Distributed under the Creative Commons Attribution-NonCommercial 3.0 Unported License.
Schwabacher
Dieses Werk wurde gemäß den DTA-Transkriptionsrichtlinien im Double-Keying-Verfahren von Nicht-Muttersprachlern erfasst und in XML/TEI P5 nach DTA-Basisformat kodiert.
Mit Roͤm. Keyſ. Mayeſt. Freyheit.
DEm̃ Durch-
leuchtigiſten/ Hochgebornen
Fuͤrſten vnd Herꝛn/ Herꝛn Maximi-
liano Erneſto/ Ertzhertzogen zu Oe-
ſterꝛeich/ Hertzogen zu Burgundi/ Steyr/
Khaͤrndten/ Crain vnd Wuͤꝛtemberg/ ꝛc. Gra-
fen zu Habſpurg/ Tyrol vnd Goͤrtz/ ꝛc.
meinem gnaͤdigſten Fuͤrſten
vnd Herꝛn.
Durchleuchtigiſter Ertzhertzog/
Gnedigiſter Fuͤrſt vnd Herꝛ.
WAnn ich zu Hertz vnnd
Gemuͤt fuͤhre/ daß man
bey groſſen Herꝛn vnd
Potentaten nicht mit
ſchlechten Sachen fuͤr-
kommen vnd erſcheinen ſolle/ vermuͤg
deß Spruͤchwoꝛts/ Magnos magna de-
cent, machte es mich nicht wenig anſe-
hen vnnd betrachten/ ob bey Ewer
Durchl: Jch/ als der vnwuͤrdiger
Werck erſcheinen/ vnd ſolches Ewer
Durchl. vnderthaͤnigiſt verehren vnd
dedicieren ſolle/ dieweil dero Hoch-
heit dem Oceano/ ich hergegen aber
nur einer Handt vollen Waſſers zu-
uergleichen. So ich aber betrachte/
daß dem ſo gewaltigen vnd ſehꝛ mech-
tigen Koͤnig der Perſier Artaxerxe das
wenig Trinckwaſſer/ welches jhme
von einem Bawersmann in zuſam̃ ge-
ſchloßnen Haͤnden zuloͤſchung ſeines
Durſts gebꝛacht worden/ angenemer
geweſt/ vnd er die trewe meinung deß
Gebers hoͤher geacht/ als C. Fabritius,
der Roͤmer Kriegsoberſter die mech-
tige vnnd groſſe Summa Gelts/ ſo
jhme von den Samnitern verehret
worden/ geſchaͤtzt hat/ welches mich
dann vmb ſo vil mehrers verurſacht/
diſe geringe Dedication E: Durchl:
vnderthaͤnigiſt anzuhaͤndigen/ Zu-
Gedechtnus/ was ſonderbaren Luſt
vnd gefallen Ewer Fuͤrſtl: Durchl:
vonn Jugent auff gehabt/ frembde
Laͤnder vnd Voͤlcker zubeſuchen/ Jn-
ſonderheit aber Hieruſalem vnnd die
beyligenden Landtſchafften zuſehen.
Derhalben habe ich diß mein Werck
billicher vnnd fuͤglicher nirgents an-
derſtwo anwenden/ als E: Durchl:
ſolches in aller vnderthenigkeit dedi/
ciren ſollen/ Darinnen gleichwol an-
derſt nichts begriffen/ als allein wie
ſich ein jeglicher verhalten ſolle/ wel-
cher in Paleſtinam vnd Leuante zurai-
ſen willens. Ewer Durchl: vnder-
thenigiſt bittent/ nicht ſolch mein ge-
ringfuͤgiges Opuſculum/ ſonder mei-
nen ſchuldigen vnnd trewhertzigen
Willen hierinen anzuſehen/ auch dar-
neben mein gnedigiſter Herꝛ zuſeyn/
vnd mich dero vnderthenigiſten Die-
nen/ wie dann hieruͤber E: Durchl:
ich mich zu deroſelben Ertzhertzogli-
chen Gnaden vnderthenigiſt befehlen
thue.
ES wird von den Rayſenden nicht vn-
billich fuͤr ein ſonders Kleinod gehal-
ten/ wann ſie auff der Raiß einen deß
Wegs wol erfahꝛnen Geferten mit vnd bey
jhnen haben/ durch deſſen fleiſſiges Gelait ſie
vor den verdꝛuͤßlichen vmb vnd jrꝛweg/ auch
vielen andern deß Lebens gefaͤhrliche zuſtaͤnd
verſichert/ entgegen aber mit allerhand zu
der Raiß gehoͤrender notturfft fuͤrſehen/ an
den jhnen beſtimbten Ort/ ſicher vnd fuͤrder-
lich gelangen moͤgen. Welche Gutthat et-
wan der junge Tobias/ wie in ſeinem Buͤch-
lein geleſen wird/ an ſeinem Geleitsman den
Engel Raphael/ ſelber erfahren erkent vnnd
danckbarlich belohnet hat.
Ein ſolch Kleinod vnd getrewen Weg-
weiſer findet/ vnd hat man an diſem Opuſcu-
lo, ſo etwan durch den Edlen vnnd Geſtren-
weyl Fuͤrſtl: Durchl: Maximiliani Erne-
ſti Ertzhertzogen in Oeſterꝛeich Cammerer
vnd Obriſten Stallmeiſter nach gluͤcklicher
Verꝛichtung ſeiner Jeꝛoſolymitaniſchen pe-
regrination/ auß bruͤderlicher wolmeinung/
fuͤr die jenigen zubereittet/ vnd in den Truck
verfertiget woꝛden/ welche nach ſeinem exem-
pel vnd antrieb deß H. Geiſts/ ein Chriſtli-
che vnnd Ritterliche Walfahrt zu dem heili-
gen Grab in Paleſtinam anzuſtellen bewegt
worden/ inmaſſen wolgedachter Herꝛ weiſt
vnd ſelbſt erfahren/ welcher geſtalt alle Bil-
gram jhr Leben in euſſeriſte gefahr ſetzen/ das
ſie/ was zu ſolchen wichtigen gefaͤhrlichen
werck allerhand notturff nach gehoͤrig/ nicht
zuuor von andern/ ſo der ſachen erfahren/ zu
genuͤgen nit informirt, oder vnderwiſen woꝛ-
den. Welches dann ſehr vil fromme Bilgra-
men laider mit vnwiderbringlichen ſchaden
vnnd verluſt jhres zeitlichen Lebens erfah-
ren haben. Jſt derowegen zu fuͤrkommung
einer ſolchen gefahr/ vnd menniglich in das
gelobte heilige Land peregrinierenten zu gu-
tem gegenwertiges Tractaͤtlein (ſo ſchon zu
Liecht kommen/ der Exemplar aber keines
oder doch wenig mehr verhanden) mit bewil-
ligung H. Authoris vnd approbation Supe-
riorum, an jetzo durch mich in der Fuͤrſtli-
chen Hauptſtatt Muͤnchen nachgedruckt
worden/ mit diſer angehengten erinnerung/
daß ſolches als ein koͤſtliches Kleinod/ fuͤr
Silber vnd Gold/ jhnen alle Jeroſolymi-
taniſche Bilgram/ woͤllen gelieben laſſen/
den raht diſes getrewen Geferten (ſoll anderſt
jhr Bilgerfart glucklich abgehen) fleiſſig fol-
gen/ deſſen ſie kommenter zeit/ nicht allein
nuͤtzlich genieſſen vnd ſich moͤgen erfrewen/
ſonder auch dem Authori fuͤr ſein guthertzi-
ge Inſtruction, Fleiß Muͤhe vnnd Arbeit/
hoͤchſtes Lob vnnd Danck ſagen werden.
Muͤnchen/ den 1. Junij/ Anno 1608.
Ende deß Calenders.
Hierauff folgen die zwey Kupfferſtuͤck.
DER jenige/ ſo ein
Raiß fuͤr die Handt zu-
nemmen inn willens/
wirdt ohn zweiffel vor-
her genugſamlich be-
trachten/ warumb/ vnd
wie er dieſelb inn das Werck ſetzen vnnd
vollenden woͤlle. Dieweil dann gemeld-
te zwey Stuck zu jeglicher/ auch gemai-
ner Raiß/ gehoͤrig/ wie viel mehr erfor-
dert die Notturfft/ wol vnnd embſig in
acht zunemmen/ warumb/ vnnd wie ei-
nem jeglichen ſein Raiß inn das heilig
vnd gelobte Landt anzuſtellen vnnd zu-
volbringen ſey.
Bey diſem iſt auch wol zumercken/
vnd in acht zunemmen von noͤhten/ daß
ſich keiner leichtlich auff dieſe Heilige
Raiß begebe/ der entweder eines ſchwe-
ren hohen Alters/ vnnd denen Leibs
Schwach: vnd Gebrechligkeiten vnder-
worffen: Oder zu jung/ vnnd noch ohne
Barth ſey. Dann ob gleichwol ein Pil-
gram/ von vielen betagten Jahꝛen/ am
hinein zihen außtawren moͤchte/ ſo iſt
doch zubeſorgen/ weil ſolcher ſehr vil vn-
gelegenheiten/ als der warmen Speiß/
mangel deß Weins/ rechter Ligerſtatt/
vnd anderer incommoditeten willen an
mehr Orten außzuſtehen hat/ er moͤchte
am herauß zihen erligen/ oder auffs we-
nigiſte/ von ſeiner Geſellſchafft verlaſ-
ſen werden/ ſintemal derſelbe ſehr ſchwer
vnnd verdrießlich ankombt/ vonn einer
Perſon wegen/ lang ſtill zuligen/ verge-
bens zu zehren/ vnnd noch allerley Ge-
faͤhrligkeiten vnderworffen zuſeyn: Alſo
daß hierzu nicht bloͤde/ haͤckle/ ſondern
geſunde Leuth gehoͤren.
Die Jungen aber ſollen ſich dieſer
Raiß/ biß ſie zu jhrem Mannhafften
Alter geraicht/ darumben enthalten/ daß
ſie nicht allein das meiſte/ ſo ſie ſehen vnd
erfahren/ auß der acht laſſen/ ſondern
es ſtehen auch dergleichen Juͤnglingen/
mehrere gefaͤhrligkeiten zu/ beuor aber
weil die Tuͤrcken den Knaben/ zumahl
den jenigen/ ſo einer ſchoͤnen Geſtalt
ſeyn/ bißweilen nach zuſtellen/ vnnd die-
ſelben durch allerley mittel/ es ſey heim-
lich oder mit Gewalt/ an ſich zu ziehen
pflegen/ dahero dann ein ſolcher zu groſ-
ſer Seel vnd Leibs periclitierung gelan-
gen moͤchte/ wie ſich dann eben zu mei-
ner zeit/ mit dem Herꝛn Carl Ferdinand
von Rechberg (der vber ſechzehen Jahr
nicht alt/ vnnd faſt wolgeſtalt geweſt)
zugetragen/ deme durch die Viehiſchen
Tuͤrcken offtermahls nachgeſtelt wor-
den/ vnnd hette er ſich/ nach deſſen ver-
merckung/ am Geſicht nicht geſchwaͤrtzt/
vnnd mit fleiß vnſauder/ auch jederzeit
inn mitten der Geſellſchafft gehalten/ ſo
were es jhme villeicht vbel ergangen.
Jſt derowegen von noͤhten/ daß der
jenige/ welcher nach dem heiligen vnnd
Gelobten Landt zuraiſen begierig/ erſt-
lichen wol betrachte/ auß was vrſachen
er dahin raiſen woͤlle. Als nemblich vnd
inſonderheit die heiligen Oerter (allda
vnſer Heyland vnd Seligmacher Jeſus
Chꝛiſtus ſein Roſinfarbes vnd allerkoſt-
barlichſtes Blut/ vmb vnſerer Suͤnden
willen/ an dem Stammen deß heiligen
Creutzes vergoſſen) mit hoͤchſter andacht
zubeſuchen.
Ehe vnd zuuor aber ſich einer vonn
Hauß begeben thut/ ſolle er ſein Sachen
inn guter Ordnung/ auch vertrawten
Leuthen zuuerwalten hinder jhme ver-
laſſen/ Doch beynebens nicht vergeſſen/
ein ordentlich Teſtament vnnd letzten
Willen zu machen/ ſo er villeicht durch
den Willen Gottes auff ſolcher ſeiner
Raiß mit Todt abgienge/ damit deſſen
Erben inn Einigkeit vnnd Fried erhal-
ten werden.
Folgents ſo iſt von noͤhten/ daß ſich
der Raiſende eigentlich entſchlieſſe/ wie
weit/ auch auff was Ort vnnd Ende er
zuraiſen willens/ damit derſelb ſich auff
ſolchem weg mit Gelt (welches dann inn
Gold/ als Hungariſchen Ducaten/ oder
Venediſchen Zecchin/ zum fuͤglichiſten)
zuuerſehen wiſſe.
Zu dem/ ſo erfordert auch die Not-
turfft/ wegen allerley vngluͤckſeliger Zu-
ſtend (deren kein mangel ſeyn werden)
daß ein jeglicher einem anſehenlichem
Handelsman/ ſo zu Venedig/ oder inn
anderer namhafften Kauffſtatt inn gut-
tem Beruff/ recommendirt ſey/ er auch
vonn gemeldtem Kauffmann/ mit be-
duͤrfftigen Wechſelbꝛieffen verſehen wer-
de/ Dann der jenige ein groſſe Gefahr
außzuſtehen/ ſo ſich ohne Wechſelbrieff
auff gemelte Raiß begeben will.
Mit wieuil Gelt ſich aber der Rai-
ſende verſehen ſolle, kan ich demſelben
kein gewiß ziel fuͤrſchreiben/ doch hiene-
ben zuuermeldten nicht vmbgehn/ daß
der jenige/ welcher nicht weitter als auff
Hieruſalem zuraiſen geſinnet/ auch ſei-
nes Geſunds vergewiſt/ kan vaſt mit
hundert Ducaten im Gold/ von Vene-
dig auß (vnnd da er gar nichts einkauf-
fen wolte) ſein Raiß wol verꝛichten/ doch
iſt allezeit beſſer vnnd fuͤrtraͤglicher/ es
bleibe einem etwas vber/ als daß er ein-
mal mangel leiden ſolle. Derowegen ſo
woͤlle ſich ein jeglicher nicht allein mit
Gelt auff jeden Nohtfall verſehen/ ſon-
dern auch daſſelb auff das beſte bey ſich
bewahren.
Der jenig aber/ ſo weiter in die Tuͤr-
ckey zuraiſen/ ſich darinnen lang auffzu-
halten/ vnnd mancherley Sachen ein-
zukauffen/ geſinnet/ demſelben ich we-
der im Wechſel noch baarem Gelt/ eini-
ge Regul fuͤrſchreiben kan/ Mag dero-
wegen ein jeder dem Kauffmann/ wel-
chem er recommendiert worden/ ſeinen
Willen erklaͤren/ vnd deſſen Raht hie-
rinnen pflegen/ ſonſten gleichwol ſeynd
in Soria die meiſten vnnd fuͤglichiſten
Kauff: vnd Wechſelſtaͤtt: Tripolis/ Ale-
po/ vnd Damaſco. Jn Egypten/ Gran-
Cairo/ vnd Alexandria/ wird dero we-
gen ſich ein jeglicher/ zu notturfft ſeiner
Raiß/ mit Wechſelbrieffen vnd Recom-
mendationſchreiben zuuerſehen wiſſen.
Wann nun/ wie gemelt/ alle Sachen
in gute Ordtnung gebracht/ ſo ſolle ſich
der Raiſende inn GOttes Namen auff
die Raiß begeben/ auch dahin bedacht
ſeyn/ damit er zum wenigiſten zu mitte
deß Aprills/ oder anfang deß Mayens/
ſich alldort zu Venedig finden laſſe/ die-
weil gemeiniglich die Nauen vnd Laſt-
ſchiff/ vmb dieſelbige zeit/ wegen deß
gutten Winds/ jhren ablauff nemmen/
Vnd da es ſich zutruͤge/ daß eines vmb
ein Monat oder mehꝛers zu fruͤhe auff
Venedig ankeme/ ſo kan ſolcher ſein Sa-
chen alldort nur deſto beſſer zuberaiten
vnd verꝛichten/ auch vnder deſſen/ ſo vil
die zeit erduldet/ etliche vmbligende
Staͤdt Italiæ beſehen. Alßbaldt nun offt
ermeldter Peregrin auff Venedig an-
kommen/ ſolle er ſich bey dem jenigen
Kauffmann/ welchem er recommendirt
worden/ anmeldten/ auch ſeinen Wech-
ſelbrieff vnd Recommendationſchꝛeiben
bey jhme zu ſolicitiern nicht vergeſſen.
Darneben auch bey ſolchen vnd andern
Kauffleuthen gute Nachfrag haben/
was für Schiff zu Venedig verhanden/
ſo in Leuante (ſonderlich aber auff Tri-
poli de Soria, oder Alexandria inn Egy-
pten) jren Weg zu nemmen vorhabens/
auch zu was zeiten dieſelben abzulauffen
geſinnet.
Demnach nun ein Nauen oder mehꝛ
vorhanden/ welche nach Tripoli oder
Alexandria abzulauffen in willens/ ſo
ſolle ein jeder fleiſſige Nachfrag haben/
vnnd gute achtung darauff geben/ da-
mit ſich keiner auff kein Nauen begebe/
welche ſehr alt vnd zuuil Raiſen gethan/
oder auch gar newe/ vnd zum erſten mal
außfahren ſolle/ ſondern jhme ein ſolche
erwehle/ welche nicht gar new/ oder alt
ſey/ auff welcher es einen guten Patron/
Nocchiero/ Piloto/ auch wolgeuͤbte Ma-
rinari habe.
So nun ein gutes vnnd nach not-
turfft verſehenes Schiff vorhanden/ ſo
ſolle ſich der Pilgram mit ſeinem Wech-
ſelherꝛn vnnd andern guten Freundten/
zu dem Patron der Nauen verfügen/
vnd Handlung mit jhm pflegen/ damit
er jhne zu ſich in das Schiff/ vnd vnder
ſein protection nemme/ auch mit einem
guten Ort in dem Schiff/ ſampt Eſſen
vnd Trincken verſehen woͤlle.
Wegen der Bezahlung fuͤr Eſſen/
Trincken/ vnd Fuhrlohn/ kan zugleich
mit jme dem Patron gehandelt werden/
ſonſten iſt meiner zeit der brauch geweſt/
daß ein jeglicher ſo an deß Patron Tafel
geſeſſen/ monatlich fuͤr ſpeiß vnd tranck
acht Ducaten/ vnd fuͤr das Fuhꝛlon vier
Ducaten in Gold biß in Leuante bezah-
len muͤſſen.
Weitter ſo iſt auch nicht zu vergeſ-
ſen/ daß ein jeglicher Catholiſcher Chriſt
ſich bey der Geiſtlichen Obrigkeit/ allda
zu Venedig anzumelden/ vnd vmb ein
Schrifftliche Erlaubnus/ nach Hieru-
ſalem zuraiſen/ anzuhalten verbunden/
welche jhme dann ohn alle Waigernuß
mitgetheilt wirdt/ im fall aber ſolches
nicht beſchehe/ vnnd der Pilger ohne
Geiſtliche erlaubnus verꝛaiſte/ ſo iſt der-
ſelb die gantze Zeit ſeiner Raiß excom-
municiert, vnd mit dem Bann behafft/
wirdt auch ehe nicht/ als zu Hieruſalem
daruon abſoluiert.
Obgleich wol die Raiß nach dem hei-
ligen Grab an jhr ſelbſt nit gar weit oder
ferꝛ/ ſo iſt ſie doch wegen der Meerfahꝛt
etwas gefaͤhrlich/ auch ſonſt muͤheſamb
vnd vngelegen/ derowegen ich bey mir
nicht vnrahtſamb befunden/ dem Rai-
ſenden ein Jnſtruction etlicher beduͤrffti-
ger Stucken/ ſo zu gemelter Raiß vonn
noͤten fuͤrzuſchreiben/ doch nicht alſo zu-
uerſtehn daß offt bemelter Pilger/ nicht
viler folgender Stuck entpehrn/ vnd ſich
deß Sprichwoꝛts gebrauchen moͤge/ vil
muß man haben/ mit wenig kombt man
auch auß/ ſondern damit ein jetweder zu
rechter Zeit mit allerley Beduͤrfftigkeit
deſto beſſer verſehen werde.
