herr iſt worden? Jſt etwas/ worauff ich nun wol Jn dieſer Welt mich gruͤnden ſol/ Wann/ edle Seel'/ auch deine Sachen/ Wie groß ſie ſcheinen/ eitel ſind? Jch Jch ſuche mich beruͤhmt zu machen Jch armer durch Papier vnd Tint'/ Ergebe mich gelehrten Sorgen Biß in die Mitternacht hinein/ Bin embſig gleichfals vmb den Morgen Der erſte wieder auff zu ſeyn/ Weiß Tag vnd Nacht nicht Rhue zu nehmen/ Biß daß ich gleich geh' einem Schaͤmen. Wozu doch/ weil gar nichts beſteht/ Vnd dein Thun auch wie Rauch vergeht? Wo iſt die liebe Zeit hinkommen Als dich der thewren Kuͤnſte Pfandt Von deinen Eltern weg genommen Nach Franckfurt an den Oder-Strandt? Wo ſind die angenehme Stunden/ Die gantzer ſieben Jahre dich Mit Buͤchern nur vmbringt gefunden Da/ wo die zarte Muſen ſich Jn Lieb' vnd Freundſchafft der Najaden Jm kuͤhlen Elb-gewaͤſſer baden? Wie Wie haſtu hier ſo manche Nacht Mit Fleiß vnd Arbeit zugebracht Zu keiner Wolluſt luſt getragen? Dein Adel war vnedel dir Wann er nicht hoͤher koͤnte ragen Durch der beruͤhmten Kuͤnſte Zier. Du haſt (weil auch Gelahrte fechten) Nicht vnter andern nur gekriegt/ Es haben offtmals in den Rechten Auch ander vnter dir geſiegt/ Schon damals hubſtu an auff Erden Durch Buͤcher-ſchreiben groß zu werden. Der ſtillen Sale weiſe Bach Ergetzt' vnd traͤnckte dich hernach/ Bey jhren ſilber-klaren Fluͤſſen Fiel dir das fromme Straßburg ein Das giengſtu eilends zu begruͤſſen/ Da ſahe man dich fleiſſig ſeyn/ Da haſtu des Verſtandes Guͤter Erſt außgeſtrewt mit reicher Handt/ Du Du ſpeiſeteſt daſelbſt Gemuͤter Die alle Welt vor weiſ' erkant. Dem Abzug ließ ſich da mit Lehren Den gantzen Tag ohn Beyſtand hoͤren. Noch Franckreich lag dir in dem Sinn Die edle Sitten-Meiſterin/ Druͤmb ſahſt du auch die Seyne flieſſen/ Die Ar auch vnd die ſchnelle Fahrt Des ſtarcken Rhodans ſich ergieſſen/ Voraus das Volck/ des Lebens Art Beſchawteſtu mit Hertzens-Augen. Dieß ſchmeckt nach Hoff-art/ hubſtu an: Dieß nach Verſtandt/ dieß mag nicht taugen/ Dieß iſt was kuͤnfftig nuͤtzen kan. So kahmſtu mit nicht-ſchlechten Wahren Zu deinen Eltern heim gefahren. Wer ruͤhmt mir hie die Fertigheit/ Die du in Kriegs-vnd Friedens-Zeit Am Hauſe Brandenburg erwieſen? Georg-vnd Friedrich Wilhelm hat Dieſel- Dieſelbe gnaͤdigſt ſtets geprieſen/ Jn dem du zwiefach beyder Raht Mit groſſem Ruhm ernennt biſt worden. Wer ſonſt dein Gluͤck vnd Heyraht-Zier? Ohn daß dich hat der Witwer-Orden Betruͤbt nicht einmal ſondern zwier. Was aber nutzen ſo viel Gaben Dir/ der du jetzund wirſt begraben? Auch dieſes/ was mein Mund jetzt ſpricht Dir zum Gedenckmal/ hoͤrſtu nicht/ Erkenneſt nichts von vnſerm Leben. So bald wir dieſer Erden Saal' Auch haben gutte Nacht gegeben/ So ſind wir weg wol tauſentmal/ Vnd liegen aller Welt vergeſſen Als die vor hundert Jahren ſind Von der Verweſung auffgefreſſen. Was man von meinem Ruhm beginnt Ob mir es nachfaͤhrt in die Erden Wird/ wenn ich todt bin/ kunt mir werden. GOtt GOtt aber weiß dem allen Raht/ Der wird auch deiner Tugend Pfadt Anjetzt wol zubelohnen wiſſen/ Kein Menſch hat noch vergebens ſich Auff Recht vnd Froͤmmigheit beflieſſen. Dein Nahme wird auch ritterlich Sich wieder das Vergeſſen legen. Das groſſe Chur- vnd Fuͤrſten-Hauß Zu Brandenburg laͤſſt deinetwegen Der Schmertzen manches Zeugnis aus/ Wirfft Gnad' auff deinen Leibes-Erben/ Wer alſo ſtirbet kan nicht ſterben.

Von

Simon Dachen.