Dieses Werk steht unter der „Creative Commons Namensnennung-Weitergabe unter gleichen Bedingungen 3.0 Deutschland Lizenz“ (CC BY-SA).
Fraktur
Jch weiß daß mein Erloͤſer lebt/ ꝛc.
ACHtbarer/ Wolgelahrter/ Guͤnſtiger
Herꝛ Nachtbar/ vnd Jnſonders guter
Freund/ daß verwichener Tagen vnſer
lieber Gott auß ſeinem ſonderlichen Rath
vnd Wolgefallen ewere geliebte Haußfraw ſelige auß
dieſem Jammerthal gefordert/ trage ich deßwegen vnd
vber dieſem ewerm betruͤbten Zuſtand/ neben andern
frommen Chriſten billich ein Hertzliches Mitleyden.
Nach dem wir aber jhr den letzten Dienſt Chriſtlichem
Brauch nach geleiſtet/ in deme/ daß wir jhr das Geleyt
zu jhrem Ruhebetlein gegeben/ vnd mir/ dieweiln ſie
mein Pfarꝛkind geweſen/ jhr zu Ehren vnnd Gedaͤcht-
niß/ euch/ als jhrem hinterlaſſenen Eheman/ vnd an-
deren noch im Leben ſchwebenden frommen Chriſten/
zum Troſt vnd Vnterꝛicht/ eine Leichſermon zu thun/
meines erachtens gebuͤren wollen/ welches auch nach
Vermoͤgen geſchehen/ da ich zwar euch in einem an-
dern vnd froͤlichern Zuſtand lieber hette dienen wollen:
So dann jhr euch hier zwiſchen/ der Geſtalt vernemen
laſſen/ gedachte Sermon ewrer geliebten Haußfrawen
andern Gottliebenden Chriſten zu deſto beſſerm Vnter-
richt vnd Troſt/ zu publiciren/ auch an mich geſunnen/
ſolches euch vnbeſchwert zu communiciren: So habe
ich euch gratificiren wollen/ vngeachtet/ ich gern beken-
ne/ daß dieſelbige Sermon einfeltig/ vnnd fuͤr hochge-
lahrte Leute (beſonder aber Meiſter Kluͤgling) nicht iſt.
Doch gleichwoln hoffent/ es werde damit dannoch ein-
feltigen vnd ſchlechten Leuten/ ſonderlich aber denen/
welchen Gottes Wort (in deme ich dieſe Predigt ohne
verdrießlichen Ruhm zu melden/ fundirt weiß) ein
rechter Ernſt iſt/ etwas gedienet ſeyn. Thue demnach
euch ſolche Sermon hiemit vbergeben vnnd dedici-
ren/ auch in ewere Willkuhr ſtellen/ dieſelbige in den
Truck zu fertigen oder nit/ dienſtlich bittend/ damit fuͤr
lieb zu nemen/ vñ darauß kein anders/ als daß ichs gut
vnd hertzlich mit euch meyne/ zuvermercken/ bin auch
erbietig/ do ich euch in andere Weg gefellige Dienſte/
zumaln meines tragenden Ampts halben erweiſen
kan/ mich jederzeit willig finden zulaſſen. Hiemit dem
vnvberwindlichen Schutz Goͤttlicher Allmacht/ euch
in ewerer Triſtitia befehlende. Datum Vnfind/ den
3. Octobris, S. V. Anno 1606.
ACh daß meine Reden geſchriebenVerſ. 23.
wuͤrden/ Ach daß ſie in ein Buch
geſtellet wuͤrden.
Mit Eyſern Griffeln auff Bley/ vnd24.
zum ewigen Gedaͤchtniß auf einen Felß
gehawen wuͤrden.
Aber ich weiß daß mein Erloͤſer lebet/25.
vnd er wird mich hernacher auß der Er-
den aufferwecken.
Vnd werde darnach mit dieſer meiner26.
Haut vmbgeben werden/ vnnd werde in
meinem Fleiſch Gott ſehen.
Denſelben werde ich mir ſehen/ vnnd27.
meine Augen werden jhn ſchawen/ vnnd
kein Frembder.