ANfencklich vnd fuͤrs erſte/ all-
weil die meiſten Peregrini/ ſo
nach dem heiligen Landt rai-
ſen/ ſich in graw oder Muͤnch-
farb Thuch zu Kleidern pflegen/ wie
dann ſolches an jhm ſelbſt fein vnd lob-
wuͤrdig iſt/ dero wegen ſo raht ich einem
jeglichen/ daß er ſich in ein gar ſchlechtes
vnd geringes Thuch/ oder aber in Ma-
zalana/ mit einem langen vberꝛock be-
kleiden thue.
Eines braiten Filtzhut hat jeglicher
von noͤhten/ welcher ein ſchlechte/ oder
gar kleine Schnur habe/ der muß auch
auffs ſchlechteſte gefuͤttert ſeyn.
So es einem gefellig/ ein Muͤnchs-
guͤrtel mit ſich zunemmen/ ſtehet ſolches
bey eines jeden gefallen/ ſonſten iſt es gar
nit von noͤhten.
Weitter/ ſo ſolle ſich einer verſehen
mit vier Hemmetern/ welche nicht von
ſubtiler/ ſondern zimblich grober Lein-
wat/ ſo vber den Rucken glat geſchnit-
ten/ vnd ohne Falten ſeyn ſollen/ damit
das Vnzifer darinnen nicht ſo leichtlich
die herberg finde.
Die Schlaafhoſen ſollen von gleich-
maͤſſiger Leinwat gemacht ſeyn.
Ein dutzet Saluet/ vnd vier Schlaf-
hauben/ ſambt zweyen Haupt: oder
Handtuͤchern/ vnd etlichen baar Scar-
peten/ ſeynd einem auch von noͤhten.
Welchem es auch gefellig/ der mag
ſich mit zweyen baar Leylachern ver-
ſehen.
Ob man gleichwol in der Jnſel Zante
ſehr gute Schuch machet/ Dieweil aber
nicht alle Nauen/ ſo auff Tripoli oder
Alexandria ſchiffen/ alldort zulenden/ ſo
iſt derowegen zum ſicheriſten/ ſich zu Ve-
nedig mit zwey oder drey baar Schuch
zuuerſehen/ welche weit vnd groß genug
ſeyn ſollen.
Weitter/ ſo woͤlle einer zu kauffen nit
vergeſſen/ ein rohtes/ oder was Farb es
ſey/ geſtricktes Marinaͤr Haͤubel/ welchs
einem bey Tag vnnd Nacht in der Na-
nen/ auch ſonſten dienſtlich ſeyn wirdt.
Doch iſt zumercken/ vnnd bey Leibſtraff
wol darauff achtung zugeben/ daß we-
der ſolches Haͤubel oder etwas anders
an den Leibskleidern gruͤner Farb ſey/
dieweil niemandten ſolche Farb erlaubt
zutragen als allein denen/ ſo vonn Ma-
chomets Stammen vnnd Gebluͤt her-
kommen.
Ein Meſſer/ ſo nicht zugroß/ ſolle
jeglicher haben/ vnnd daſſelbe vor den
Mohꝛen vnd Arabiern wol verbergen.
Dieweil auch ein jeglicher/ ſo in Pa-
leſtinam zuraiſen willens/ keiner an-
dern Vrſachen als der Andacht halber/
ſich dahin begeben ſolle/ zweiffelt mir
derohalben gar nicht/ es werde ſich ein
jeglicher derſelben mit einem oder mehr
Betbuch/ ſo tauglich vnd jhme gefellig/
verſehen/ doch damit daß daſſelbe nicht
vaſt verguld/ noch vil weniger mit Sil-
ber beſchlagen ſey/ auff daß jhme ſolches
von den Tuͤrcken/ Mohren/ oder Ara-
biern/ wegen der Zier/ nicht genommen
werde.
Es begibt ſich offtmals daß die Na-
uen vnnd andere Schiff/ durch groſſe
Fortuna, oder auch auß Mangel deß
Winds/ lange zeit auff dem Meer ver-
harꝛen muͤſſen/ vnd nicht zu Landt kom-
men muͤgen/ dannenhero dem Peregrin
die Zeit vnd Weil lang wirdet/ Derowe-
gen ſo mag ſich ein jeglicher mit einem
nutzlichen/ vnnd auff ſolche Raiß gebuͤr-
lichem Hiſtorien Buch verſehen/ jhme
damit die Weil zu kuͤrtzen.
So einer auch Luſt vnnd Gefallen
hette/ ſein Raiß zubeſchreiben/ der woͤlle
ſich mit zweyen Schreibtaͤfelein verſe-
hen/ doch alſo/ daß dieſelben nit zu klein/
auch nit von Stein/ ſondern von Leder
gemacht ſeyn/ darinnen ein jeglicher ſein
Sachen leichtlichen vermercken/ vnd fol-
gents mit guter Gelegenheit auff das
Pappir bringen moͤge.
Mit einem Schreibzeug/ Federn/
Dinten vnd Pappir/ ſolle ſich ein jeder
verſehen.
Ferner ſo mag jme der Raiſende zu
Venedig einkauffen ein Khiſt oder Tru-
hen/ in der leng als er ſelbſt iſt/ die aber
nicht zu breit/ doch mit einem gutten
Schloß verſehen ſeye/ welche inwendig
inn drey theil vnderſchieden/ auff daß
einer die Kleider (dern gleichwol nicht
vil vnd ſtattlich ſeyn werden) auch eſſen-
de Speiß vnnd anders vnderſchiedlich
behalten muͤge.
Welcher nicht hart ruhen/ vnd den
Boden trucken/ ſondern was ſanfft li-
gen wil/ der mag jhme nach maß obge-
melter Truhen ein Madratzen/ vnnd
darzu gehoͤrigen Hauptpolſter machen
laſſen.
Mit einer Engliſchen Decken ſolle
ſich der Peregrin auch verſehen/ welche
jhm mehrers in dem herauß/ als in dem
hinein raiſen dienſtlich ſeyn wird.
Obwol nicht rahtſam/ daß ſich einer
mit Waffen vnd Wehren in das heilige
Landt vnd Stadt Hieruſalem begebe/
dieweil einem ſolche entweder genom-
men/ oder ſonſten groſſe Gefahr darauß
entſtehen kan.
Dieweil ſich aber offt begibt (wie dañ
auch meiner Geſellſchafft/ vnnd mir be-
ſchehen) daß die Schiff von Meer Rau-
bern vnd andern Feinden mehꝛmals an-
gegriffen werden/ ſo iſt deßwegen nicht
vntauglich/ ſich mit einem ringen Puͤrſt-
rohꝛ vnnd guten Seittenwoͤhꝛ/ zuuer-
ſehen. Zu deme/ ſo ſeynd die Waffen den
jenigen von noͤhten/ auch auff den Weg
zufuͤhren erlaubet/ welche nach Alepo/
Damaſco/ GranCairo/ vnnd andern
Tuͤrckiſchen Staͤdten raiſen thun/ wie
dann mein Mitgeferd/ Herꝛ Wolff Sig-
mund von Haunſperg/ vnnd ich/ vnſere
Waffen/ auſſer deß heiligen Landts/ je-
derzeit mit vns gefuͤhrt.
Auffdaß aber einer mit gemeldten
Waffen nit etwan in Vngluͤck komme/
ſo mag er ſolche zu Tripoli/ biß zu ſeiner
Widerkunfft von Hieruſalem/ in Ver-
wahrung laſſen/ vnnd ſich alsdann der-
ſelben vngehindert auff ſeiner folgenden
Raiß gebrauchen.
Weitter/ ſo iſt auch mitzunemmen
von noͤhten ein Tazza oder Schaal von
Erd oder Glaß/ ſambt ſeinem Futteral
vonn Meerbaſt gemacht/ damit es nicht
leichtlich zerbrochen werde/ welches Ge-
ſchirꝛ einem zuempfahen Speiß vnnd
Tranck dienſtlich ſeyn kan.
Demnach ſich auch offt begibt/ daß
die Schiff von den Winden hin vnd wi-
der geworffen/ dannenhero die Speiſen/
ſo bey dem Fewr gekochet/ vmbgeworf-
fen/ ja auch wol vonn den groſſen Meer-
wellen vberzogen werden/ daß man der-
ſelben alsdann nit wol genieſſen kan. Jſt
derowegen von noͤhten/ ſich mit einem
Kupffern Hafen zuuerſehen/ der oben
bedeckt ſey/ vnd einen Ring/ wie ein Reſ-
ſel/ habe/ damit man denſelben an ein
Hacken vber das Fewer hangen/ vnd die
Speiß zurichten moͤge.
Es iſt auch von noͤhten zukauffen
ein Pfann/ darinn man von Ayern vnd
andern kochen koͤnne.
Ein Fewerzeug iſt nicht vntauglich/
ſambt einen Compaß/ welchen man nach
dem Polo richten kan/ wie dann derſelben
zu Venedig wol zu finden ſeynd.
Mit Jnßlet vnd Wachßkertzen/ auch
einer Latern/ mag ſich der Pilger gleichs-
fals verſehen.
Zween Haͤrine Saͤck/ welche anein-
ander hangen/ wie es in Jtalia die Baw-
ren zu Roß fuͤhren/ ſeynd einem auch
von noͤhten/ vnd wol zugebrauchen/ ſon-
derlich aber von Giaffa auß/ biß nach
Hieruſalem/ vnd wider zuruck.
Vor allen dingen aber/ woͤlle ein je-
der nit vergeſſen/ Nadel vnd Faden mit
ſich zunemmen/ dieweil es auff ſolcher
Raiß vil flickens gibt/ daß offt einer wi-
der ſeinen Willen das Schneiderhandt-
werck treiben muß.
Weitter mag jhme der Peregrin zu
Venedig einkauffen wie folget: Als erſt-
lich/ vmb ein Cronen wol vnnd hart ge-
bachene Biſcoti.
Drey oder vier pfundt Parmaſan
Kaͤß.
Jtem/ Cerualadi/ das ſeynd groſſe
Schweinene Wuͤrſt.
Jtem etliche Ochſenzungen/ vnnd
Schweinene Hammen/ ſo eingeſaltzen/
oder im Rauch gehangen worden.
Jtem/ auffgeſelcht Ochſenfleiſch.
Das Schmaltz oder eingeſaltzene
Butter ſolle nicht vergeſſen werden.
Welcher auch gern will/ kan mit ſich
nemmen/ lebendige Huͤner/ Enten vnd
Genß.
Jnſonderheit aber mag ſich einer mit
folgenden Sachen verſehen/ Als erſt-
lich mit
Allerley/ doch allbereit geſtoſſen Ge-
wuͤrtz.
Jtem/ Zuckerfein/ vnd Kuchelzucker.
Sowol auch etlich Loth Julep/ ſich
damit in der groſſen Hitz abzukuͤhlen.
Demnach ſich auch offt zutregt/ daß
der Menſch auff dem Weg in dem Leib
verſtopffet wirdt/ deßwegen dann von
noͤhten/ daß jhme einer inn der Apote-
cken ein Laxatiuum zurichten laſſe/ damit
(wo es die notturfft erfordert) der Leib
widerumb dardurch eroͤffnet moͤge wer-
den.
Gleich diſem zuwider/ ſolle jhm einer
ein Medicamentum zurichten laſſen/ ſo er
villeicht auff dem Meer oder Landt ein
Durchbruch/ oder die Ruhr bekeme/ die-
ſelb damit zuſtillen.
Es haben auch jhr vil im Brauch ein
Apoteck Truͤhel (ſo mit allerley koͤſtlichen
Sachen eingericht) mit ſich zunemmen/
ſolches ſtehet derowegen zu eines jegli-
chen gefallen.
Belangent den Wein/ mag jme einer
zu Venedig ein Barilla oder wie vil einem
gefellig/ Vin Garbo einkauffen/ dann der
ſuͤſſe Wein in der Hitz alßbaldt anzickt/
vnd zu Eſſig wirdt.
Woferꝛ auch einem gefellig/ ein Ba-
rilla mit Suͤſſem oder Trinckwaſſer mit
ſich zunemmen/ der findet ſolches zu Ve-
nedig inn dem Teutſchen Hauß zum al-
lerbeſten/ wie ich ſolches ſelbſt probieret
habe.
Hie iſt zumercken/ obwol ich dem
Peregrin vielerley Sachen einzukauffen
fuͤrgeſchrieben/ ſo hat es doch die Mey-
nung bey mir gar nit/ daß ein Peregrin-
eygentlich mit allen diſen Sachen verſe-
hen ſeyn muͤſſe/ die weil einer mit villeich-
term Vnkoſten außkommen kan/ ſon-
derlich jener/ ſo ſich deß Patrons Tafel
allein halten/ vnnd darmit vergut nem-
men wil.
Daß ich aber hieoben ſo mancherley
Sachen einzukauffen vermeldet/ iſt ſol-
ches nur fuͤr die Reichen vnnd Wolha-
benden/ (auch fuͤr die jenigen/ ſo keinen
Abgang leiden/ ſonder jhre Gelegenhei-
ten vnd Jauſen haben woͤllen) beſche-
hen. Wirdt derwegen ein jeglicher ſein
Sachen nach Gelegenheit der Zeit/ deß
Orts/ vnd ſchwere deß Beutels zu rich-
ten wiſſen.
Wann nun offtermeldter Peregrin
mit aller Notturfft verſehen/ jhme aber
nicht jmmerdar inn dem ſtillſtehenden
Schiff zuuerbleiben geliebt (wie es dann
an jhme ſelbſt ein langweilige Sach) ſo
woͤlle er deßhalben ſondere gutte Nach-
frag vnd Kundtſchafft bey dem Patron
vnd Scriban der Nauen (mit denen er
zuuerꝛaiſen in willens) einziehen/ wann
eigentlich die Verꝛuckung deß Schiffs
beſchehen ſolle/ auffdaß einer nicht viel
zeit vergebentlich vnd mit Vngelegen-
heit in der Nauen verzehre/ oder durch
ſein lang außbleiben dieſelb verſaume/
wie dann ſolches mehrmals beſchehen.
Welcher aber noch mehꝛmals/ ſeines
verꝛuckens vergewiſſet ſein will/ der mag
dem Scribano der Nauen ein Vereh-
rung verſprechen/ ſo er jhme auff den ge-
wiſſen Tag der Verꝛuckung beruffen
wirdet.
Wann nun der Peregrin gewiſſes
Anzeygen vnd ſichere Kundtſchafft hat/
daß die Nauen/ in deren er ſo fort zuſchif-
fen geſinnet/ jnnerhalb zween oder drey
Tagen jhren Ablauff zunemmen fuͤrha-
bens/ ſo woͤlle er ſeine Sachen in die Na-
uen fuͤhren/ vnd einen gewiſſen Marina-
ro/ inn beyſeyn deß Patrons oder Scri-
bans/ biß zu ſeiner Widerkunfft/ zube-
wahren vberantworten/ Oder welches
noch beſſer/ ſo einer mit einem Diener
verſehen/ daß er denſelben bey ſeinen
Sachen laſſe/ damit jhme von ſolchem
nichts entfrembt oder genommen wer-
de/ er auch ſein guthabendes Ort vnnd
Quartier (welches das beſte Alla Poppa
iſt) in dem Schiff nicht verliere/ vnnd
villeicht einen andern an ſeiner Stantia
finde/ welchen er alsdann nicht leichtli-
chen außtreiben wuͤrde.
Wann ſich nun offt ermeldter Pil-
ger in die Nauen begeben/ vnnd der Ab-
ſchiffung erwartet/ woͤlle er alle ſeine
Sachen fein zuſam̃en tragen/ vnd nichts
zerſtrewet hin vnnd wider ligen laſſen/
ſonſtener baldt andere finden wirdt/ die
jhme ſolche auffheben/ doch nimmer wi-
dergeben.
Sonderlich aber ſolle ein jeder gute
achtung haben/ daß er inn Gegenwart
der Tuͤrcken/ Arabier/ oder andern/ es
ſey zu Waſſer oder Landt/ ſein Gelt/ als
vil muͤglich/ nicht ſehen laſſe/ ſo anderſt
er nicht allein vmb daſſelb kommen/ ſon-
dern auch wol gar daruͤber das Leben
laſſen wil.
Es ſolle auch der Pilger ſein haben-
des Gelt nicht alles an einem Orth bey
ſich behalten/ ſondern vnderſchiedlich
einmachen vnd bewahren/ auffdaß/ ſo
jhne etwan das Vngluͤck treffe/ er ſol-
ches Gelt nicht alles auff eimal zuuer-
liern/ ſonder das vberbleibende noch her-
zunemmen habe.
WAnn nun die Ancker auß dem
Meer/ vnnd die Hertzen der
Menſchen vorher mit andaͤch-
tigem Gebett/ vnd befehlung
zu GOtt/ erhebt/ auch die Nauen das
Meer zerſchneidt/ vnnd mit geſpantem
Segel/ gutem/ halb/ oder ſchlechtem
Windt fortlauffen thut/ ſo mag der Pil-
gram allgemach mit guter Fuͤrſichtig-
keit/ vnd ſonderm Auffmercken ſich de-
nen Paſſageris, Patron, Scriban, vnnd an-
dern Officiern deß Schiffs/ nach Gele-
genheit inſinuiren, vnnd jhme dieſelben
zu guten Freundten machen/ auffdaß/
wo es kuͤnfftiger zeit die Notturfft erfoꝛ-
derte/ ſie einem allerley Huͤlff vnnd Bey-
ſtandt deſto williger erzeigen.
Es ſolle ſich auch ein jeglicher huͤten/
auffdaß er mit keinem Tuͤrcken/ Juden/
Griechen/ Armenier/ oder dergleichen
Leuth/ (ſo anderſt derſelben inn dem
Schiff vorhanden) von Glaubēs ſachen
diſputiere/ oder jhnen was zu wider thue/
dann einem darauß groß Vngluͤck erfol-
gen würde.
Es iſt auch zum hoͤchſten von noͤren/
daß der Pilger/ ehe vnnd zuuor er auff
das Meer oder Schiff kombt/ ſich fleiſ-
ſig bewerbe/ damit er einen oder zween
guter vnd vertrawter Mitgeſellen vber-
komme/ welche er zum muͤglichiſten auff
allerley weiß vnd weg kennen lerne/ vnd
wo muͤglich/ ſo wol kenne als ſich ſelbſt/
dieweil mehrers (ſonderlich auff ſolcher
Raiß) an einem getrewen verſtendigen
Freundt vnnd Mitbruder/ als an vilen
Reichthumben vnd Schaͤtzen/ gelegen.
So auch einer einen Diener mit ſich
hette/ der woͤlle ſolchen nit wie einen Die-
ner (ſonderlich inn Gegenwart der Tuͤr-
cken vnd andern Vnglaubigen) ſonder
als wie ſeinen Mitgeſellen halten.
Jn allweg woͤlle ein jeder die Barm-
hertzigkeit gegen denen Krancken vnnd
Duͤrfftigen/ was Nation vnd Religion
die jmmer ſeyn/ es ſey mit Speiſen/ La-
bungen/ vnd dergleichen/ zuerzeigen nit
vergeſſen/ dieweil nicht allein Gott der
Allmechtige ſolche gute Werck vnnd er-
zeigte Barmhertzigkeit reichlich beloh-
nen thut/ ſondern auch die jenigen/ de-
nen ſolche Gutthat widerfahren/ ſolches
zuuergelten inn keine Vergeſſenheit ſtel-
len werden.
Weitter ſo woͤlle auch der Peregrin
gut acht haben/ damit wann die Mozi
oder Schiffjungen zu dem Eſſen ruffen/
daß einer ſolches nicht verſchlaffe/ vber-
hoͤre/ oder der letzte ſey/ dieweil an diſem
Ort wenig Ceremonien gebraucht/ vnd
keiner auff den andern mit dem Eſſen
warten thut.
Da es ſich auch begibt/ daß einem
von jemands andern an der Tafel was
fuͤrgelegt werde (welches doch gar ſelten
geſchicht) vnd er jhme ſolches zueſſen ge-
trawet/ ſo woͤlle derſelbe das jenige nicht
leichtlich einem andern fuͤrlegen/ ſo er nit
die Zaͤhn feyren laſſen/ vnd mit hungeri-
gem Magen die Malzeit enden wil.
Obwol in dem Anfang etlichen (in-
ſonderheit aber denen Teutſchen/ welche
der feiſten Suppen gewohnt) die Trac-
tation auff dem Meer frembd fuͤrkom-
men vnd ſchwer fallen wirdt/ ſo werden
ſie doch daſſelbe mit der zeit gewohnen/
vnd den Hunger zu einem Lehrmeiſter
nemmen.
Weitter/ da es ſich zutruͤge/ (wie es
dann hart fehlen wird) daß vnuerſe-
hene Wind/ vhrbloͤtzliche Burahce oder
langwirige Fortunen vorhanden/ vnnd
man deß Raiſenden Arbeit vnnd Huͤlff
inn dem Schiff beduͤrfftig/ es ſey mit
Pumpen/ Segel auff vnnd abzihen/ An-
cker heben/ vnd was ſonſten von noͤhten/
ſo woͤlle ſich ein jeder/ ſo er darzu erfor-
dert wirdt/ dapffer ſtellen vnd brauchen
laſſen.
Gleichfals ſo es ſich begebe/ daß ein
Marinaͤr oder Schiffknecht/ welcher ſei-
nen Dienſt vnd Arbeit verꝛichtet/ (es ſey
mit ziehen/ heben oder ſteygen/ ſpringen/
lauffen/ oder andern ſo von noͤhten) ei-
nen Peregrin zuweichen/ oder auß dem
Weg zutretten vermahnet/ ſo ſolle jhme
alsbaldt ohn alle Widerꝛed ſtatt gethan
werden/ ſonſten moͤchten einem zu dem
Spot die Straich erfolgen.
Weitter vnnd vor allen dingen/ ſo
woͤlle ſich ein jeder/ nicht allein gegen ſei-
nen getrewen Freundten vnnd Bekand-
ten/ ſondern auch gegen menniglich inn
dem Schiff freundtlich ſtellen vnd ver-
halten/ auch allerley Widerwertigkeit
vnnd Gebrechligkeiten ſeiner Mitgefer-
ten mit Gedult vbertragen/ vnd ſich nit
leichtlich zu Zorn bewegen laſſen.
Wunderbarlichen vnd ſeltzam wer-
den dem Walfahꝛter erſtlich viel ſachen/
ſo ſich inn der Nauen zutragen/ fürkom-
men/ als daß einer ſehen vnd hoͤren wird
einen Marinaͤr hie/ den andern dort/
ſchreyen/ den Nochiero mit einem Pfeif-
fel ruffen/ einen an einem Sayl hinauff/
den andern herab ſteigen/ dieſen auff ei-
nem Segel ſitzen/ den andern an einer
Stricken Laittern hinauff biß zum hoͤch-
ſten in den Korb klimmen/ vnnd alſo ei-
nen diß/ den andern ein anders Werck
verꝛichten ſehen.
Aber noch wunderbarlicher vnnd
ſcheuhlicher wirdt einem fuͤrkommen/
daß er gleich ſchier fuͤr maͤnniglich (re-
nerendo zumeldten) ſein Notturfft deß
Leibs verꝛichten ſolle. Dann obgleich-
wol inn der Nauen (mit Vrlaub zumel-
den) etliche Heimbligkeiten vnd Oerter/
den Leib zureynigen voꝛhanden/ ſo ſeyn
aber dieſelben zum theil an ſolchen Ohr-
ten/ allda einer nicht jederzeit hingelaſ-
ſen/ die vbꝛigen Oerter aber ſeynd alſo of-
fen/ daß einer von menniglich ohn alle
Hindernuß geſehen kan werden/ welches
einem/ (ſonderlich im anfang) abſchew-
lich/ vnnd faſt widerwertig fuͤrkommen
wirdt.
Dannenhero es ſich offt begibt/ daß
mancher auß Scham/ biß auff den drit-
ten/ ja noch mehr Tag/ ſein Leibsnot-
turfft nit verꝛichten thut/ darauß dann
gemeiniglich groſſe vnnd gefaͤhrliche
Kranckheiten erfolgen. Derowegen rah-
te vnnd ermahne ich einen jeglichen/ daß
er ſolche Scham diß Orts bey ſeits ſetze/
auch nach Gelegenheit deß Orts/ vnnd
wie die andern/ ſich accommodire.
Weitter/ ſo woͤlle der Peregrin mit
dem hin vnnd wider ſteigen/ jnner vnnd
auſſer deß Schiffs/ nicht zu fuͤrwitzig
ſeyn/ auffdaß er nicht in das Meer falle/
vnd einen Stockfiſch fangen thue/ ſo es
anderſt ſo wol gerahten moͤcht.
Wurde auch gemelte ſein Nauen inn
der Jnſul Zante den Port nemmen/ ſoll
der Pilger neben andern ſeinen Gefer-
ten zu Landt tretten/ vnnd ſich alldort
mir friſchem Brod/ Wein/ Waſſer/ vnnd
andern nothwendigen Sachen verſe-
hen.
Es werden auch one zweiffel etliche
vnder der Geſellſchafft an feuchten vnd
naſſen Orten in dem Schiff einfuriert
ſeyn/ dannen hero die Madratzen/ vnnd
andere mehr Sachen/ nicht allein feucht
vnnd ſtinckent/ ſondern auch die weiſſen
Floͤh jhr Poſſeß mit gewalt darinnen ge-
nommen haben werden.
Deßwegen ſo iſt zu ſchoͤner Tagszeit
von noͤhten/ gemelte Sachen zum theyl
waſchen zulaſſen/ zum theil aber an die
Sonne zulegen/ vnd zuſaubern.
Wann nun die Nauen jhren Ablauff
auß obuermeldter Jnſul genommen/ vñ
ſich wider auff das hohe Meer begeben/
ſo kan nicht ſchaden/ ſonderlich zu der
zeit/ wann guter Windt oder Bonaza
vorhanden/ daß die Geſellſchafft den
Marinaͤrn/ oder Schiffknechten nach
anzahl der Perſonen/ etliche Maß Zan-
tiſchen Wein/ Biſcoten/ Kaͤß/ vnnd et-
was vonn Schweinen Fleiſch verehꝛen
auffdaß ſie alßdann der Geſellſchafft/
nicht allein kuͤnfftig allen guten Willen
erzeigen (welches ſonſt ſelten geſchicht)
ſondern auch dieſelben von jnen allerley
Gelegenheiten der vmbligenten Oerter
erkuͤndigen moͤgen.
Woferꝛn die Nauen inn Cypro den
Port neme/ wie gemeiniglich geſchicht/
ſo ſollen die Pilger bey dem Patron/
Scriban vnnd Marinaͤrn/ jhre fleiſſige
Nachfrag haben/ wie lang ſich eigent-
lich die Nauen allda auffzuhalten geſin-
net/ damit die obuermeldten Pilger nit
zulang verziehen/ vnd die zeit vmb ſonſt
alldort verzehren muͤſſen.
Wann alsdann die Peregrini ver-
mercken vnnd ſehen/ daß ſich das Schiff
wider derſelben Gelegenheit allda zu
lang auffhalten moͤchte/ ſo moͤgen ſie
mit Vorwiſſen deß Patrons der Nauen
ein anders Schiff/ (deren inn Cypro ge-
nug zufinden) auffnemmen/ vnnd mit
demſelben nach Tripoli de Soria ſeglen.
Vnd obwol von Cypro biß auff Tri-
poli
poli de Soria nit vil vber zweintzig Teut-
ſche Meil/ welche man bißweilen inn ei-
nem Tag/ bißweilen aber auch wol inn
acht oder mehr Tagen nicht volbringen
kan/ ſo iſt derowegen vonn noͤhten/ ſich
mit Victualien nach Notturfft zuuerſe-
hen.
Woferꝛn denen Raißgeſellen ein gu-
te vnnd ſichere Gelegenheit vonn Cypro
nach Zaffo zuſchiffen zuſtuͤnde/ moͤgen
ſie hierdurch den Abweg nach Tripoli er-
ſparen/ vnd gerad auff Zaffo zufahren.
Es iſt auch nicht zuuergeſſen/ daß
ein jeglicher Peregrin alldort inn Cypern
vmb ein Ducaten oder mehr Tuͤrckiſche
kleine Muͤntz/ als Maidini vnd Aſperi/
ein wechßle/ auffdaß/ wo es die Not-
turfft folgents erfordert/ er mit
kleiner Muͤntz verſe-
hen ſey.
WAnn nun die Peregrini mit
Gluͤck Soriam vnd den Port
Tripoli erꝛaicht haben/ ſo iſt
nicht vnrahtſamb/ daß die
zween auß jhrer Geſellſchafft inn die
Stadt Tripoli ſchicken/ damit ſie ſich
entweder bey den Bruͤdern S. Franciſ-
ci Ordens/ oder aber bey dem Wirth in
dem Frantzoͤſiſchen oder Venediſchen
Fontico vnd Herberg anmelden. Wann
ſolches verꝛicht/ vnnd ſie herberg erlan-
get/ ſo moͤgen ſie ſich widerumb zu jhrer
Geſellſchafft in den Port verfuͤgen/ vnd
jhnen die Geſchaffenheit der Sachen an-
zeigen.
Alßdann mag ſich ein jeder Pere-
grin lieber in ſeinem Jtalieniſch/ als Pe-
regrinklaid zu Landt begeben/ Dann
anderer Geſtalt einer inn den Muͤnchs-
klaidern von den Tuͤrcken vnd Mohꝛen/
die zeit/ in dern einer zu Tripoli verhar-
ret/ vil Vngemachs vnd Widerwertigs
außſtehen muß/ wie mir ſolches ſelbſt be-
gegnet iſt/ Doch ſtehet ſolches bey eines
jeden Gefallen/ ob einer vmb Gottes
willen etwas leiden woͤlle oder nicht.
Demnach offtgemelter Pilger zu
Landt getretten/ ſo ſollen ſie ſich baldt
bey der Doggana (ſo zu nechſt dem Poꝛt
gelegen) anmelden/ jre Sachen beſehen
laſſen/ die Gebuͤrnus darnon bezahlen/
auch alsdann dieſelben auff Camel la-
den/ vnnd ſich mit Eſel zu jhrer Reutte-
rey verſehen/ deren vmb die Bezahlung
alldort genug zufinden.
Beynebens ſolle aber nicht vergeſſen
werden/ daß ſich die Geſellſchafft fein
beyſam halte/ jhre beladne Camel nicht
von ſich laſſen/ vnd alſo in jhre Herberg
einziehen/ allda ſie ſich alßbald bey dem
Con-
Conſul anmel den/ vnnd denſelben vmb
Protection bitten ſollen/ deſſen er ſich
zweyffels ohne gar nicht weigern wir-
det.
Demnach ſoll ſich die Geſellſchafft
bey dem Wirth (ſo in dem Fontico won-
hafft) anmelden/ vnd mit jhm von Per-
ſon zu Perſon/ wegen Eſſen/ Trincken/
vnd Ligerſtatt accordieren. Wann ſol-
ches verꝛicht/ mag ſich alsdann ein jeder
zu deſſen Gelegenheit/ bey dem jenigen
anmelden/ deme er commendiert wor-
den/ mit jme ſeine negotia tractieren.
Es ſuchen gleichwol viel Peregrini
bey den Franciſcaner Bruͤdern Her-
berg/ ſo alldort zu Tripoli wonhafft/
welche aber nit ſo wol/ als inn dem Fon-
tico (wie leichtlich zuerachten) tractiert
werden/ Hergegen aber ſo iſt bey gemel-
ten Bruͤdern mehr Ruh vnnd Gelegen-
heit der Andacht vnnd Gottesdienſt zu-
finden/ Stehet derowegen in eines jegli-
chen Willen/ bey welchem theil er loſie-
ren woͤlle.
So nun die Pilger etliche Tag in der
Stadt Tripoli geraſtet/ ſollen ſie vnder
deſſen bedacht ſeyn/ wie ſie jre Raiß nach
Hieruſalem anſtellen woͤllen. Derowe-
gen ſo mag ſich die Geſellſchafft (welche
beſſer vnder zehen/ als vber zehen Per-
ſon ſeyn ſolten) bey den Bruͤdern Sanct
Franciſci/ ſowol auch bey den Kauffleu-
then/ allda anmelden/ vnnd ſich wegen
eines getrewen Truziman oder Tolmaͤt-
ſchen erkuͤndigen/ auch lieber einen Tuͤr-
cken/ als einen Chriſten/ brauchen/ die-
weil die Tuͤrcken allda mehr Freyheit/
auch gemainiglich auffrechter vnnd ge-
trewer/ als die darinnen geborne Chri-
ſten/ wie ichs ſambt meiner Geſellſchafft
genugſamlich/ vnd mit vnſerm Scha-
den erfahren.
Wann nun die Geſellſchafft zu Tri-
poli einen guten Truziman erfraget/
vnd mit jhme wegen ſeiner verꝛichtung/
Coſt vnd Zehꝛung/ von Tripoli biß nach
Hieruſalem/ vnnd wider zu ruck/ accor-
diert/ ſo ſollen ſie alsdann gantz fleiſſige
Nachfrag vnd Kundtſchafft bey denen
alldort wohnenden Franciſcanern vnd
Kauffleuthen einzihen/ wegen eines gu-
ten/ auch lieber wolbekanten Tuͤrcken/
als Chriſten Schiff/ vnd ſolches folgen-
der geſtalt/ als nemblich/ damit das
Schiff nicht zu alt vnd vntauglich/ oder
gar new/ alſo/ daß es noch nie kein Raiß
gethan/ ſonder beyder diſer Mittel/ daß
ſolches wol beſeglet/ mit Schiffleuthen
genugſamlich verſehen/ ein wolbekand-
ten Patron darauff habe/ vnnd anderm
mehrem/ ſo zu dieſem Handel von noͤh-
ten/ prouidiert ſey.
Obwol (wie mir gar nicht zweiffelt)
alßbald etlich Schiffpatron/ die man in
jhrer Sprach Raͤiß nennet/ ſich bey den
Peregrinis anmelden/ vnnd ein jeder
ſein Schiff fuͤr das beſte loben vnnd her-
fuͤr ſtreichen wirdt/ ſo iſt jhnen doch hier-
innen nichts zuglauben. Deßhalben ſo
ſollen die Peregrini zween auß jhrer Ge-
ſellſchafft/ die ſie am tauglichſten zuſeyn
vermeynen/ neben andern zweyen ver-
ſtendigen Kauffleuthen/ erbitten/ dar-
mit dieſelben ſich zu dem Port verfuͤgen)
vnd die Schiff nach Notturfft beſichti-
gen/ auch inn kein vergeſſenheit ſtellen/
ſich in die vnderſten Boͤden der gemeld-
ten Schiff zuuerfuͤgen/ vnd gut achtung
auff den Geſchmack der Sentina zuge-
ben/ dann je vbler der Geſchmack/ je vol-
kommener vnd ſicherer iſt das Schiff.
So nun gemelte Geſandte jhres er-
achtens eins oder mehr tauglichs Schiff
gefunden/ ſo moͤgen ſie ſich mit denen
Schiffpatronen oder Raͤiß widerumb
zu jhren Geferten verfuͤgen/ vnd jhnen
die Sach/ wie ſie geſtalt/ anzeigen/ auch
jre meynung daruͤber vernemmen.
Wann alsdann die Compagnia mit
einem deren Schiff fortzuraiſen in wil-
lens/ moͤgen ſich dieſelben entweder bey
dem Vicario Ordinis S. Franciſci, oder
aber bey einem deren Conſulem (ſo ſie an-
derſt demſelben recommedirt worden)
anmelden/ vnnd ein oder andere Par-
they freundtlich erſuchen/ damit ſie an
ſtatt/ vnnd in beyſeyn dero nit allein mit
gemeldtem Raͤiß/ wegen deß Fuhrlohns
von Tripoli biß auff Zaffo woͤllẽ ſchlieſ-
ſen/ ſondern auch die Sachen dahin rich-
ten/ damit ſich gemelter Raͤiß/ inn bey-
ſeyn etlicher Chriſten vnd Tuͤrcken Zeu-
gen Schꝛiefftlich verobligier/ an keinem
Orth der Geſellſchafft willen zuwider/
anzufahren/ ſondern in dem Port Zaffo
nach vergleichung der Sachen/ ſo viel
Zeit oder Tag zuuerharꝛen/ auch kein
Kauffmanſchafft noch andere Wanders
leuth/ wider der Peregrin willen in das
Schiff zunemmen.
Weitter auch/ ſo es ſich zutruͤge/ daß
die Peregrin vmb zween/ drey/ oder
mehr Tag vber den beſchehenen Con-
tract zu Hieruſalem verbleiben wurden/
daß er der Raͤiß verbunden ſeyn ſolle/ der
Peregrinen Ankunfft zuerwarten/ vnnd
ehe nicht abzuſchiffen/ biß es denen Pil-
gern gefellig.
Es woͤlle auch die Geſellſchafft der
Raͤiß nicht zuvil Gelts voran hinauß
geben/ dardurch ſie dann verurſachen
wuͤrden/ daß gemeldter Raͤiß was boͤſes
ſtifften/ vnnd die Herꝛn Peregrini betruͤ-
gen moͤchte.
Dieweil nun etwas wenigs von dem
Schiffpatron vermeldet worden/ ſo iſt
auch meines erachtens nicht zuuergeſſen
vnnd vnuermeldt zulaſſen/ etwas von
dem Schiff/ auch folgender Meerꝛaiß
vnd darzu gehoͤrigen Sachen anzudeu-
ten.
Jſt derohalben erſtlich vnd ſonders
von noͤhten/ daß ein jeder Peregrin vor
allen dingen ſich Gott dem Allmechti-
gen befehlen thue/ vnd folgents mit ſo
hoher Patientz ſich verſehe/ als jmmer
muͤglich/ vnnd er die zeit ſeines Lebens
gebraucht.
So nun die zeit deß hinwegraiſens
vorhanden/ vnd die Peregrini von Tri-
poli nach Hieruſalem endtlich zuraiſen
in willẽs/ ſo were mein einfeltiger Raht/
daß allezeit drey oder vier gutte Freundt
ſich vereinigten/ auff gleichem Theil
mit einander zuſpendieren/ darzu dann
von noͤhten ein wol vermachte Truhen/
in welche ſie jr Notturfft legen vnd ver-
wahren koͤnnen.
Dieweil auch die jetzt gemelten Schiff
vilerley vnd vnderſchiedliche Paꝛtheyen/
darneben auch kein gelegenheit einer or-
dinari Tafel noch Ruchel vorhanden/ ſo
iſt derohalben nicht von noͤhten/ vilerley
eſſende Speiß mit ſich zunemmen/ ſo deß
Fewers oder kochens beduͤrffen/ ſonder
man kan ſich mit folgenden Victualien
betragen/ auch villieber etwas zuvil/ als
zuwenig mit ſich zunemmen.
Folgen die Victualien.
Als nemblich: Brodt/ Wein/ Waſſer/
Biſcoten/ Zerualadi/ Schweinen Ham-
men/ geſelchte Ochſenzungen/ Butter/
oder Schmaltz/ Reiß/ Linſen/ Bonen/
Eſſig/ Oel/ Kaͤß/ Zwifel/ Knoblauch/
Pomerantzi/ Granati/ Ziweben/ Man-
del/ ſonderlich aber Zucker/ vnd geſtoffen
Zimmet/ vndereinander vermiſcht/ auff
daß/ wann ſich einer auff dem Meer er-
was vbel vnnd vnluſtig befindet/ er ein
Trieth zurichten moͤgen/ welches einem
ſehr groſſe Staͤrck vnd Krafft gibt. Weil
aber die Zimmet/ wie auch vaſt alles ge-
wuͤrtz an jhm ſelbſt hitzig/ ſolle ein jeder
gut achtung auff ſich geben/ darmit er
deſſen nicht zu vil gebrauche/ ſondern nur
in hoͤchſter noht dauon genieſſe.
Ein Julep mitzunemmen iſt auch
nicht vnrathſam/ weil die Hitz derſelben
Orten zimlich groß/ vnd der Jnnlaͤndi-
ſche Wein ſehr ſtarck/ mit welchem einer
den Durſt nicht leichtlich loͤſchen kan/
das Waſſer auch ſo mitgefuͤhrt/ gemey-
niglich ſtinckend/ oder ſonſt gar ſchlecht/
Damit nun einer ſich etwas erfriſchen
kan/ ſo mag er ſich deß obgemelten Julep
gebrauchen.