DJEſer abgeleſene Spruch iſt/ Geliebten im
HErꝛn Chꝛiſto/ einer von den fuͤrnembſten Spruͤchen
deß lieben Hiobs/ den man gemeiniglich den gedulti-
ſten Capitel ſtehet/ daß er ſey geweſen ein ſehr frommer/ reicher vnd
Gottsfoͤrchtiger Mann im Lande Vz. Vnd geben die Hiſtorien/
daß er ſey geweſen ein maͤchtiger Herꝛ vnd Koͤnig in Jdumea. Jm
wird daſelbſt vermeldet/ daß er Bela dem Koͤnig in Edom/ ſucce-
dirt/ iſt ohne Zweifel wegen ſeiner Froͤmmigkeit vnd Auffrichtigkeit
zum Koͤnig erwehlet worden: Wie er ſich dann in ſeinem Buch
behalten/ kuͤhnlich rümen darff: Nemblich/ wie er geweſen ſey/ deß
Blinden Aug/ deß Lamen Fuß/ vnd ein Vatter der Armen. Sein
Heymat oder Vatterland hat geheiſſen Bazra/ welche Statt ſon-
wird/ darumb/ daß am ſelben Ort viel/ vnd guter Wein gewachſen
pitel/ in der Weiſſagung von Chriſto gedacht. Seine Wohnung
aber hat Hiob gehabt zu Aſtharoth Carnaim im Stamm Manaſ-
ſe/ vierzehen Meylen von Jeruſalem/ an welchem Ort vor Zeiten
groſſe vngehewre Leut vnd Rieſen gewohnet/ durch welcher Macht
er die Koͤnigliche Wuͤrden erhalten. Jnmaſſen dann auch der Koͤ-
nig Ochus geweſen/ zur Zeit/ da die Kinder Jſrael das gelobte
Land eingenommen/ der auch ſeine Wohnung allda gehabt. Vnd
groſſen Eyſern Bette/ ſo derſelbige gehabt/ welches neun Elen lang
vnd vier Elen breit geweſen. Es wollen die alten Lehrer/ als Phi-
lo/ Hieronymus/ Ambroſius/ Auguſtinus vnd Lutherus/ daß Hiob
man oder Eydam geweſen/ vnnd die Dinam zum Weibe gehabt/
von dem er denn zweiffels ohn viel guts von Chriſto dem verheiſſe-
nen Meſſia gehoͤrt vnd gemerckt/ auch die oberzehlten Wort dar-
auff gegruͤndet haben wird. Dieſer Hiob wird nun allen Chriſten
zum Beyſpiel vnd Exempel der Gedult/ in allerley Creutz vnd Wi-
derwertigkeit/ ſo er außgeſtanden/ vnd wie er ſich darunter verhal-
ten/ iſt vom H. Geiſt auff gezeichnet/ der H. Bibel einverleibt/ vnd
allen Glaubigen zur Lehr/ Troſt/ vnnd zum Exempel der Gedult
hinterlaſſen worden. Wie der H. Paulus Rom. 15. Capitel ſagt:
Was vorhin geſchrieben iſt/ das iſt vns zur Lehre geſchrieben/ auff
daß wir durch Gedult vnd Troſt der Schrifft Hoffnung haben.
Jn was groſſen Wirden vnd Anſehen/ vnd wie heylig der lie-
be Hiob geweſen/ das iſt auß dem 14. Cap. deß Propheten Ezechie-
lis zu ſehen/ da Gott alſo ſagt: Wenn ſich ein Land an mir verſuͤn-
diget/ vnd darzu mich verſchmehet/ ſo wil ich eine Thewrung hin-
ein ſchicken/ die beyde Menſchen vnnd Viehe außrotten ſoll/ vnd
wann gleich die drey Maͤnner/ Noah/ Daniel vnd Hiob drinnen
weren/ ſo wuͤrden ſie allein jhr eigene Seel erꝛetten/ durch jhre Ge-
rechtigkeit.