Die Kleydung belangent/ ſtehet ſol-
ches inn eines jeden gefallen/ ob einer
ein Peregrin Kleydt/ oder Griechiſch
Kauffmanns Kleydt nach Hieruſalem
gebrauchen woͤlle/ Jedoch halte ich fuͤr
rathſamer vnnd gebraͤuchiger/ gemeldte
Raiß inn einem Peregrin/ als anderm
Kleyd zuuerꝛichten.
Welchem auch gefellig/ ſein habende
Madratzen vnnd Engliſche Decken mit
ſich zunemmen/ der kan ſolches vnuer-
hindert thun/ allein daß er dieſelb/ nach
der Ankunfft inn den Port Zaffo/ dem
Raͤiß in beyſein deß Trutzimanns biß zu
ſeiner Widerkunfft von Hieruſalem zu-
behalten gebe/ vnnd in dem vbrigen die
Gedult walten laſſen.
Ob villeicht noch andere mehr Sa-
chen mitzunemen dienſtlich/ hab ich ſol-
che kurtzhalben nicht melden/ ſondern in
die Beſcheidenheit deß Peregrins ſetzen
woͤllen.
Wofern einer vonn Hieruſalem wi-
derumb auff Tripoli zuruck verꝛaiſen
wolte/ wie es gemeiniglich beſchicht/ vñ
derſelb villeicht Wechſelbrieff/ oder vil
Gelts bey ſich/ wil ich denſelben gewar-
net haben/ daß er vber viertzig oder
fuͤnfftzig Ducaten in Gold/ von Tripoli
nach Hieruſalem nicht mit nemme/ da
er anderſt denſelben Weeg auch wider-
umb zuruck raiſen thut/ dieweil groſſe
Gefahr/ dieſelben zuuerlieren/ vorhan-
den.
Wem aber einer ſein vbriges Gelt
alldort zu Tripoli/ vor ſeinem verꝛaiſen
nach Hieruſalem/ zubehalten geben ſol-
le/ demſelben weiß ich kein gewiſſen Weg
fuͤrzuſchreiben/ allein er moͤcht es ſeinem
Kauffmann/ deme er recommendieret
woꝛden/ oder einem andern gewiſſen
Kauffmann/ welcher jhme ein gnugſa-
me Sicureza deßwegen thet/ zubehal
ten geben.
Jch aber habe weder einem oder dem
andern trawen woͤllen (wie ich meines
erachtens zum beſten gethan) ſondern
hab mein Gelt in der Franciſcaner Be-
hauſung alldort zu Tripoli/ vnder einer
Stiegen vergraben/ hab aber alsbaldt
nach meinem verꝛucken ſolches Ort all-
da ich das Gelt verſteckt/ einem meinem
vertrawtiſten Mitgeferten/ deſcribiert
vnd angezeigt/ damit/ wo ich villeicht
auff ſolcher meiner Raiß geſtorben/ oder
in ander Vngluͤck kommen were/ er/ ge-
meldter mein Geferth/ ſolches Gelt alß-
dann widerumb zu ſich nemmen hette
moͤgen.
Ob ich gleichwol noch einmal mein
Gelt vergraben/ als ich vonn Alepo nach
Antiochiam verꝛaiſt bin/ ſo wil ich doch
keinen dahin geleytet haben/ mir in die-
ſem fall nachzufolgen.
Hieneben iſt aber einem jeglichen
Pilger vonn noͤhten/ daß er vor ſeinem
verꝛaiſen von Tripoli/ vier oder fuͤnff
Ducaten vmb kleine Tuͤrckiſche Muͤntz/
als Maidini vnnd Aſperi/ auffwechßle/
damit er auff ſeiner Raiß zuſpendieren
habe.
Wann dann nun die Peregrini all-
dore zu Tripoli allerdings zu der Raiß
fertig/ ſo moͤgen ſie die kleinen Efel zu
jhrer Gelegenheit beſtellen. Auch einen
oder zween Janitſchaͤrn zu mehꝛer Si-
cherheit mit ſich biß zu dem Schiff nem-
me/ auffdz ſie deſto ſicherer vor den Tuͤr-
cken vnd Mohren dahin raiſen moͤgen.
Alsdann vnnd ſo ein jeglicher durch
Muͤhe vnd Arbeit (wie es dann nicht an-
derſt zugehet) mit ſeinen Sachen in das
Schiff kommen/ ſo ſolle ſich ein jeder/
nicht allein GOtt dem HErꝛen befeh-
len/ ſondern auch gantz dienſtlich gegen
ſeinen Mitpilgern vnd Geſellen verhal-
ten/ Jnſonderheit aber gegen denen/ ſo
vbel auff vnd kranck ſeynd/ dieweil die-
ſelben deß Dienſts mehrers/ dann ande-
re/ beduͤrffen/ dann es iſt keiner vnder al-
len verſichert/ daß jm nit auch ein kranck-
heit oder Vngluͤck zuhanden ſtoſſe.
Vnnd ſo es ſich begebe/ daß ſolches
Schiff in Cypro anlendet/ oder ſonſten
an dem Landt lauierte/ ſo ſoll ein jeder
gut achtung geben/ damit ſich keiner zu
weit in das Landt begebe/ die weil die
Jnnwohner alldort denen
Chriſten ſehr ge-
faͤhrlich.
NAch verꝛuckung auß der Jn-
ſel Cypro/ vnd Ankunfft inn
den Port Baffo/ Jaffa/ Zaf-
fo oder Jopen/ wie man dann
dieſes Orth vnderſchiedlich nennet/ ſo
woͤllen die Peregrini ohne langen Ver-
zug/ jhren Truziman zu Landt tretten
laſſen/ auffdaß er alsbaldt einen vonn
dem Landtvolck/ zu dem Sotto Baſſa
auff Rama ſchicken/ vnnd jhme der Pil-
ger Ankunfft anzeigen/ auch vmb Ge-
lait anhalten/ vnd darneben die noth-
wendigen Eſel ſo zu dieſer Pilger Raiß
vnnd Reutterey von noͤhten/ beſtellen
woͤlle.
Welches ſo es geſchehen/ auch die
Peregrini das Gelait vonn dem Satto
Baſſa zu Rama vberkommen/ ſo woͤllen
dieſelben jhre vbrige Prouiant/ ſo jhnen
auff die Landt Raiß nit dienſtlich/ auff
das beſte verwahren/ vnd dieſelbe jhꝛem
Raͤiß oder Schiffpatron/ biß zu dero
Widerkunfft von Hieruſalem/ zubehal-
ten geben. Das vbrig aber/ ſo einem jeg-
lichen Peregrin auff die Raiß von noͤh-
ten/ als ein Hemmet/ ein Leinen baar
Hoſen/ vier oder fuͤnff Saluet/ ein Ro-
ſenkrantz oder Pater noſter/ ein Bett-
buch/ ein Schreibtafel/ Feder/ Dinten/
Pappir/ vnnd was einem ſonſt gut dun-
cket. Solches alles ein jeder in die zween
obbemeldten Haͤren Saͤck wol verwar-
ter einmachen/ auch dieſelben auff ſein
Eſel hengen/ vnnd folgents darauff ſi-
tzen ſolle.
Welcher auch gern etwas ſaͤnffter
dann die andern reutten will/ der mag
ein Trumb oder ſtuck von einem Strick
mit ſich nemmen/ darauß er jhm Steg-
raiff zu der ſtattlichen Reutterey ma-
chen vnnd zurichten kan/ dieweil einer
weder Zaumb noch Stegraiff/ ja auch
kaum ein Stroͤern Sattel allda finden
wirdt/ Doch woͤlle ein jeder Achtung ge-
ben/ daß er die Stegraiff nicht ehe auff
den Eſel lege/ als ſo er gleich auffſitzen/
vnd ſeinen Weeg fortreitten wille/ auch
alsbaldt er widerumb abgeſeſſen/ ſolle er
dieſelb alsbaldt widerumb zu ſich nem-
men.
Es iſt auch gut achtung zugeben/
daß ein jeglicher voꝛ denen Arabiern vnd
Mohren/ nicht das wenigiſte von ſeinen
Sachen/ als Meſſer/ Compaß/ Petten/
vnd anders dergleichen/ ſehen laſſe/ die-
weil es einem alsbald von jhnen mit Ge-
walt genommen/ vnd nimmermehꝛ zu-
geſtelt wirdt/ dann alsbald ſie was er-
tappen/ lauffen ſie daruon.
Vorher hette ich gleichwol melden
ſollen/ daß ein alter vnd wolhergebrach-
ter Brauch bey denen Peregrinis gewe-
ſen/ daß alsbald ſie vonn dem Meer ab-
geſtanden/ vnnd auff das heilig Landt
zu Zaffo getretten/ ſie alsbaldt auff jhre
Knie vnd Angeſicht gefallen/ G OTT
dem HERRN gedanckt/ daß ſie mit
deſſen Gnad vnd Huͤlff das heilige vnd
gewuͤnſchte Erdtreich erꝛaichet haben/
haben auch daſſelbe mit Andacht gekuͤſ-
ſet/ Stehet alſo diſe demuͤtige erzeigung
in der Geſellſchafft/ vnd eines jeden ab-
ſonderlich willen vnd gefallen.
Nach ſolchem verꝛichtem Gebett/ ſo
ſolle ein jeglicher ſein Sachen zu Zaffo
an dem Geſtatt deß Meers durch den
Lemino (welcher gleich wie ein Maut-
ner) vnnd andern darzu verordtneten
Perſonen/ beſehen laſſen/ auch den gebuͤ-
renden Zoll daruon bezahlen.
Was aber den Sotto Baſſa zu Ra-
ma betrifft/ muß man denſelben inſon-
derheitbezahlen. Vnd als ich in dem
1587. Jahr alldort geweſt/ gab ein jegli-
cher Peregrin fuͤr ſein Perſon dem Sot-
to Baſſa ein Ducaten in Gold/ dem Le-
mino aber vñ den ſeinigẽ ein gut Trinck-
gelt/ wie ſie dann ſolches zubegeren nicht
vergeſſen.
Wann nun diß auch verꝛicht/ ſo wer-
den den Pilgern vmb jhre Bezahlung/
(welche erſt zu Rama beſchicht) kleine E-
ſelein zugefuͤhꝛt/ auff welchem ſie vnder
deß Sotto Baſſa Quardia nach Rama
raiſen koͤnnen/ welches vngefehrlich 12.
Welſche Meilſeyn.
Auff ſolchem Weg/ wie mir dann
gar nicht zweiffelt/ werden die Eſeltrei-
ber oder Mucari (wei man ſie inn jhrer
Sprach nennen thut) bey den Peregri-
nen offt vnnd viel vmb Trinckgelt oder
Corteſia anhalten (welches ſie Corcaſia
zunennen pflegen) deßwegen ſo ſolle ſich
keiner ſehr waigeren/ ſeinen Mucaro
zwey oder drey Maidini zuſchencken/
wofern einer anderſt von jhm nicht auff
das vbelſt tractiert werden will/ wie ich
es ſelbſt zimlich wol mit meinem Scha-
den erfahren/ Dann als ich kein klein
Gelt bey mir gehabt/ damit ich meinen
Mucaro contentieren moͤgen/ welcher
ohne vnderlaß die Corcaſia zubegeren
nicht abgelaſſen/ vnnd ich jhme/ wie ge-
meldt/ auß mangel der kleinen Muͤntz/
nichts zugeben gehabt/ vnd ſein/ er auch
dagegen mein Sprach nit verſtanden/
hat er mich ſehr offt vnnd hart/ ehe wir
auff Rama kommen/ mit einem Pfeil
geſtochen/ vnd ſonſt vbel tractiert.
Es werden offtgemeldte Peregrini
nicht ſobaldt auff Rama in jhre Herberg
ankom̃en (welche aber mehr einen Stall
oder Gefencknus/ als andern zuuerglei-
chen) daß ſie nicht alßbaldt Chriſten all-
dort finden werden/ ſo man Noſtrani oder
Marionity oder auch Chriſtiani della Cin-
tura nennen thut/ welche ſich offerieren
werden/ denen Pilgern/ vmb jhr Bezah-
lung/ zudienen/ Derowegen ſo moͤgen
die Peregrini mit gemelten Maroniten
handlen/ damit ſie jhnen/ vmb die Be-
zahlung/ allerley gekochte Speiſen/ auch
Fruͤcht/ ſo derſelben Orten zimlich vor-
handen/ bringen/ doch woͤlle ſich ein jeg-
licher/ ſouil muͤglich/ fuͤr den Fruͤchten/
innſonderheit aber vor den Angurien/
huͤten.
Obwol der Wein beſſer als das Waſ-
ſer/ ſo iſt doch ſolcher zu Rama nicht al-
lein ſchwerlich zubekommen/ ſondern
auch an jhme gar ſchlecht vnd truͤb. De-
rowegen ſich die Geſellſchafft per forza
deß Waſſertrinckens halten/ auch bey-
nebens inn acht nemmen muß/ daß
in obgemeldtem Spittal zu Rama ein
Ciſtern/ deren Waſſer gleichwol zimlich
friſch/ doch nicht zum beſten geſundt/
dieweil die Tuͤrcken ſolches Ciſternwaſ-
ſer mit vngeleſchtem Kalch offtermals/
(auch zu der zeit als ich darinn geweſt)
vergifft haben/ derowegen ſo iſt raht-
ſamb/ einem Maroniten einen oder
zween Maidini zugeben/ auffdaß er
ein gutes Trinckwaſſer hole/ Ebenmeſ-
ſiger geſtalt ſoll es mit dem Waſſer zu
Zaffo gehalten werden/ dieweil der eine
Brunn/ ſo am Geſtatt deß Meers geſal-
tzen/ der ander Brunn hergegen aber/ ſo
auff dem Berg gelegen/ hat zimlich gut
Trinckwaſſer.
Die Ligerſtaͤtt zu Rama belangent/
ſeynd alldort weder Federbett noch Ma-
dꝛatzen zufinden/ ſondern allein Store/
oder Doͤcken/ von jeder deren muß man
ein Nacht zween oder drey Maidini be-
zahlen.
Doch wirdt ſolche harte Ligerſtatt
etlichen andaͤchtigen Peregrinen ſanff-
ter thun/ als ob ſie zu Hauß in einem
guten Federbett ruheten/ allein daß ſich
etwo vnder den weiſſen Floͤhen ein Krieg
vnd Rumor erhebte/ dardurch der ſanff-
te Schlaff verhindert wuͤrde. Derowe-
gen ſo iſt von noͤhten die Rumoriſchen
Geſellen vmb jhre Vnzucht zuſtraffen/
vnd dieſelben auß den Kleydern zu ban-
diſiern.
Es iſt auch hoch von noͤhten/ daß
ſich die gantze Geſellſchafft eines gewiſ-
ſen Tags jhꝛes hinweg raiſens entſchlieſ-
ſen/ vnnd embſig bey dem Sotto Baſſa
alldort zu Rama vmb die erlaubnus an-
halten.
Vnder deſſen aber ſolle ſich die gantze
Compagnia verſamblen/ vnnd vnder
jhnen einen Spenditor erwehlen/ wel-
cher denenſelben am tauglichiſten zuſeyn
geduncken wirdet/ Solchem Spenditor
ſolle ein jeglicher Peregrin ſo in der Ge-
ſellſchafft/ drey Zecchini oder Ducaten
geben/ einen in Gold/ vnnd die zween in
Maidini/ damit gemeldter Spenditor
von Rama biß auff Hieruſalem die Mu-
caros vnd Arabier (welche die Peregri-
nen auff der Straſſen/ vnd ſonderlich in
dem Gebuͤrg/ hauffenweiß anlauffen)
zufrieden ſtellen moͤge.
Von Rama biß auff Hieꝛuſalem iſt
meiner zeit der Brauch geweſt/ daß man
einem Mucario von einem Eſel ein hal-
ben Zecchin bezahlet hat/ Gleichsfals
zahlete vnſer jeglicher den Oberſten der
Arabier fuͤr ſein Perſon auch ein Zec-
chin im hin/ vnnd ein Zecchin im her-
raiſen.
Diſer nun/ ſo zu einem Spenditoꝛ er-
wehlet/ ſolle das Gelt nit in einem Beut-
tel beyſam̃en/ ſondern im Schwaißtuͤch-
lein vnd hadern hin vñ wider verknuͤpf-
fet/ fuͤhꝛen/ auch nicht vil auff einmal ſe-
hen laſſen.
Es were auch ſehr nuͤtzlich/ ſo gemel-
ter Spenditor auff das wenigiſte biß
auff dreyſſig oder viertzig Moͤhriſch oder
Arabiſch zehlen kuͤndte/ damit er ver-
ſtuͤnde/ wieuil der Mohren oder Arabier
Anforderung/ vnd er nicht den bloſſen
Woꝛten deß Truzimans glauben muͤ-
ſte/ welche bißweilen Vortheiliſch mit
den Sachen handtlen. Derowegen/ ſo
hab ich/ neben etlichen Arabiſchen oder
Moͤhriſchen Worttn/ auch dero Zahl
verzeichnet/ wie zu ende diſes Buͤchleins
zuſehen.
Von Rama biß auff Hieruſalem iſt
kaum das Trinckwaſſer zufinden/ vmb
ſouiel weniger ein Wirtshauß vndter-
wegen zuuerhoffen/ vnd derhalben von
noͤhten/ daß ſich ein jeder Pilger zu Ra-
ma mit Speiß verſehe/ vñ dieſelbe wol-
uerwahrter/ mit ſich fuͤhre/ auffdaß er
vnderwegen nicht frembde vnd vnhoͤf-
liche Gaͤſt vberkomme/ die weder das
Bene-
Benedicite oder Gratias ſprechen/ ſonder
wie die hungerigen Woͤlff ſolche Spei-
ſen verſchlicken.
So nun die zeit kommen/ daß die
Peregrini Erlaubnus erlanget/ vonn
Rama auff Hieruſalem zuraiſen/ ſo ge-
ſchicht gemeiniglich der Auffbruch bald
nach Mitternacht/ wegen der groſſen
Tagraiß/ ſo ſich vaſt in die acht Teutſche
Meilen erſtrecket. Derowegen/ ſo woͤlle
ſich ein jeder mit Andacht zu der Raiß
beraiten/ vñ voꝛ dem Geſchꝛey der Moh-
ren kein Entſetzen haben/ auch ſein Sa-
chen auff das beſte inn die zween haͤrene
Saͤck (welche ich vormals deſcribiert)
einmachen/ vnnd dieſelben keines weges
vonn ſich laſſen/ ſondern auff ſeinen zu-
geeigneten Eſel legen/ vnnd alsbaldt
darauff ſitzen/ auch ſich nicht leicht vonn
ſolchem begeben/ er werde dann vonn
demſelben herunder gezogen oder ge-
worffen/ wie ſich dann ſolches leichtlich
zutregt/ vnd mir beſchehen/ daß ich (mei-
nes behalts) zum vierdtenmahl abge-
worffen worden/ habe aber gleichwol/
meine Sachen niemals vonn mir gelaſ-
ſen/ vnd nichts daruon verlohren.
Nicht weit von Rama iſt ein zerbro-
chen Gebaͤw/ welches man das Schloß
deß frommen Schachers nennet/ allda
hat der Arabier Koͤnig ſeine Wohnung/
welcher alsbald mit etlichen der ſeinigen
zu Roß denen Peregrinis begegnen/ vnd
ſein Bezahlung begeren wirdt/ die jhme
ohne alle Waigerung (da er dieſelbe nit
vorher zu Rama empfangen) geraicht
muß werden. Vnnd obwol der Brauch
vor diſem geweſt/ daß jme von jeglichem
Peregrin ein Zecchin inn dem hin/ vnnd
ein Zecchin inn dem herꝛaiſen/ geraicht
worden/ ſo hat er doch/ als ich mit mei-
ner Geſellſchafft allda war/ damit nicht
content ſeyn woͤllen/ ſondern haben jhme
noch ein Trinckgelt darzu geben muͤſſen.