Was nun deß lieben Hiobs verleſene Wort anlanget/ ſo erzeh-Tranſitio.
let/ ſind ſie zum Leichargument darumb vorgenommen worden/
weiln dieſelbige vnſere verſtorbene Mitſchweſter/ deß Achtbarn
vnd Wolgelahrten/ Herꝛn Balthaſarn Friderichs/ Offenbaren
Keyſerlichen Notarij allhie zu Vnfind/ geliebte Haußfraw ſelige/
deren wir jetzo zu jhres Leibs Ruhebettlein das Geleyt geben/ neben
andern vielen Troſtſpruͤchen auff jhrem Lager/ wider die Anfech-
tung deß Todtes ſonderlich gebrauchet/ offt widerholet/ vnnd ſich
derſelben zum hoͤchſten getroͤſtet hat. Darnach auch/ dieweiln die-
ſer Spruch viel ſchoͤner troͤſtlicher Lehren in ſich hat/ damit ſich die
jenigen/ ſo noch im Leben (derentwegen auch die Leichpredigten
ſonderlich geſchehen) zu troͤſten haben/ von welchen er auch ſoll/ nit
mit Eyſern Grieffeln auff Bley/ ſondern ins Hertz eingeſchrieben
werden.
Es iſt aber dieſer Spruch ein ſonderlich Bekaͤnntniß geweſen/
Propoſi-
tio.
nes Lebens/ ſondern in euſſerſter Noth gethan. Wollen demnach
I.
Hiob diß ſein Bekaͤnntniß geſtellet/ Nemblich auff ſeinen lebendi-
II.
Zuflucht zu ſolchem ſeinem Erloͤſer habe/ vnnd was er von jhm ge-
waͤrtig ſey. Von dieſem einfeltig zu reden/ wolle vns der
Himmliſche Vatter ſein Gnad vnd heyligen Geiſt ver-
leyhen/ vmb Chriſti Willen/ Amen.
DAß es dem lieben Hiob mit dieſem ſeinem Bekaͤnntniß ein
Ernſt geweſen ſeyn muͤß/ iſt auß der Zeit vnnd ſeinem Zu-
ſtand zu vernemen/ denn er ſolchs nicht gethan/ da er noch
in Gluͤck vnd Ehren geſchwebet/ da er noch hatte ſeine viel Tauſent
Cameel/ Schafe/ Ochſen vnd Rinder: Jtem ſeine liebe Kinder/
Hauß/ Hoff vnd andere ſtattliche Guͤter/ das iſt/ da es jhm noch
gluͤcklich vnd wol gieng/ denn da heiſt es gemeniglich/ wie David
nider ligen/ Pſalm 30. So hat ers auch nicht gethan/ da er ſchon al-
le Truͤbſall vberwunden/ vnnd ſeines Theils die gemeine Schuld
der Natur bezahlt/ das iſt/ da er ſchon todt vnnd im Grab gelegen.
Dann wann es ſo weit kommet/ ſo heiſts/ wie auch David ſpricht/
dir in der Hoͤlle dancken? Wann hat ers denn gethan? Zu dero
Zeit/ da er mit boͤſen hitzigen Blattern geſchlagen ward/ von ſeinen
Fußſohln biß auff ſeine Scheittel/ da er vor groſſem Schmertzen
nicht wuſte/ wo er bleiben ſolte/ ſaſſe vor groſſem Wehetagen in der
Aſchen/ vnd ſchabet ſeine Haut mit ſcherben/ da ſeine Seel auch
von ſeinen Freunden geplaget ward/ da ſein Gebein an ſeiner Haut
hienge/ ſein Geſtalt verfallen/ da er ſeine Zaͤhne nicht mehr bedecken
er mitten in ſolcher Noth an/ vnd thut ſein Bekaͤnntniß. Es iſt aber
ſein Meynung vnd begeren/ daß dieſe ſein Red nicht ſoll verborgen
bleiben/ ſondern ſoll auff die Nachkommen gebracht werden/ da-
rumb ſagt er: Ach daß dieſe meine Rede geſchrieben wuͤrden/ daß‚
ſie in ein Buch geſtellet/ mit Eyſern Grieffel auff Bley/ vnnd 〃
zur ewigen Gedaͤchtniß/ in einen Felß gehawen wuͤrden. Be-〃
gert alſo einer vngewoͤhnlichen Schreiberey/ oder Weiß zu ſchrei-〃