Obwol jetzt gemelter Koͤnig vnnd
deſſen Diener denen Peregrinen etwas
frembd vnd abſchewlich fuͤrkommen vñ
erſcheinen werden/ ſo ſeynd ſie doch ge-
gen denen andern Arabiern (ſo ſich inn
dem Gebuͤrg/ zwiſchen Rama vnd Hie-
ruſalem/ auffhalten) gantz fein vnd hoͤf-
lich zuachten/ mag derowegen ein jegli-
cher betrachten/ was ſolche fuͤr Adeliche
Caualieri ſeynd/ iſt alſo gegen diſen Leu-
then/ neben der Verwunderung/ kein
beſſer Waffen vnd Wehr zugebrauchen/
als die Patientia, vnd einen offenen Beu-
tel zuhaben.
Weil nun/ wie gehoͤrt/ die Arabier
in dem Gebuͤrg/ zwiſchen Rama vnnd
Hieruſalem/ die Pilger hauffen weiß an-
lauffen vnnd rancionieren/ auch gemey-
niglich der Pilger/ ſo voran reittet/ von
jhnen vbler als die andern gehalten/ der
letzte aber/ wie es wol mehr beſchehen/
von der Geſellſchafft abgeſondert vnnd
gar gepluͤndert woꝛden/ Deßwegen/ ſo
woͤlle die Geſellſchafft gut achtung ge-
ben/ damit ſie ſich fein beyſammen hal-
te/ vnd keiner den andern verlaſſe.
Was ſich weitter auff ſolcher Raiß
alles zutregt vnnd zu derſelben von noͤh-
then kan ich nicht alles in ſpecie beſchrei-
ben/ Wirdt derowegen ſich ein jeder zu
gubernieren/ vnnd ſeinen Verſtandt hie-
rinnen zugebrauchen/ vnd mehrern Be-
richt einzuziehen/ wiſſen/ auch beynebens
der Gedult nicht vergeſſen.
Jn dem Thal Terebinto pflegen die
Peregrini gemeiniglich zuraſten/ vnnd
allda zu fruͤntalen/ derowegen ſo woͤlle
ein jeglicher Peregrin ſein mitgenom̃en
Prouiſion allda genieſſen/ doch alſo/ da-
mit deſſen die Arabier nicht gewaͤr wer-
den/ dann dieſelben alsbald vngebetner
zu Gaſt kommen/ auch ſich alſo hoͤflich
verhalten/ als ein junger Hundt gegen
ſeiner Mutter.
Alßbald die Mucari auß gemeldtem
Thal auffzubrechen geruͤſt/ ſo woͤlle ſich
ein jeder Peregrin ohne verzug zu ſei-
nem Eſel verfuͤgen/ vnd mit nichten auff
eines andern Eſelſitzen/ wofern er nicht
abgewoꝛffen werden/ vnd Baſtonaden
bekommen wil.
So nun die Peregrini die hoͤhe er-
reicht/ von welcher man die heilige vnd
gewuͤnſchte Stadt Hieruſalem ſehen
kan/ ſo woͤlle alsbald ein jeder Peregrin
von ſeinem Eſel abſtehen/ vnd mit de-
muͤtigem Hertzen auff die Knie nieder
fallen/ GOtt dem HERRN groß Lob
vnnd danck ſagen/ daß er jhne friſch auch
geſunt dahin gelait/ vnnd das Orth zu
ſehen vergunt/ welches viel Koͤnige zu-
ſehen begeret/ aber ſolches nicht erlangen
moͤgen.
Nach verꝛichtem Gebett/ ſollen vnd
muͤſſen alle Peregrini biß zu der heiligen
Stadt Hieruſalem/ zu fueß gehen/ vnnd
vor derſelben Stadt Porten warten.
Alsbald mehꝛgemeldte Pilger zu der
Stadt Hieruſalem kommen/ ſo ſollen ſie
ohn allen verzug den Truzimann/ oder
einen Mucaro/ in die Stadt zu dem Pa-
ter Guardian/ Franciſcaner Ordens/
ſchicken/ vnnd demſelben jhre Ankunfft
anzeigen laſſen/ darauff ſo wirdt ſich
gemelter Guardian zu denen Peregri-
nen eylends verfuͤgen/ auch dieſelben
ſamentlich gantz freundtlich empfahen/
Vnd obwol obbemelter Quardian kei-
nen Gewalt hat/ einigen Peregrin zu der
erſten ankunfft in der Stadt Hieruſalem
ohne Erlaubnus der Tuͤrckiſchen Ob-
rigkeit/ zufuͤhren/ ſo wirdt er doch bey
dem Sangiaco allen muͤglichen fleiß an-
kehꝛen/ damit die Peregrini auff das ehi-
ſte eingelaſſen werden.
Darauff ſo kombt der Sangiach/
oder andere darzu gehoͤrende Leuth/ zu
beſichtigung der Pilger vnd jhrem mit-
gebrachten Plunder vnd habenden Sa-
chen. Jſt derowegen von noͤhten/ ſo ei-
ner etwas von Silber oder Gulden klei-
noden/ Pater noſter, Agnus Dei, Com-
paß/ Meſſer/ oder andern dergleichen
Sachen/ hette/ daß er ſolches bey ſich
fleiſſig verberge/ vnd nicht vnder die an-
dern Sachen lege/ dann vaſt zubeſorgen/
daß einem ſolches genommen. Was ei-
ner aber bey ſich/ daſſelb wird keinen ent-
zogen/ dieweil man die Pilger ſelbſt nicht
zubeſuchen pfleget.
Es werden auch allda aller Peregri-
nen Namen/ vnd deren Vaͤtter Tauff-
namen/ vnnd gar nicht die Zunamen be-
ſchrieben.
Wann nun ſolches alles fuͤruͤber/ ſo
fuͤhrt der Pater Guardian/ oder wen er
ſonſt entgegen ſchicket/ die Pilger auff
den Newerbawten Berg Syon inn ſein
Kloſter/ welches man Sanct Saluator
nennet/ darinnen ſie vonn dem gantzen
Conuent freundtlich empfangen/ auch
jhnen vonn demſelben alsbaldt die Fuͤß
gewaſchen/ vnnd mit Eſſen/ Trincken/
Ligerſtatt/ auch aller andern Notturfft/
verſehen werden.
Die Peregrini werden wenig zeit in
dem Kloſter ſeyn/ daß ſich nicht alsbald
der Sangiach anmelden/ vnnd den Zoll
von jeglichem abfordern wirdt/ Meiner
zeit/ im 1587. Jahr/ als ich darinnen
geweſt/ hat ein jeglicher fuͤr ſein Perſon/
wegen Einlaſſung in die Stadt Hieru-
ſalem/ zween Ducaten im Gold/ vnd fuͤr
den Eingang zu dem H. Grab/ neun
Zecchini bezahlen muͤſſen/ auſſer der
Franciſcaner Brüder/ welche frey/ vnnd
keinen Zoll bezahlen.
Wann nun gemeldter Pater Guar-
dian/ oder ein anderer Bruder auß dem
Kloſter S. Saluators denen Peregri-
nen die heiligen Orth jnner vnnd auſſer
der Stadt Hieruſalem zeigen vnnd wei-
ſen thut/ ſo woͤlle ſich die Geſellſchafft
fein zuſammen halten/ vnd wol achtung
geben/ auffdaß keiner zuweit vonn der
Geſellſchafft gerahte/ noch vil weniger
ſich vnderſtehe/ allein in der Stadt zu-
wandlen/ oder auch mit einem vnbekan-
ten ſich auſſer deß Kloſters finden zulaſ-
ſen/ da er anderſt nicht in groſſe Gefahr
gerahten wil/ Mit denen Bruͤdern aber
S. Franciſci iſt es zimblich ſicher/ jnner
vnnd auſſer der Stadt Hieruſalem/ zu
wandlen/ allein es ſich bißweilen begibt/
daß etwo einer/ oder der ander/ vonn de-
nen Türcken vnd Mohꝛen verſpott/ ge-
ſtoſſen/ geworffen/ geſchlagen/ oder inn
andere weg vbel tractiert wirdet/ ſo iſt
doch ſolches alles ohne Gefahr deß Le-
bens/ vñ ſol ein jeder daſſelbige gern vnd
mit Gedult leyden/ vmb vnſers Erloͤ-
ſers vnnd Seligmachers JEſu CHriſti
willen/ welcher allda nicht allein alle
Schmach/ Peyn/ vnd Marter/ ſondern
auch garden ſpoͤttlichen Todt vmb vn-
ſert wegen/ gern vnd willig gelitten.
So ſich aber einer vnder der Geſell-
ſchafft ſo gar vngedultig befuͤnde/ wel-
cher in oberzehlten Faͤllen nichts leyden
kuͤndte/ ſondern ſich zu der Gegenwoͤhr
ſtellen wolte/ vnnd einen der vnglaubi-
gen mit einem Straich verletzte/ ſolcher
wuͤrde nicht allein ſein Perſon/ ſondern
auch die gantze Geſellſchafft/ in Vngluͤck
bringen/ derowegen ſo heiſt es patientia
per forza.
Es haben jhr viel im brauch die hey-
ligen Oerter mit ſonderem Fleiß zube-
ſchreiben/ auch mit der Federn abzureiſ-
ſen/ vnd jre Naͤmen hin vnd wider auff-
zuſchreiben/ denen rahte ich/ daß ſie ſol-
ches auff das heimlichiſte verꝛichten/ ſo
jmmer müglich/ damit es weder von den
Tuͤrcken oder andern Vnglaubigen geſe-
hen werde.
Es iſt auch zuwiſſen/ daß inn dem
Tempel deß heiligen Grabs ſiben vnder-
ſchiedliche Religionen der Chriſten ſeyn/
als nemblich: Latini, Gręci, Armeni, Gof-
fiti, Indiani, Maroniti, vnd Suriani, wel-
che aber/ nicht allein inn dem Glauben/
ſondern auch in den Gemuͤhtern vnnd
Hertzen aneinander zuwider/ Derohal-
ben/ ſo villeicht einem oder anderm ge-
fellig/ in dem H. Tempel etwas abzureiſ-
ſen/ zubeſchreiben/ oder abzumeſſen/ ſo
woͤlle er ſolches nicht bey Tag/ (damit
es nicht vonn denen obuermeldten Chri-
ſten geſehen werde) ſondern bey der
Nacht verꝛichten.
Jch hette zwar auch die H. Oerter/ ſo
jnner vnnd auſſer Hieruſalem zu ſehen/
verzeichnen vnnd benennen ſollen/ Die-
weil aber die Bruͤder deß Bergs Syon
ohne das alle Ort (ſo allda zubeſuchen
ſeynd) den Pilgern zeigen/ auch mein
Tractaͤtl auff nichts anderſt/ als wie ſich
ein Peregrin auff ſolcher Raiß verhal-
ten ſolle/ geſtellet/ hab ich vmb der kuͤrtz
willen ſolches vnderlaſſen/ Beynebens
aber vier vnderſchiedliche Abriß deß H.
Grabs/ wie allhie zuſehen/ verzeichnen
woͤllen.
So nun die Kirchfahrter etliche tag
zu Hieruſalem verharꝛet/ vnnd die heili-
gen Oerter/ jnner vnd auſſer der Stadt/
ſo wol auch Bethlehem/ mit Andacht
beſucht/ vnd aber die zeit herbey kompt/
daß ſie widerumb jhren weg zuruck auff
Rama nemmen ſollen/ ſo woͤlle ſich ein
jeder bey dem Pater Guardian anmel-
den/ vnd von demſelben (ſeines alldort
ſeyn) ein ordentliche Kundtſchafft be-
geren/ ſo vnder deſſen Handſchrifft/ vnd
deß Conuents Petſchafft verfertiget
ſey.
Darneben auch inn kein Vergeſſen
geſtelt werden/ mehrgemeldten Bruͤ-
dern Ordinis ſancti Franciſci mildte vnd
reiche Allmoſen (nicht allein von wegen
der Herberg/ Coſt/ vnnd andern erzeyg-
ten Dienſten/ ſondern auch vmb Gottes
willen) mitzutheilen/ ſolches wird Gott
einen jeden widerumb genieſſen laſſen.
Sonſt pflegen etliche ſechs/ acht vnnd
mehr Zecchini/ nach eines jedem guten
Willen zugeben/ außgenommen/ ſie lieſ-
ſen ſich zu Rittern ſchlagen.
Wann nun die zeit/ wie obgemeldt/
vorhanden/ daß die Peregrini jhren Ab-
ſchied von Hieruſalem wider zuruck nach
Rama zunemmen/ geſinnet/ ſo iſt es
vonnoͤhten/ daß dieſelben widerumb nit
allein mit denen Eſeln vnd deren Trei-
bern/ ſondern auch mit Brodt/ Kaͤß vnd
gebtatenem Fleiſch/ verſehen werden/
damit jhnen auff ſolcher Raiß an Pro-
niant nicht gebreche. Mit dem Spen-
ditor vnd beduͤrfftigem Gelt aber/ ſolle
es ebener Geſtalt wie vor beſchehen/ ge-
halten werden.
Es iſt gleichwol ein Notturfft hie-
neben zumelden/ daß es gantz vnnon-
noͤhten/ auch etwas beſchwerlich/ daß
ſich ein jeder Peregrin abſonderlich im
hin vnnd herꝛaiſen/ mit mehrgemeldter
Profiant verſehen muͤſſe/ woferꝛ es einer
nicht auß ſonderbaren Vrſachen vnd Be-
dencken thun will.
Derohalben ſo were meinem Bedun-
cken nach/ vil beſſer/ daß etliche Geſellen/
deren doch vber fuͤnff oder ſechs beyſam-
men nicht ſeyn ſollen/ die Prouiant mit-
einander einkauffen/ vnnd daruon zu-
gleich zehrten/ auch dieſelbe auff jhren be-
ſtelten Eſel legten/ doch auch hieneben
gut achtung geben/ damit jhnen von de-
nen Mucaris nichts daruon verzucket
werde.
Diſes hab ich nur zu einer geringen
Notel andeuten woͤllen. Es mag ſich
derhalben ein jeder Pilger nach ſeinem
Gefallen/ Gelegenheit deß Orts vnd der
Zeit accommodiern.
Alßbaldt deß andern tags/ nach an-
kunfft auff Rama/ ſollen ſich die Pilger
durch jhren Truziman/ bey dem Sotto
Baſſa/ Sangiach/ Lemino/ oder wel-
chem das Guberno alda befohlen iſt/ an-
melden/ vnnd bey ſolchen vmb Erlaub-
nuß jhres Auffbruchs fleiſſig anhalten.
Allweil aber die Peregrini zu Rama
verharꝛen/ vnd auff jhren abſchied war-
ten/ ſo woͤllen ſie nit abgeſondert inn den
Flecken wandlen/ ſondern da es jhnen
gefellig die Gelegenheit deß Orts zube-
ſichtigen/ ſich fein beyſammen halten.
Vnd ſo jhnen der Termin jhres Ver-
ruckens kundt gethan/ mag ſich ein jeder
widerumb auff das zuruck raiſen nach
Tripoli/ mit Brodt/ Kaͤß/ gebratenem
Fleiſch/ harten Ayern/ vnnd Fruͤchten
verſehen.
Wie ſich aber ein jeder vonn Rama
auß/ biß auff Zaffo/ vnd folgents inn
dem zuruckſchiffen nach Tripoli/ ver-
halten ſolle/ wirdt ſolches ohne zweiffel
ein jeder Peregrin auff ſeiner kurtz dar-
uor gethanen Raiß wol gelernet haben.
Wann nun mehr gemeldte Pilger
mit gluͤck (welches einem jeglichen Gott
der Allmechtige verleyhen woͤlle) wider-
umb nach Tripoli de Soria ankommen/
vnd etliche vnder der Geſellſchafft vor-
handen/ welche wider zuruck nach Hauß
zuraiſen willens/ denen rahte ich/ daß
ſich ein jeder mit erſter Gelegenheit auff
den Weeg vnd die Raiß begebe. Da er/
wa auch in kuͤrtz die jenige Nauen/ dar-
auff einer inn Soriam kommen/ wider-
umb geladen hette/ vnnd zuruck ſchiffen
wolte/ ſo ſolle ſich ein jeglicher viel lieber
auff diſe/ dann auff ein andere frembde
begeben/ dieweil man mit verwechß-
lung der Nauen die Sachen ſelten ver-
beſſert.
Woferꝛ aber Gelegenheit vnd Schiff
vorhanden/ welche auff Malta oder Si-
cilia abzulauffen fuͤrhabens/ were (mei-
nes erachtens) ſolches die beſte Gele-
genheit/ zum theil die lange vnnd ver-
drießliche Meerfahrt zuflihen/ vnd zum
theil durch ſolche Gelegenheit Jtaliam
zu perluſtrieren.
Die andern Herꝛn Peregrini aber/
welche ein weittere Raiß zuuerꝛichten
fuͤrgenommen/ die moͤgen jhre ſachen/
ſo jhnen darzu vntauglich/ als Peregrin-
kleider/ Heiligthumer/ vnd andere einge-
kauffte Tuͤrckiſche Sachen/ die ſoll einer
in Pallen oder woluerwahrte Truhen
einmachen/ vnnd ſolche ſeinem vertraw-
ten Mitpilger/ (ſo widerumb von Tri-
poli zu ruck nach Venedig raiſen thut)
auffgeben/ oder ſo es einem gefelliger/
gemeldte Sachen/ ſeinem Kauff: oder
Wechſelherꝛn/ dem er zu Tripolirecom-
mendirt worden/ zuuͤberantworten/ da-
mit jme dieſelben auff ein ſicher Ort nach
Venedig/ oder andere Handelſtatt/ v-
berſchickt werde/ ſtehet ſolches zu eines je-
den gefallen vnd Wagnus.
Ohne zweiffel werden etliche Tag
fuͤruͤber lauffen/ ehe vnd zuuor die Pere-
grini gelegenheit von Tripoli zuuerꝛai-
ſen vberkommen. Jn diſer zeit aber/ ſo
moͤgen ſie den Berg Libanum/ vnnd an-
dere zunechſt vmbligende Orter/ beſich-
tigen/ doch daß ſie jederzeit mit einem o-
der zween Janitſchaͤrn/ auch andern be-
duͤrfftigen Leuthen/ verſehen ſeyn/ vnnd
iſt hieneben wol zuuermercken (da es ſeyn
kan) daß die Peregrini jederzeit den Jaͤ-
nitſcharen gebrauchen ſollen/ ſo in dem
Hauß die Quardi hat/ darinnen die Pe-
regrini allogiert ſeynd/ damit er auß
Neyd wegen eines frembden Jaͤnitſcha-
ren/ denen Pilgern nicht einen boͤſen boſ-
ſen mache.
SO nun villeicht etliche vndter
der Geſellſchafft/ welche nicht
mit jhren Gefehrten! wie ob-
nermeldt/ widerumb zu hauß/
ſondern noch weitter die gelegenheit der
Tuͤrckey beſehen wolten/ dieſelben ſollen
ſich zu Tripoli bey denen Venediſchen/
Frantzoͤſiſchen/ vnnd Engellendiſchen
Rauffleuthen wol erkuͤndigen/ zu was
zeit eigentlich ein Carauana von Tripo-
li nach Alepo/ oder andern/ jhme gefelli-
gen/ Orten verꝛaiſen ſolle/ alsdann ſo
mag ſich ein jeder/ nach Gelegenheit der
zeit/ mit den hinweg raiſenden Kauff-
leuten (ſo einer zu gefehrten zuhaben ver-
hoffet) bekandt machen/ ſich auch aller
notwendigen ſachen/ zu ſolcher Raiß ge-
hoͤrig/ bey jhnen erkuͤndigen/ vnd dieſel-
ben einkauffen. Jnſonderheit aber wol-
len ſich die Raiſenden vmb einen Jaͤnit-
ſcharen vnd Truziman (ſo denen Kauff-
leuthen wol bekandt) bewerben/ auch
darneben ſich mit guten Roſſen oder E-
ſeln verſehen/ vnnd wol achtung geben/
daß dieſelben nicht blind/ vntrew/ ſterig
vaſt vmb die Beyn gebraͤnt/ pockbei-
nig/ offen an den Knyen/ /oder Pletzen
auff den Augen haben.
Es ſolle auch die Geſellſchafft mit
den Jaͤnitſcharen/ Truziman/ vnd dem
jenigen/ ſo die Roß oder Maulthier dar-
leyhen thut/ wegen deß fortraiſens vnd
der Bezahlung/ ein Schꝛifftlichen Con-
tract machen/ inn beyſeyn deß Conſuls/
oder etlicher Kauffleuth/ ſo inn gleicher
Carauana zuraiſen vorhabens/ oder ſo es
jnen gefellig/ moͤgen ſie ſolchen Contract
bey dem Cady/ in beyſeyn etlicher Chri-
ſten vnd Tuͤrcken Zeugen/ verfaſſen laſ-
ſen/ damit einer zu Alepo/ oder wohin
jeglicher zuraiſen vorhabens nit weitter
tribulieret/ vnnd von einem doppeltes
Gelt gefoꝛdert werde/ wie es ſonſt gemei-
niglich geſchehen thut.
Hieneben iſt zuwiſſen/ daß man an
den maiſten Orten der Türckey/ ſonder-
lich aber in ober Syria/ gar wenig Doͤꝛf-
fer/ vnnd noch vil weniger Wirtshaͤuſer
oder Herbergen finden thut/ ſondern es
muͤſſen die Raiſenden meiſten theils vn-
ter freyem Himmel ruhen/ Derowegen
ſo muß man auch/ nach Gelegenheit der
Zeit/ vnd vnſicherheit deß Wegs/ theils
bey der Nacht/ theils bey dem Tag/ rai-
ſen/ bey Tag biß zur Nacht aber iſt es
gemeyniglich ſehr haiß/ nach Mitter-
nacht aber wird es kuͤl/ vnnd gegen dem
Tag zimlich kalt. Damit nun einer zu-
gleich fuͤr Hitz vnd Kaͤlten verſehen/ ſo
mag jhm ein jeder ein Jambarluck oder
Zambarluck vonn geſpꝛangtem Thuch/
(doch daß es nicht gruͤner Farb ſey) ma-
chen laſſen/ welches ein langer Tuͤrcki-
ſcher Rock/ wie die Jaͤnitſcharen zutra-
gen pflegen/ gemeldter Rock wirdt ei-
nem deß Tages fuͤr die groſſe Hitz/ deß
Nachts fuͤr die Kaͤlten/ vnd ſonſt zu der
Ligerſtatt dienſtlich ſeyn. Wiewol es
manchem/ ſo ſolches nicht verſucht hat/
gar ſeltzam vnd vnglaublich fuͤrkommē
wirdt/ daß eben das jenige/ welches gut
fuͤr die Kaͤlten/ auch fuͤr die Hitz gut ſein
ſolle/ einem ſolchen gib ich zur antwoꝛt:
Probs/ darnach lobs.
Hiebëy aber hat ein jeglicher zu mer-
cken/ daß einer gemeldten Rock/ zu Moꝛ-
gens weil es noch kalt/ vmbnemme/ vnd
ſich alsbald zu Roß mache/ auch wie haiß
es vmb Mittag ſeyn kan/ ſolchen nicht
auffmache oder vonn ſich thue/ außge-
nommen es weꝛde einer zu dem gehen ge-
drungen/ diſer geſtalt halten es vaſt alle
Tuͤrcken.
Mehr gemeldter Zambarluck hat
zween lange vnd weitte Ermel/ deren ei-
nen kan zu Nachts der Raiſende an den
Kopff ziehen/ vonn wegen der groſſen
menge der Gelſen oder Mucken/ den an-
dern Ermel aber/ ſolle einer mit Sandt/
Geſtreuß/ oder was einer ſonſt tauglich
haben kan/ anfuͤllen/ welches jhme/ an
ſtatt eines Polſters/ dienen wirdt/ den
vbrigen Theil deß Rocks kan einer zum
Vnder vnd Vberbeth gebrauchen.
Woferꝛ auch einer gern will/ mag er
jhm ein baar Hoſen/ ſambt einem darzu
gehoͤrigem Tuͤrckiſchen Vnderꝛoͤckel/
von Feyelbraunen oder Rohten Thuch
machen laſſen/ damit er deſto weniger
auff der Raiß fuͤr einen Chriſten gehal-
ten werde.
Es mag ſich auch einer mit Tuͤrcki-
ſchen Gatti verſehen/ welches weitte
Lein wate Hoſen ſeind/ wie es die Hun-
gern im Sommer zutragen pflegen/ Zu
was ſie aber nutz ſeynd/ weiß ich eigent-
lich nicht/ allein daß einer der andern
Hoſen vor dem Staub verſchonen kan/
auch einen die Gelſen oder Mucken nicht
ſo leicht hecken oder beiſſen moͤgen.
Zu vorgemeldtem Raißkleid gehoͤ-
ret auch ein Tuͤrckiſche Kappen von Fey-
elbraunen Tuch gemacht.
So auch einer mit einem Saͤbel/
Puͤrſt: oder andern kurtzen Rohr verſe-
hen were/ ſo woͤlle er ſich damit auff die
Raiß ſtaffieren/ dann es einem ſehꝛ nutz/
wie ichs ſelbſt erfahren.
Es iſt auch zuwiſſen/ daß das Trinck-
waſſer auff dem Weg vaſt Kalchich/ vñ
weiß wie Kaͤßwaſſer/ auch ſo dick iſt/ daß
es einer ohne Leibsgefahr nicht wol ge-
nieſſen kan/ darumb iſt es vorher durch
ein Saluet zuſeyhen.
So iſt auch wol bewuſt/ daß die Tuͤr-
cken an jhren Kleidern keine Kraͤgen tra-
gen/ derowegen ſo iſt ſehr nutzlich/ daß jh-
me einer ein ſchwartz ſeiden Tuͤrckiſches
Halßtuch kauffe/ mit welchen er nicht al-
lein den Halß vor der Sonnen bewahꝛen
ſondern auch das Geſicht vor dem ſtaub
verdecken/ vnnd das Trinckwaſſer dar-
durch gieſſen vnd ſeyhen kan.
Eſſen vnd Trincken belangent/ kan
auff ſolcher Raiß nicht vil mitgenom̃en
werden/ dieweil dieſelb zu Roß verꝛicht
wird/ allda man auſſer Brod vnd Wein
nicht vilmehrers mitfuͤhren kan.
Was geſtalt ſich einer mit dem Gelt
verhalten/ vnnd wieuil er deſſen mit ſich
vonn Tripoli nach Alepo/ oder anderer
Tuͤrckiſchen Staͤdt/ nemmen ſolle/ waiß
ich keinen gewiſſen Raht zugeben/ allein
ſo viel zuuermelden/ daß es auff ſolcher
Straſſen/ ſehr vnſicher vnd gefaͤhrlich/
alſo daß ſelten ein Carauana von den A-
rabiern vnberaubt durch kombt/ wel-
cher derhalben die Wagnuß nicht ha-
ben will/ der mag ſein Gelt zu Tripoli
in den Wechſel legen/ welcher aber dem
Gluͤck trawen/ den ſchweren Wechſel
fliehen/ vnnd das Gelt mit ſich fuͤren
wil/ der kan es auch thun/ wie ich es eb-
ner maſſen gewagt/ vnd mir (Gottlob)
wol gelungen iſt/ aber hergegen andern
zweyen Venediſchen reichen Kaufflen-
then das Gluͤck zuwider geweſt/ daß ſie
nur einen Tag vor mir/ mit einer Cara-
nana verꝛaiſt/ vnd nicht allein beraubet/
ſondern auch auß der Geſelſchafft/ mit
ſambt jrem Geldt (deren jeder vber ſechs
hundert Cronen bey ſich gehabt) verloh-
ren/ vnd nimmer geſehen worden.
Es kan auch nicht ſchaden/ daß einer
bey den Frantzoͤſiſchen oder Venedigi-
ſchen Conſul zu Tripoli vmb ein recom-
mendation ſchꝛeiben auff den Frantzoͤſi-
ſchen oder Venedigiſchen Conſul zu Ale-
polautent/ anhalte.
So nun der Raiſende mit allen noth-
wendigen/ vnnd zu der Raiß gehoͤrigen
Sachen/ verſehen/ ſo iſt jhme auch hierzu
hoͤchlichſten von noͤhten/ daß er ſich ſteiff
mit der Gedult ſtaffiere/ vnd alles wider-
wertiges gern vbertrage/ ſonderlich aber
ſolches/ was jhme von ſeinen Mitgefehꝛ-
ten zuhanden ſtoſſet.
Es iſt auch zumercken/ daß ſich kei-
ner zu weit vonn ſeinen Mitgefehrten/
(wie mehrmals gemeldt) weder zu Roß/
noch zu Fueß/ begeben ſolle/ ſonſten einer
in groſſe Gefahr der Gefencknuß/ der
Verkauffung/ oder gar deß Lebens gera-
ten kan.
Alsbaldt nun die Geſellſchafft die
Stadt Alepo/ oder Halepo/ mit Gluͤck
erꝛaichet/ ſo kan ſich ein jeder ſeines Ge-
fallens/ vnd der Gelegenheit nach in ein
Fontico/ dahin er recommendieret wor-
den/ verfuͤgen/ ſeine Schreiben vberant-
woꝛten/ vnd folgents mit dem Wirth/ ſo
darinnen wonhafft (gleich wie zu Tri-
poli beſchehen) wegen einer Kammer
vnd Koſt handtlen/ auch einen ordent-
lichen Abbruch deßhulben ſchlieſſen/ wañ
ſolches beſchehen/ ſo kan ein jeglicher zu
deſſen Gelegenheit vnnd Fuͤrſichtigkeit/
ſich bey denen Chriſtlichen Kauffleuthen
ſo inn dem Fontico wonhafft/ bekandt
machen/ auch einen oder zween vndter
jhnen erbitten/ damit ſie einen durch die
Statt fuͤhren woͤllen/ dieſelbig zum theil
zubeſichtigen/ vnnd zum theil allerley
Jndianiſche/ Perſiſche/ vnnd Tuͤrckiſche
Sachen einzukauffen/ welche alldorten
zu Halepo/ nicht allein in der Guͤte/ ſon-
dern auch inn dem Vberfluß zufinden/
Doch hat ein jeglicher wol auffzumer-
cken/ daß einer gemeldte Sachen/ nicht
allein als viel muͤglich (in der Gehaim)
kauffe/ ſonder ſich auch wol darauff ver-
ſtehe.
Damit aber einer in der Stadt deſto
ruͤhiger vnd ſicherer wandlen koͤnne/ ſo
mag er jhme vonn Schamlot/ welcher
allda ſehr wolfeyl/ einen Griechiſchen
Rock/ wie es die Jtalieniſchen Kauffleut
darinnen zutragen pflegen/ ſambt einem
Jtalieniſchen Paret/ machen laſſen.
Es iſt auch zumercken/ daß einer bey
einem Tuͤrckiſchen/ oder anderm darin-
nigem Kauffmann/ etwas zukauffen an-
failet/ vnd ſolches der Kauffmann vmb
einen Ducaten bieten thut/ ſo ſolle der
Kauffer nit mehr dann halben theil dar-
auff legen.
Es pflegen auch inn dem Frantzoͤſi-
ſchen Fontico alle Tag Syriſche Chꝛiſtẽ/
Tuͤrcken/ Juden/ Griechen/ vnd derglei-
chen Leuth/ zukommen/ welche ſich mit
allerley Sachen zuuerkauffen/ anmel-
den/ oder einem zudienen/ auß zu fuͤhren/
gehaime Sachen zu zaigen/ vnnd mehr
dergleichen ding anbieten werden/ fuͤr
ſolchen ſich ein jeder zuhuͤten wirdt wiſ-
ſen.
So nun der Raiſende ſeiner Begierd
vergnuͤget/ vnd willens ſein Raiß weit-
ter zu richten/ mag er ſich gleicher Ge-
ſtalt/ als wie er zu Tripolis gethan (mit
Auffnemmung eines Jaͤnitſcharen/ Tru-
zimano/ Eſel oder Roß-Speiß vnnd
Tranck/ auch andern nohtwendigen ſa-
chen) verhalten/ vnnd nach Notturfft
verſehen.
Wohin vnnd auff was Ende einer
weitter ſein Raiß anſchicken ſolle/ kan ich
hierinnen kein Regel fuͤrſchreiben/ in be-
denckung deß Sprichworts/ vil Koͤpff/
vil Sinn.
Jch aber hab mein Raiß nach An-
tiochiam genommen/ welche Stadt der
zeit gleichwol vaſt oͤd vnd wuͤſt/ Jedoch
iſt ſie jres hohen Namens/ vnd der vbri-
gen Reliquien wegen/ ſo wol als ein an-
dere Stadt in der Tuͤrckey/ zuſehen/ vnd
zuſchetzen.
Welcher aber ſich dahin zu verfuͤgen
nicht geſinnet/ ſondern nach Damaſco/
vnd von doꝛt auß nach dem Berg Sinai
durch die Wuͤſten zuraiſen willens/ de-
me rahte ich ſolches keines weges/ weil
diſe eine weitte/ harte/ vnſichere vnd vn-
gewoͤnliche Raiß iſt.
Da aber einer je Vorhabens were/
nach dem Berg Sinay zuraiſen/ der mag
ſich widerumb zuruck nach Tripoli ver-
fuͤgen/ alldoꝛr auff das Meer ſitzen/ nach
Gran Cairo ſchiffen/ vnd von dort auß/
nach dem Berg Sinay raiſen.
WAs Geſtallt ſich aber einer
auff ſolche Raiß ſtaffieren vñ
accommodieren ſolle/ folget
allhie ein kurtzer Vnderꝛicht:
Erſtlichen ſolle der Raiſende/ welcher
nach GranCairo zuſchiffen geſinnet/
ſein fleiſſige Nachfrag haben/ was fuͤr
Schiff zu Tripoli vorhanden/ ſo nach
Damiata zufahren/ willens/ vnnd ſo er
ein taugliches vnd jhme gefelliges ſchiff
erfraget hat/ kan er alsdann inn beyſeyn
deß Conſuls/ mit dem Patron oder Raͤiß
deß Schiffes/ wegen der Sicherheit vnd
deß Fuhrlohns/ handlen/ auch ſolches
Schrifftlich verfaſſen laſſen.
Demnach ſo mag ſich einer mit Biſ-
coten/ Kaͤß/ Fruͤchten/ ein wenig Wein/
vnd andern Sachen/ ſo nicht kochens be-
duͤrffen/ verſehen/ dann es auff ſolchen
Schiffen wenig Kochens gibt.
Dieweil auch die Patroni ſolcher
Schiff gemeiniglich/ entweder Moh-
ren oder Tuͤrcken ſeynd/ welche an denen
Meerſtaͤtten viel Kauffmanſchafft trei-
ben/ dardurch der Raiſende an ſeiner
Raiß auffgehalten/ zu dem auch/ ſo ge-
ſtatten mehr bemelte Schiffpatroni
gantz beſchwerlichen/ daß ein Paſſag-
gier zu Landt trette/ derowegen nicht
vnrahtſam/ ſich mit einem wolbekand-
ten Jaͤnitſcharen zuuerſehen/ mit welches
Gelait einer ſicherlich inn allen Tuͤrcki-
ſchen Staͤtten wandtlen kan.
Es iſt auch zuwiſſen/ daß die Schiff/
welche von Tripoli nach Cairo handlen/
gemeinigklich nit weitter dann biß auff
Damiata lauffen/ Deßwegen ſo muß
ſich der Raiſende in ein ander Schiff/ ſo
man auff dem Nilo zubrauchen pfleget/
begeben/ vnd alſo gegen demſelben Fluß
auff Gran Cairo ſchiffen.
Derowegen ſolle ein jeder ſeine Sa-
chen in jetzt vermeldtem Schiff/ als viel
muͤglich iſt/ wol verwahren/ damit ſie
keinem vonn dem boͤſen Leuthen/ oder
Waſſerꝛaubern geſtolen werden/ deren
vnzehlig vil in dem Nilo verhanden/ ſo
deß ſchwimmens erfahren vnd gewont/
welche naͤchtlicher weil zu den Schiffen
ſchwimmen/ als die Enthen/ vnnd das
naͤchſte ſo ſie erwiſchen mit ſich nemmen/
dieweil gemeldte Schiff ſehr flach/ auch
kaum zweyer Spannen vber das Waſ-
ſer außgehn/ daß alſo gemeldte Maͤuß-
koͤpff gar leichtlich/ ſowol mit Haͤnden/
als habenden Jnſtrumenten/ inn die
Schiff greiffen/ vnd auffs truckene Land
fiſchen.
So nun der Raiſende mit Gluͤck auff
Gran Cairo (doch erſtlich auff Bulaco/
welches ein theil der gemeldten Stadt/
vnd an dem Nilo gelegen) ankommen
ſo kan ſich derſelb wie zu Tripoli/ oder
Alepo beſchehen/ verhalten/ doch iſt hie
bey zuwiſſen/ daß die Stadt Cairo nicht
allein anſehenlich/ ſondern auch vberauß
groß/ vnnd alſo weitſchwaiffig (wie ſol-
ches Herꝛ Hans Wetly von Zimbern be-
zeugt/ ſo in dem 1483. Jahr darinnen ge-
weſen) daß dieſelb ſeines Mitgefehrten
Diener/ neben einem Mamalucken/ nach
der braite durchgangen/ vnd habe gezelt
zwoͤlfftauſent/ hundert vnd zween vnnd
ſibentzig Schritt/ durch die laͤnge aber
habe er gemeſſen fuͤnffzehen tauſent/ ein
hundert vnd ſiben ſchꝛitt/ ohne die reujex
der Stadt/ alda die begraͤbnus der Sol-
dannen/ welches auch vier tauſent vnnd
acht hundert ſchritt getroffen dz Schloß
aber/ ſo in der vorigen raittung auch nit
einkommen/ begreifft weitter vmb ſich
als Vllm die Stadt/ dannen her ſo woͤl-
le ein jeder darauff gedacht ſeyn/ daß ſich
keiner allein zu weit vonn Hauß/ ohn ein
vertrawte/ vnd der Stadt kuͤndige Per-
ſon begebe.
Welcher derhalben die Stadt beſe-
hen wil/ der mag ſich mit einem bekan-
ten Jaͤnitſcharn/ oder Wegweiſer/ ſampt
den beduͤrfftigen Eſeln verſehen/ deren
alldort vmb die Bezahlunb genugſamb
zufinden/ vnd wird ohne zweiffel ein jeg-
licher mit groſſem Luſt vnnd Gefallen/
nicht allein die Stadt Cairo/ ſondern
auch die nechſt vmbligende Gelegenheit
zubeſehen ſich bemuͤhen/ inſonderheit a-
ber die Pyramides (ſo der ſiben Wunder-
wercken der Welt eines) neben auch dem
groſſen Haupt oder Bruſtbild Iris oder
Rhodope zubeſuchen/ ſowol auch die Mu-
miæ, welches Menſchen Leiber/ ſo noch
zum theil vor Chriſti Geburt geſtoꝛben/
abeꝛ doch gar gantz vnd vnueꝛfault zube-
ſehen.
Dieweil es aber zu obuermeldten Py-
ramiden vnnd Mumien zuraiſen etlicher
maſſen der Arabier halben/ vnſicher/ ſo
iſt zu ſolchem fuͤrhaben von noͤhten/ daß
einer mit Puͤchſen vnd Saͤbeln/ auch mit
zween Jaͤnitſcharen/ ſambt acht oder ze-
hen bekandten/ vnd bewoͤhrten Mohꝛen
verſehen ſey/ auch die nohtwendigen E-
ſel/ ſambt andern beduͤrfftigen Sachen/
beſtelle/ vnnd ſich fein zeitlich auff den
Weg mache.
Hiebey iſt auch zumercken/ daß die
meiſten der jenigen ſo dieſes Orth beſu-
chen/ im brauch haben/ wie dann auch
mein Mitgefert vnnd ich gethan/ auff
die eine von Quaterſtucken erbawte py-
ramide zuſteigen/ dieweil aber ſolches nit
allein von wegen der groſſen hoͤhe/ ſon-
dern auch von wegen der vil roglen vnd
beweglichen Stainen (ſonderlich in dem
herab ſteigen) zimlich gefaͤhrlich/ dero-
wegen ſo ſolle ein jeglicher gute achtung
haben/ auffdaß einer nicht ſtrauche/ oder
auff einen roglen Stain trette/ dieweil
ſich ſolcher geſtalt/ aldort jhr viel zu todt
gefallen.
Vnd obwol einem die zwo groſſen
Pyramides (deren die eine von Ziegel/ die
ander aber von groſſen Quaderſtucken
erbawet) von auſſen verwunderlich fuͤr-
kommen vnd erſcheinen werdẽ/ ſo zweif-
felt mir doch gar nicht/ daß die eine von
Quaderſtuck erbawt/ jnnwendig einem
jeglichen noch vil wunderlicher fuͤrkom-
men wird/ als ſie von auſſen anzuſehen.
Welcher nun luſt vnd gefallen in ge-
meldte Pyramides zuſteigen/ vnd dieſel-
ben inwendig zubeſichtigen/ der ſolle ſich
mit einem Fewrzeug vnnd Windtliecht
verſehen/ dieweil es darinnen gantz fin-
ſter/ der Weg faſt ſchmal/ auch ſehr viel
Fledermaͤuß darinnen vorhanden/ ſo
dem Liecht zufliegen/ vnnd daſſelb biß-
weilen außleſchen.
Nicht weit von diſem Ort iſt der groſ-
ſe Kopff Jris/ oder wie etliche woͤllen/
Rhodopes/ vñ folgents/ wie obuermeld/
die Begraͤbnuſſen der vorlengſt verſtor-
benen Egyptier/ ſo man die Mumias nen-
net/ zuſehen/ welche in der Mohren oder
Arabier Verwahrnung. So nun einem
gefellig dieſelbigen zubeſichtigen/ der
mag ſich bey obuermeldten Mohren an-
melden/ vnd mit jnen wegen deß hinab-
ſteigen/ vnnd beſichtigung der Todten
Menſchen/ handlen/ deſſen ſie ſich alß-
baldt bewilligen/ vnd einen mit jren ſtri-
cken hinab zulaſſen erbieten werden/ die-
weil aber jre Sail vnd Strick gemeinig-
klich erfault/ alſo daß ſie offt entzwey bꝛe-
chen/ wie dann auch mir beſchehen/ der
ich mich bey nahent zu todt hinab gefal-
len. So iſt derowegen von noͤhten/ daß
ſich einer ſelbſt mit ſechs oder acht Klaff-
ter ſtrick verſehe/ damit einem nicht ge-
ſchehe wie mir/ vnd noch vbler wider fah-
re/ Hiebey iſt auch inſonderheit zumer-
cken/ daß der wanderer inn dem hinab
laſſen nicht der erſte ſey/ ſondern vorher
ein Mohr (deme der Weg vnd die Gaͤng
wol bekandt/ auch ein Jaͤnitſchar zu ei-
nem Pfandt/ vmb mehrer ſicherheit) ſich
hinab laſſe/ wann alsdann einer nach
dem andern hinab gefahren/ vnnd die
gantze Geſellſchafft beyſamb/ alsdann
vnd ehe nicht/ ſoll ein jeder ſein Kertzen
anzuͤnden/ vnd dem Wegweyſer fleiſſig
nachfolgen/ ſich auch keines wegs vonn
ſeiner Geſellſchafft begeben/ damit er
nicht in ein andern Gang (deren vil hin
vnd wider alldort ſeyn) gerahte/ vnd al-
ſo nimmer mehr zu ſeiner Geſellſchafft
kommen moͤchte.
Die Mumiæ ſeynd anders nichts als
balſamierte Menſchen Leiber/ ſo zum
theil/ wie gemeldt/ noch vor Chriſti Ge-
burt geſtorben/ welche mit Sindone oder
Schlaier eingebunden/ deren allda viel
tauſent zufinden/ die noch gantz vnd vn-
uerweſen.
So nun einem von mehrgemeldten
Mumien oder todten Menſchen etwas
mit ſich zunemmen gefellig/ es ſey vonn
Arm/ Fueß oder andern theil deß Leibs/
der kan ſolches vnuethindert thun/ da
einem aber nit bewuſt/ welcher Menſch
beſſer oder ſchlechter balſamiert/ ſo mag
einer ein ſolchen todten Coͤrper bey dem
Kopff/ vnnd der ander bey den Fuͤſſen
nemmen/ auch denſelben auff ein andern
Todten werffen/ ſo nun die geworffene
Todte zween oder drey wuͤrff außgeſtan-
den/ vnd in der mitte nit entzwey bricht/
iſt ſolcher gut vnnd zimblich wol balſa-
miert.
Es ſeyn auch in vermeldten todten
Coͤrpern/ vnd in dem Staub oder Sand
viel kleine jrꝛdene Idola oder Abgoͤtter/
ſambt andern vil ſeltzamen in Stain ge-
hawen vnd Holtz geſchnitzte Bilder/ zu-
finden/ welchem derowegen gefellig ſich
mit jetzt gemeldten Idolis oder Ratzenkoͤ-
nigen zubeluſtigen/ der kan derſelben ne-
ben den Mumien ſouil jhme geluſt/ mit
ſich zu hauß nemmen.
Wann nun der Raiſende mehr ge-
meldte Gelegenheit genugſamblich be-
ſichtiget/ ſo mag er ſich widerumb zu
Hauß nach Cairo begeben/ allda einem
nicht manglen wirdt/ Stuͤndlich was
newes vnd frembdes zuerfahren/ vonn
welchem ich viel zuſchreiben haͤtte/ die’
weil aber/ wie mehr vermeldt/ mein Jn-
tent vnd mainung gar nit/ die Gelegen-
heit deß Landts/ der Staͤdt oder Floͤcken
zubeſchꝛeiben/ ſondern nur bloß einen
Vnterꝛicht fuͤr die Augen zuſtellen/ was
geſtalt ſich ein jeder Raiſender an vor an-
gezogenen/ vnd hernach folgenden Or-
ten/ verhalten ſolle/ auch damit ich mei-
nem Jntent/ vnd gethanen Zuſagen ge-
nugſamlich nachkomme/ Hab ich ſolche
mein Compendium auff das aller engiſte
zuſammen ziehen/ vnnd mich der muͤgli-
chiſten kuͤrtze gebrauchen woͤllen/ verhof-
fe aber/ es werde ein jeder Peregrin ſelbſt
ſein fleiſſige nachfrag vnd erkuͤndigung
haben/ was an einem vnnd ander Orth’
ſo hierinnen nicht begriffen/ vnd
ſeyther die Zeit veraͤndert
hette/ zuſehen.
WOferꝛ nun auch einem gefellig/
den Berg Sinay vnd die Wuͤ-
ſten zubeſehen/ dardurch die
Kinder von Jſrael geraiſt/ als
ſie vonn Pharaone verfolgt worden/ ſo
ſolle ſich ſolcher vmb einen wolbekanten
Truziman oder Dolmetſchen bewerben/
welcher der Moͤhꝛiſchen Spꝛach wol kuͤn-
dig/ alsdann fleiſſige nach frag bey den
Chriſten Kauffleuten halten/ ſo zu Gran
Cairo wonhafft/ wann eigentlich ein Ca-
rauana vonn Torr oder Sues auff Cairo
ankommen ſolle/ damit er mit ſolcher
nach dem Berg Sinay raiſen moͤge/ die’
weil auſſerhalb der Carauana/ durch die
Wuͤſten zuraiſen/ groſſe gefahr.
Vnd iſt hieneben zumercken/ daß ob-
gleich wol kein Carauana nach dem Berg
Sinay/ ſondern nur nach Torr oder Sues
jhꝛen weg zunemmen pflegt/ ſo raiſt ſie
doch auff zwo Tagraiß bey bemeldten
Berg Sinay fuͤruͤber/ allda weitter kein
ſonder Gefahr mehr zubefoͤrchten.
Was geſtalt ſich aber der Raiſende
zu mehruermeldter Raiß ſtaffieren ſolle/
hab ich hieneben ein kleinen Vnterꝛicht
zugeben/ nicht vnderlaſſen woͤllen.
Vnd iſt erſtlich zu wiſſen/ daß einem
die Griechiſch oder Tuͤrckiſch Kleidung/
zu folgender Raiß durch die Wuͤſten
nicht ſonders tauglich/ dieweil man jm-
merdar vnder freyem Himmel bey Tag
vnd Nacht/ in dem groſſen Taw/ tieffen
Sandt/ auch zu zeiten harten Stainen/
ligen/ vnd die Herberg nemmen muß.
Derhalben ſo iſt mein raht/ daß jme
der Peregrin/ zu ſeiner vorher habenden
Engliſchen Decken noch ein andere lan-
ge Arabiſche Deck/ ſambt einem Mohꝛi-
ſchen Rock/ vnd weiſſen bar Hoſen vonn
groben Thuch/ wie man ſolche allbereit
gemachter alldort findet/ kauffen thue.
Mehꝛ ſo iſt von noͤhten zukauffen/ ein
vnder oder kurtz Roͤckel vonn Kotzen ge-
macht/ ſambt einem Thuchenen bar Er-
mel/ zwey bar Schuch ſeyn auch vonnoͤ-
ten zuhaben/ ein Haarſchinl oder Tuͤr-
ckiſch Haͤubel von Camelharn gemacht/
welches dem Kopff nuͤtzlich/ wie ſolches
die Tuͤrcken vnder den Turbanten zutra-
gen pflegen/ ſolle zukauffen nit vergeſſen
werden.
Dieweil auch nicht der brauch/ auff
ſolcher Raiß Huͤt zutragen/ damit man
von den herumb ſchweiffenden Arabiern
nicht alsbald erkandt werde: ſo iſt von
noͤhten/ ſich mit einem Turbant zuuer ſe-
hen/ welches ein langer Schlaier/ mit
welchem einer nit allein den Kopff ver-
binden/ ſondern auch das Geſicht zu zeit
deß groſſen Winds (ſo einem den Sand
inn das Geſicht waͤhen thut) verdecken
mag/ doch iſt alhie fleiſſig zumercken/
daß ſolcher Turbant/ nicht gantz weiß/
wie es die Tuͤrcken zutragen pflegen/ vnd
noch vil weniger mit gruͤner Farb einge-
tragen/ ſondern mit allerley andern Far-
ben vermiſcht ſey/ dann die gantzen weiſ-
ſen Bindt niemandt als den Tuͤrcken al-
lein/ vnd die gruͤne Farb keinem/ als der
ſich von Mahomets Stammen probie-
ren kan/ zutragen erlaubt ſeyn/ welcher
aber deſſen ein bedencken/ vnnd gemeld-
ten Bundt nicht tragen wolt/ der kan ſich
mit einer Tuͤrckiſchen Kappen verſehen/
mein Mitgefehrt vnd ich aber haben ob-
uermelten Bundt gebraucht/ welche vns
bey Tag vnnd Nacht/ ſehr wol gedient.
Jtem zwey Hem̃eter/ zwey bar Schlaff-
hoſen/ etliche Saluet oder Wiſchtuͤch-
lein/ ſambt andern wenig Leingewandt
iſt nicht zuuergeſſen.
Es mag auch einer mit Raht der
Kauffleuth/ Waffen mit ſich fuͤhren/ ich
hab aber ſolches vnterlaſſen.
Vonn Cairo auß biß zu dem Berg
Sinay/ hat man von acht biß inn zehen
Tag/ durch lauter Wuͤſten vnd Oednuß
zuraiſen/ allda man bißweilen jnner-
halb fuͤnff/ vnd daruͤber Tagraiß/ vber
ein oder zweymal nit Waſſer finden thut/
welches Waſſer auch alſo vaſt nach dem
Schwefel ſchmecket/ daß es einem den
gantzen Tag auß dem Halß ſtincket/ der-
halben ſo iſt von noͤten/ daß ſich einer mit
einem Vtre (welches ein groſſe Bock oder
Gaißhaut iſt) verſehe/ welche er zu Cai-
ro mit gutem geſtandnen vnnd allbereit
klarem Waſſer/ auß dem Nilo einfuͤllen/
vnd ſich deſſelbigen auff der gantzen raiß
gebrauchen kan.
Es iſt auch auff ſolcher Raiß mit zu-
nemmen nicht vntauglich ein Tuͤrckiſche
von haͤrtem Leder gemachte Flaſchen.
Weitter ſo ſolle ſich einer verſehen/
mit einem oder zween kuͤpffern Hafen/
ſambt deren Vberdecken/ welche gemel-
te Hafen wol beſchlieſſen ſollen/ damit
die Speiſen vor dem Sand verſichert
ſeyn moͤgen.
Jtem ſol man haben zwo von Glo-
ckenſpeiß/ oder Kupffer gemachte Schiſ-
ſel/ mit dem Loͤffel vnd Meſſer/ wird jeg-
licher zuuor verſehen ſeyn.
Welcher auch gern wil/ vnd ſonder-
lich der/ ſo deß Waſſertrinckens vnge-
wohnet/ kan ſich mit einem faͤſſel Weins/
ſo vngefaͤhr zehen oder zwoͤlff Achtring
halten mag/ verſehen/ mit welchem einer
nicht allein geſpaͤrig vmbgehe: ſondern
auch denſelben vor den Arabiern/ ſo vil
muͤglich/ verbergen ſolle/ dieweil gemel-
tes Volck dem Wein vberauß ergeben/
vnd gefaͤhrlich.
Weitter ſo ſolle ſich einer verſehen/
vnd jme nachfolgende Sachen einkauf-
fen: Als nemblich/ vmb ein Ducaten
wolgebachene Biſcoti, ein tutzent hart
geſaltzene oder geſelchte Ochſenzungen/
acht rotl oder Pfundt geſelcht Fleiſch/
Jtem Reyß/ Linſen/ Bonen/ Zwiffel/
Knobloch/ Eſſig/ Oel/ Kaͤß/ Saltz/ Zu-
cker/ vnd allerley/ doch allberait geſtoſ-
ſen Gewuͤrtz/ auch was vonn Fruͤchten/
ſo ſich vber Landt fuͤhren laſſen/ vnd nit
leichtlich verderben/ als Nuſſen/ duͤrꝛe
Feigen/ Datln/ etliche Citroni/ Pomme-
rantzen vnd dergleichen.
Damit aber einer/ zuuorhabender ſei-
ner Raiß/ durch die Wuͤſten gemelde Vi-
ctualien/ vnd andere nohtwendige Sa-
chen/ fuͤhren/ vnd auff die Camel laden
moͤge/ ſo ſolle er ſich mit zweyen/ vonn
Datlzweigen geflochtnen Koͤꝛben/ ſambt
denen darzu gehoͤrigen ſtricken verſehen.
Es moͤchte aber villeicht manchem
etwas frembd fuͤr kommen/ daß ſich der
Pilgram/ mit ſo vilen Sachen auff diſe
Raiß verſehen vnnd beſchweren ſolle/ ſo
iſt aber diſe Andeutung von mir/ der vr-
ſachen halben/ beſchehen/ daß es beſſer ſey
etwas zuvil/ mit ſich zunemmen/ als ein-
mal mangel zulaiden.
Alweil nun der Peregrin/ oder da
villeicht derſelben mehr inn einer Geſell-
ſchafft/ auff gelegenheit zuuerꝛaiſen war-
ten/ ſo ſollen ſie ſich vnder deſſen/ bey den
Griechiſchen Muͤnchen (ſo man Callog-
geros nennet/ vnnd zu Gran Cairo ein
anſehenliches Kloſter haben) anmelden
damit ſie der Geſellſchafft ein Recom-
mendationſchꝛeiben an den Patriarchen
oder Obriſten deß Bergs Sinay/ mit-
theilen woͤllen/ wofer aber der Patri-
arch ſelbſt zu Cairo verhanden/ ſo woͤlle
die Geſellſchafft bey demſelben vmb ein
Recommendationſchreiben/ an die Bruͤ-
der deß Bergs Sinay anhalten/ vnd den-
ſelben bitten/ damit er der Geſellſchafft/
die erſte vnd ſichereſte Carauana/ ſo nach
Terr oder Sues/ raiſet/ alsbald zuwiſſen
machen woͤlle.
Was die Arabier fuͤr ein Volck ſey/
hab ich vorher etlicher maſſen meldung
gethan/ alſo daß ſie mehrers wilden vnd
vnuernuͤnfftigen Thieren/ als den Men-
ſchen zuuergleichen/ derohalben ſo ſol-
len die Peregrini zu mehrer Sicherheit
ſich bey den Patriarchen/ oder bey deme/
der an ſeiner ſtatt voꝛhanden/ anmelden/
vnd in Gegenwart deſſen mit den Ara-
biern/ wegen der Raiß accordieren/ vnd
ſolches Schrifftlich verfaſſen laſſen.
Nach gemachtem Contract/ ſo ſol-
len die Herꝛn Peregrini (inn beyſeyn be-
kandter Kauffleuth/ den Patriarchen/
oder wer an deſſen ſtatt gegen Schein)
das Gelt ſo den Arabiern gebuͤrt/ der ge-
geſtalt erlegen/ daß nemblich Er Patri-
arch denen Arabiern zu jhrer Raiß nach
dem Berg Sinay/ halben: oder nur drit-
ten theil/ vnd zu deren Widerkunfft auff
Cairo/ den vberꝛeſt deß Gelts erlege.
Es iſt auch zu wiſſen/ daß man der
Arabier Camel nicht gern inn die Stadt
Cairo einlaſſe/ derowegen ſo iſt von noͤh-
ten/ daß ein jedweder ſeine Sachen/ vnd
Geradſchafft auff ein Camel zu Cairo la-
de (deren vmb die Bezahlung in gemel-
ter Stadt genugſam zufinden) vnd alſo
der Arabier Laͤger zuraiſe.
Dieweil auch der Weg durch die
Stadt ſehr lang/ vnd der Arabier Laͤger
zimlich weit von der Stadt iſt: So rate
ich einem jeglichen/ daß er ſich mit einem
Lehen Eſel verſehe/ damit er ſeinem ge-
ladenen Camel deſto leichter folgen moͤ-
ge.
Nach dem es an etlichen Orthen
(ſonderlich aber in denen Bazaran) oder
Kauffplatz gemeldter Stadt Cairo/ vn-
zehlich vil Volcks/ von denen einer leicht-
lich auffgehalten/ oder etwo auch wol ab
geſchmiert moͤcht werden/ ſo iſt mein
Raht/ daß ſich die Geſellſchafft/ mit ei-
nem wolbekandten Jaͤnitſcharen verſe-
he/ welcher ſie biß inn der Arabier Laͤger
belaitte/ durch deſſen Huͤlff vnd Gewalt
einjeder ſicher ſeyn kan.
Alsbaldt nun mehrgemeldte Pere-
grini inn der Arabier Laͤger kommen/ ſo
woͤlle ein jeglicher ſeine Sachen fein eng
auff einen hauffen legen/ vnnd dieſelben
wol verhuͤten/ damit jhme von den Ara-
biern nichts auffgeraumbt vnd geſtolen
werde/ dann dieſelben vberauß kuͤnſtli-
che Dieb/ vnnd denen Zigeinern in dem
ſtelen nicht vmb ein Haar weichen/ vonn
welchen dann die gemeldten Zigeiner jh-
ren Vrſprung vnd herkunfft haben.
So nun der Arabier Carauana auff-
zubrechen willens/ vnd jhre Camel zu la-
den anfangen/ ſo ſolle ein jeder Peregrin
vnuerdroſſen ſeine Sachen auffladen
helffen/ nachdem alle Camel ligender ge-
laden werden/ auch inn der mitten deß
Rucken einen hohen Puͤhel haben/ vnd
die darauff gehoͤrigen Saͤttel gar vnge-
bꝛauchſam ſein/ ſo ſolle ein jeder ſeine zwo
habende Decken/ zuſammen gelegter/
darauff accommodiren/ alsbald darauff
ſitzen/ vnd ſich veſt an den Sattel halten/
damit einer inn dem auffſtehen deß Ca-
mels nicht herunder falle.
Seltzam vnd wunderlich wird einem
jeden/ jetzt gemeldte Reutterey geduͤn-
cken/ aber noch frembder ſoll einem fuͤr-
kommen/ vnder ſo wilden vnd haͤßlichen
Leuten zuſeyn/ die nicht anders als wie
die frommen Teuffel außſehen.
Wie einem aber diſe newe Reutterey
ankommen wird/ ſolches hat ein jeder zu-
gewarten/ vnd dieſelb mit Gedult zu v-
berwinden.
Dieweil (wie vorgehoͤrt) auff ge-
meldter Raiß/ durch die Wuͤſten weder
Wirth/ noch Wirtshauß zufinden/ der-
wegen ſo laͤgert ſich die Carauana/ nach
gelegenheit der Zeit vnd Ort/ vnder der
blawen/ gꝛoſſen/ mit ſchoͤnen leuchtenden
Sternen gezierden Decken.
Wann nun das Laͤger gemacht/ ſo
ſolle alsbald einer oder zween/ vnder der
Geſellſchafft duͤrꝛe Staͤudlein/ vnnd ge-
doͤrten Camelzierck/ zuſamb ſuchen/ die-
ſelbe anzuͤnden/ vnd darbey kochen/ doch
aber den Speißhafen auff das fleiſſigiſt
verdecken/ vnnd vor dem Wind bewah-
ren/ dann ſo ſolches nicht geſchicht/ wird
einer baldt ſo vil Sand als Speiſen in
dem Hafen finden.
Zudem/ ſo iſt auch zuwiſſen/ daß die
Carauana/ den gantzen Tag gemeinig-
klich foꝛt raiſt/ vnd zu Mittag kein Laͤger
ſchlegt/ deßwegen ſo iſt von noͤhten/ daß
ſich ein jeglicher/ deß Nachts zuuor/ mit
ſolcher eſſender Speiß vnd Tranck ver-
ſehe/ vnnd dieſelb zu ſich auff den Camel
nemme/ was einer deß andern Tags zu
dem Fruͤhmal zuuerzehren vermaint.
Die Ligerſtatt belangt/ woferꝛes zu
Winterszeit/ vnd die Carauana anderſt
jhr Laͤger an einem ſandigen Orth ſchla-
gen thut/ ſo mag ein jetweder zu ſeinem
gefallen/ ein ablaͤngliche Gruben/ einer
Spann tieff/ vnd eines Manns lang in
den Sand graben/ auch alsdann ſeine
zwo Tecken in die gemeldte Gruben le-
gen/ einen theil deß Sandts widerumb
darauff ſcharꝛen/ vnnd zwiſchen beyden
Decken hinein ſchlieffen/ auffdaß einer
vor dem groſſen Thaw verwahret/ vnnd
vor der Morgenkaͤlt verſichert werde/
welche beyde dem Menſchen ſehr ſchaͤd-
lich.
Es ſoll auch ein jeglicher das Haupt
oder den Kopff/ mit ſeinem Turbant
verſichern/ auch mit einem theil deß ge-
meldten Tuͤrckiſchen Bundts/ das An-
geſicht verdecken/ damit einer/ vor den
jmmer werenden Sandwinden bewahꝛt
werde.
Weitter/ ſo woͤlle ein jeder ſeine Sa-
chen zu Nachts/ ſein nahent bey jhme
behalten/ ſich auch zu nechſt bey ſeinem
Camel Thier laͤgern/ doch alſo daß jhme
daſſelb (ſo es ſich waltzet) nicht etwo er-
wiſche vnd hart trucke/ wie dann mir be-
ſchehen.
Dieweil es ſich offt begibt/ daß die
Carauana Naͤchtlicher zeit auffbricht/
vnd foꝛtraiſet/ iſt derowegen vonn noͤh-
ten/ daß ein jeglicher gut achtung habe/
damit keiner zuhinderſt bleibe/ oder der
letzt ſey: ſondern ſich auff das muͤglichiſt
der mitten halte.
Was das Tranck/ fuͤrnemblich den
Wein anbelangt/ woͤlle ein jeglicher gar
geſpaͤrig damit handlen/ auch ſolchen
vonn denen mitraiſenden Arabiern/ wol
verhuͤten/ dann dieſelben nit allein dem
Wein/ ſondern auch dem Waſſer ſehr ge-
faͤhrlich/ die weil es ſich zu zeiten begibt/
daß man in fuͤnff vnnd daruͤber Tagrai-
ſen nicht vber ein oder zweymal Waſſer
findet/ welches doch gemeiniglich/ wie
auch obgehoͤrt/ eintweder Salitrich/
Schweblich/ geſaltzen/ oder weiß wie ein
Kaͤßwaſſer iſt.
So denn die Geſellſchafft/ durch vil
gehabte Muͤhe einmal den Berg Sinay
erꝛaicht ſo woͤllen ſie das jenige Schrei-
ben (welches jhnen von dem Conuent zu
Cairo geben worden) denen Bruͤdern deß
Bergs Sinay vberꝛaichen/ darauff ſie v-
ber ein klein gehalten Verzug ohn allen
zweiffel/ in das Kloſter eingelaſſen/ vnd
von den Calloggeris/ freundlich empfan
gen werden.
Diſem nach/ ſo iſt von noͤhten/ daß
ſich die Geſellſchafft noch einmal mit jh-
ren Mucaris oder Arabiern vnterꝛeden/
ob ſie villeicht lenger oder minder (als jr
gemachter Contract vermag) ſich allda
an dem Berg Sinay auffzuhalten in wil-
lens/ damit die gemeldten Arabier auff
den jhnen beſtimbten tag/ gewißlichen
widerumb mit jhren Cameln zuerſchei-
nen wiſſen.
Vnd obwol mehr gemeldtes Clo- Diſe zwey Blaͤtter ſollen fol. 57, eingemacht werden.
ſter/ mit hohen vnd ſtarcken von Qua-
derſtucken erbawten Mawren vonn auſ-
ſen (wie inn meinem hiebey verzeichne-
Bergs Sinay vnd Horeb.
ten Abriß zuuermercken/ zimblich feines
anſehens/ ſo iſt doch ſolches auſſer der
Kirchen/ vnnd deß Reuents/ nichts ſon-
ders von jnnen erbawet.
Dann die Loſamenter deren darin
wohnenden Münch gar einfeltig vnnd
ſchlecht/ wie dann auch jhre Klaidung
ſehr grob/ vnd hart/ zu dem/ ſo gebrau-
chen ſie ſich keiner waichen Ligerſtatt/
trincken gar ſelten Wein/ vnnd eſſen nie
kein Fleiſch/ geben auch nit zu/ niemandt
anders eines darinnen zukochen/ Fiſch
ſo auß dem rohten Meer/ welche in dem
Sandt gedoͤrꝛet (die ſo wol geſchmach
als Hobelſchaidten) neben einer Oelſup-
pen/ werden ſie euch für die beſte Speiß
geben/ ſonſten iſt wenig (mehrers all-
dort/ auſſer gar guten Brodts/ Zwiffels/
Kaͤß/ Saltz vnnd Caͤpre/ die nicht viel
kleiner als die Huͤner Ayer/) zuhoffen/
ſo haben ſie auch gar ſelten andern Wein/
als Brandtwein/ welchen ſie auß den
Dateln brennen/ da nun jemandt luſt
darzu/ der kan denſelben mit friſchem
Waſſer vermiſchen/ welches alldort gar
gut zufinden.
Die Ligerſtatt iſt vonn geflochtenen
Meerꝛoͤhren/ ein wenig beſſer/ als gar
auff der Erden zuligen.
Es wird doch alle oberzehlte Trac-
tarion einem Pilger nichts ſonders
frembd/ vnd ſchwer fuͤrkommen/ dieweil
ein jeglicher auff ſeiner vorgethanen
Raiß/ noch vil ein aͤrgers außgeſtanden
haben wirdt.
Wann nun die zeit kommen/ daß die
Geſellſchafft von dem Kloſter auß/ auff
dem Berg Horeb/ vnnd Sinay zuraiſen
willens/ ſo ſollen ſie bey dem Obriſtẽ deß
Kloſters anhalten/ damit jhnen zween
Muͤnch zugeben werden/ welche derſel-
ben Orten erfahren/ vnd wo muͤglichen
der Jtalieniſchen Sprach khuͤndig: was
Speiß vnd Tranck anbelangt/ ſol hiene’
ben nit vergeſſen werden. Dieweil auch
beide Berg Horeb vnnd Sinay nicht al-
lein zimblich hoch/ ſondern auch etwas
gefaͤhrlich zuſteigen/ von wegen der ge-
legten vnd roglen Staffeln/ derowegen
da villeicht einer oder mehr/ vnter der
Geſellſchafft/ welcher kranck vnd vbel
auff iſt/ oder den Schwindel hat/ der
woͤlle ſich nit leichtlich vnterſtehen mehr-
gemelte Berg zuſteigen/ biß ſo lang er
widerumb ſtarck genug worden.
Was nun beylaͤuffig auff diſen Ber-
gen vnnd vmbligenten Orten zuſehen/
iſt in obuerzeichneten Abriß obiter ver-
merckt.
So nun die Geſellſchafft jren Bege-
ren nach/ die Gelegenheit deß Gebuͤrgs
Sinay genugſamlich perluſtriert/ ſo ſol-
len ſie die beſtelten Arabier widerumb
zu rechter zeit/ erfordern.
Was die Prouiant belangt/ wirdt
ohne zweiffel die Geſellſchafft ſich/ ſo-
wol auff die wider: als hinraiſen/ verſe-
hen haben/ woferꝛ jhnen aber etwo ein
Abgang erſcheine/ ſo werden die Bruͤ-
der deß Bergs Sinay die Geſellſchafft
jrem geringen vermoͤgen/ vnd der Not-
turfft nach/ verſehen: meinem Mitge-
ferdten Herꝛn Wolff Sigmund von
Haunſperg vnnd mir/ gaben gemeldte
Calloggeri, jeglichen zehen Brodt vnnd
etliche pfundt Dattel: fuͤr ſolche auch an-
dere vns erzeigte Freundtſchafft/ vnnd
erwieſene Dienſt/ haben wir jhnen inn
Geldt ein Preſent vberꝛaicht/ vnnd ver-
laſſen.
Das Waſſer belangent/ woͤlle ſich
die Geſellſchafft allda genugſamblich
verſehen/ dieweil auff diſer Raiß kein ſo
gutes mehr zufinden.
Hieneben ſo wolte ich ein jeglichen
gebettn haben/ welcher diſes mein gerin-
ges Tractaͤtl liſet/ vnnd folgents den
Berg Sinay erꝛaicht/ auffdaß ein ſegli
cher mit trewhertzigen vnd reichen All-
moſen/ der Bruͤder gemeldtes Kloſters
ingedenck ſeyn woͤlle/ dieweil ſie deſſen
wolbeduͤrffen.
Woferꝛ auch die Geſellſchafft Luſt
vnnd Gefallen/ nach Torr zuuerꝛaiſen/
welches ein kleiner Port oder Hafen deß
roten Meers/ allda vil ſeltzame Sachen
zuſehen/ auch einzukauffen/ ſo koͤnnen
ſie daſſelb fuͤglich verꝛichten/ dieweil ſol-
ches gar ein ſchlechtes auß dem Weg: ich
verhoffe auch/ es ſolle die Geſellſchafft/
ſolche Raiß nit gerewen/ zumal vnd die-
weil man zu Sues (ſo nicht weit von jetzt
gemeldtem Poꝛt gelegen) gemeiniglich
ein Carauana nach Cairo raiſent antref-
fen thut/ mit welcher vil ſicherer als mit
wenig Cameln/ durch die Wuͤſten zurai-
ſen iſt.
Obwol auff ſolchem zuruck raiſen
nach Gran Cairo/ Muͤhe vnd vngelegen-
heiten nicht manglen/ ſo wirdt doch ſol-
ches einem jeglichen vil leichter an/ vnnd
fuͤrkommen (dann vorher beſchehen)
dieweil derſelb zu Hertz vnnd Gemuͤth
fuͤhren wirdt/ daß er nunmehr ſeine Au-
gen nach dem Vatterland wende/ in gu-
ter Hoffnung/ daſſelbe widerumb gluͤck-
lich zuerꝛaichen.
Demnach nun die Geſellſchafft mit
Gluͤck widerumb nach GranCairo an-
gelangt/ ſo werden die Arabier alle Sa-
chen/ vor der Stadt abladen/ dieweil
jnen/ wie obuermeldt/ nicht erlaubt/ mit
jren Cameln/ in die Stadt zukommen/
iſt derwegen von noͤten/ ſich mit andern
Cameln zuuerſehen/ deren vmb die Be-
zahlung/ alldorten genugſamlich zube-
kommen: doch woͤlle ſich keiner inn die
Stadt verfuͤgen/ biß ſo lang er nicht ſei-
ne Sachen zu der Dogana gebracht/ vnd
die gebuͤrnus daruon bezahlet hat. Dem-
nach ſo kan ſich ein jeder inn die Stadt/
vnnd in ſein alte Herberg begeben/ auch
ſein fleiſſige nachfrag bey den Chriſtli-
chen Kauffleuten haben/ was fuͤr Schiff
zu Alexandria verhanden/ wohin vnnd
wie baldt ein jegliches abzulauffen ge-
ſinnet.
Beynebens ſo woͤlle die Geſellſchafft
bedacht ſeyn/ wie auch vormals ver-
meldet worden/ damit ſie ſich alldort zu
Alexandria vil lieber auff ein Schiff be-
geben/ ſo nach Malta oder Sicilia/ als
nach Venedig lauffe/ damit ſie deß lan-
gen ſchiffens vberhohen: vnd durch ſol-
ches Mitl Jtaliam perluſtriern/ vnd be-
ſehen moͤgen.
So nun die Geſellſchafft ein Schiff
jhrer gelegenheit nach/ erfragt hat/ kan
ſie ſich alsdann mit pꝛouiant/ als brodt/
Wein/ Kaͤß/ geſelchten Ochſenzungen/
gebraten oder Marimerten Fiſchen/
Fruͤchten/ vnd andern notwendigen ſa-
chen/ verſehen.
Volgents ſo ſollen ſie ſich auch vmb
einen wol bekanten Jaͤnitſcharn bewer-
ben/ welcher ſie biß auff Alexandria be-
laitte.
Die Herberg zu Alexandria betref-
fent/ kan jeglicher inn einem Fontico/ ſo
jhme zum tauglichiſten zuſeyn geduͤnckt/
einkehren/ auch alldort/ vmb gute gele-
genheit/ ehiſt abzuſchiffen/ fleiſſig nach-
frag haben/ dann nicht rathſamb/ ſich al-
dort lang auffzuhalten.
Was maſſen ſich aber ein jeglicher
auff folgende Raiß mit Eſſen/ Trinckẽ/
vnd andern beduͤrfftigen Sachen verſe-
hen muß/ auch wie er mit dem Patron
deß Schiffs/ wegen der Tafel vnd Fuhꝛ-
lons handlen ſolle/ wird der Pilger zum
theil ſelbſt gelernet haben/ zum theil aber
ſo mag er ſich in obbeſchriebener meiner
Jnſtruction erſehen/ vnd beynebens der
Kauffleuth Raht hieruͤber pflegen/ doch
kan nit ſchaden/ daß ſich ein jeglicher/ mit
Eſſen/ Trincken/ vnd warmer Klaidung
wol veꝛſehe/ dann die heraußfahꝛt wegen
deß boͤſen Gewitters/ vnd contrarii Win-
den/ vil lenger dañ die hinnein fahrt ſich
erſtrecken thut.
Zu dem/ ſo ſolle auch jeglicher wiſſen
vnd jhme nicht anderſt gedencken/ dann
daß es mit Eſſen/ Trincken/ Ligerſtatt/
vnd vaſt allen andern Sachen/ auff das
ſchlechtiſt vnnd vbleſt zugehen werde:
Derohalben ſo wird ſich ein jeglicher/ ſei-
nes Verſtandts hierinnen gebrauchen/
der Gedult nit vergeſſen/ vnd das
vbrig Gott dem HErꝛn
befehlen.
Der trewhertzige Leſer woͤlle ſich nicht
verwundern/ ſo er die Mintzordtnung
zu ſeiner hineinkunfft verendert/ vnnd
das Geld in hoͤhern Werth finden wird/
als vonn mir alhie verzeichnet worden.
Dieweil die Muͤntz bey den Tuͤrcken ſo
wohl vnd mehrers als bey vns Chriſten
ſteigen thut.
Welcher derohalben luſt vnd gefal-
len ſein Geld hoch anzuwerden/ vnd jhn
daſſelbe trucken thut/ der kan ſolches inn
Tuͤrckey in hohen Werth ſpendiern/ vnd
mit laͤrem Beutel widerumb zu Hauß
kommen. Mich gleich wol (Gott Lob)
tawert mein außgeben Geld gar nicht/
welches ich auff ſolcher Raiß verzehꝛet/
wolte auch nicht noch einmal ſo vil Geld
darfuͤr nemmen/ daß ich ſolche Raiß nit
verꝛicht. Wolte aber auch nit zehen mal
ſouil Gelt nem̃en/ daß ich ſolche Raiß
zum andernmal verſuchen ſolt.
OHerꝛ fuͤhre mich auff deinen weg/ ſo
werde ich heꝛein gehn in deiner war-
heit. Mein Hertz ſoll ſich frewen/
auffdaß es foͤrchte deinen Namen.
GEbenedeyet ſey der Herꝛ der Gott Jſ-
rael: Dann er hat ſein Volck heimbge-
ſucht vnd erloͤſet.
Auff den Weg deß friedens/ heils vnnd
gluͤcklichheit/ richt vñ laite vnſere gaͤng/ vñ
dein guter Engel ſey vnſer beleiter zuweiſen
vnſere fuͤß auff den weg deß fridens/ auff dz
wir mit heil vnd gluͤckſeligkeit hingehen/ vñ
widerumb heimkom̃en. Kyrie eleiſon Chꝛi-
ſte eleiſon/ Kyrie eleiſon. Vatter vnſer/ ꝛc.
GEbenedeyet ſey der Herꝛ Gott alle tag.
Ein gluͤcklichen weg mach vnns vnſer
Heylaͤd. Gott vnſer Gott heylſam zumachẽ
Vñ in dem namen deß Herꝛn iſt der anfang
deß todts. Der Feind moͤg nichts wider vns
ſchaffen. Vnd der Sohn der Boßheit moͤg
vns kein ſchaden zulegen. O Herꝛ biß vns
deß Feinds. Herꝛ erhoͤre mein Gebett. Vnd
mein Geſchrey komb zu dir.
OGott/ der du biſt ein fuͤhrer deiner Hei-
ligen/ ordne den Engel deß Friedens
mit deinen Dienern/ der vns zu dem fuͤrge-
nommen Ort friſch vnd geſund fuͤhr vnnd
widerfuͤhr/ Er ſey vns ein froͤlicher Gefert/
vnd damit kein Feind vns den Weg abſte-
le, ſo ſey weit vnnd ferꝛ vonn vns der boͤſen
Geiſter zugang. Vnnd der H. Geiſt woͤll
vnſer Gefehrt ſeyn. Durch vnſern Herꝛn/ ꝛc.
OGott/ d’ du die drey Weiſen von Orient/
Caſparn/ Melchiorn/ vnd Balthaſarn/
zu deiner Kindtlichen Krippen/ ohn allen
verzug durch laitung deß Sterns gefuͤhret
haſt/ auff daß ſie dich mit Geheimbnusga-
ben ehreten: Verleyhe gnaͤdigklich/ durch
diſer dreyer Koͤnig gaben/ guͤtige fuͤrbitt vñ
verdienſt/ vns deinen Dienern auff dieſem
Weg den wir gehen/ Behendigkeit/ Frewd
Gnad vnnd Friedt/ daß wir durch dich/
der du die wahre Sonn/ der wahre Stern/
vnnd das wahre Liecht ſelbſt biſt/ mit
heyl zu dem verordneten Ort kommen/ vnd
nach wol verꝛichten Geſchefften/ mit al-
ler Glaͤckſeligkeit friſch vnd geſund wider-
reſt Gott von Welt zu Welt/ Amen.
Darauff ſprich
Auff den Weg deß Friedens vnnd der
gluͤckſeligkeit/ fuͤhr vns die Krafft der heili-
gen Dreyfaltigkeit/ vnd der Engel der mit
Tobia gieng/ mache vnns diſe Fahrt leicht
vnd ring.
ALlmechtiger ewiger Gott/ der du die
Kinder Jſraels inn aller Sicherheit
auß Egypten belaitet/ dieſelben auch
geſund vnnd vnbeſchaͤdigt durch das rotte
Meer/ vñ durch den Jordan gefuͤhrt haſt/
ich bitte dich demuͤtigklich/ du woͤlleſt mich
armen Suͤnder auff diſem Waſſer fahꝛent/
vor aller Widerwertigkeit bewahren/ vnd
zu dem begerten Landt vnnd Geſtadt mit
Geſundtheit vnd Frewden kommen laſ-
ſen. Durch vnſern HErꝛn JE-
ſum CHriſtum/
Amen.