ben/ an ſtatt deß Papyrs fordert er Bley/ vnd an ſtatt der Schreib-〃
federn begert er einen Eyſern Grieffeln/ an ſtatt eines Buchs einen
Stein oder Felß/ damit was drauff geſchrieben wuͤrde/ kein Han/
(wie man pflegt zu ſagen) außkratzen koͤndte: Wie vor Zeiten die
Roͤmer jhre Leges oder Geſetz auff Kupffer gegraben. Vnd von A-
dam wird geſagt/ daß er zwo Tafeln oder Seuln/ eine Ziegelſteine-
ne/ vnd eine von Marmelſtein ſoll gemacht haben/ darauff deß
Menſchen Fall/ vnd die erſte Verheiſſung von dem gebenedeyten
Weibsſamen geſtanden/ damit ſolche Schrifft in Waſſer oder
Fewersnoͤthen nicht außgeleſchet werden koͤndte. Gibt hiemit der
liebe Hiob zu verſtehen/ daß er nit allein ein Frewd hab/ ſein Sterb-
bekaͤnntniß zu thun/ ſondern er wil auch/ daß es auff die Nachkom-
kommen biß an der Welt Ende moͤge gebracht werden. Dann gu-
te Reden vnd feine Lehren von dem Sohn Gottes/ von der Zucht
vnd Erbarkeit ſollen billich auffgezeichnet/ vnd auff die Nachkom-
men gebracht werden. Jm Gegentheil loſe Schandboſſen/ Nar-
renteidigung vnd Schmaͤhekarten zu verbrennen vnd abzuſchaf-
fen ſind.
Hiemit gibt vns Hiob ein fein Exempel/ wie wir auch auff vn-Doctrina
ſer Bekaͤnntniß gegen vnſerm letzten Ende ſollen bedacht ſeyn/ wel-
ches aber die Welt fuͤr ein geringes/ oder gar nichts achtet. Der
mehrer Theil trachtet darnach/ wie er groß Gelt vnd Gut zuſam-
men bringe/ vnd ſeinen Nachkommen ein groſſe Erbſchafft hinder-
laſſen moͤge. Etliche bemuͤhen ſich durch Ritterliche Thaten/ jh-
nen einen groſſen Namen zu machen/ vnd leſſet derowegen mancher
mern zu leſen iſt. Viel gelehrte Leut ſtudiren Tag vnd Nacht/ Fruͤ
vnd Spat/ laſſens jhnen ſawer werden/ gantze Buͤcher zu ſchrei-
ben/ vnd in Truck zu verfertigen/ welche ſie partus Ingenii, Geburt
deß Gedaͤchtniß nennen/ Darumb/ wie es einer Matronen ſawer
wird/ jhr Kindlein auff die Welt zu bringen: Alſo wird es einem
Gelehrten ſawer/ biß er ein gantzes Buch zuſammen ſchreibet/ vnd
zu wegen bringt/ alles darumb/ daß ſie jhnen bey der Welt einen vn-
ſterblichen Namen machen/ wie wol es aber allezeit getroffen/ vnnd
was andern Leuten damit gedienet/ das iſt Gott bewuſt. Dem groͤſ-
ſern Theil koͤndte man fuͤglich ſagen/ was der HErꝛ Chriſtus/ Lu-
æ am zehenden Capitel Marthæ geantwortet hat: Dann da der
HErꝛ bey jhr einzog/ ließ ſie es jhr bey der Gaſtung ſehr ſawer wer-
den. Mittler weil/ als jhre Schweſter Maria Jeſu zu den Fuͤſſen
ſaß/ vnd ſeiner Rede zuhoͤret/ trat endlich Martha zu Chriſto/ vnd
ſprach: Frageſtu nichts darnach/ daß mich meine Schweſter leſt
allein dienen/ ſage jhr/ daß ſie es auch angreiffe? Da gibt jhr der
HErꝛ Chriſtus zur Antwort: Du haſt viel ſorg/ Vnum eſt neceſſa-
rium, Eines iſt ein Nothwerck. Was iſts dann/ das ſonoͤtig iſt? Jn
die/ ſo in dem HErꝛn ſterben/ von nun an/ dann ſie ruhen von jhrer
Arbeit/ ꝛc. Die ſterben aber in dem HErꝛen/ die vor jhrem Ende
ein richtiges Bekaͤnntniß thun/ welches einig/ vnd von denen allein
geſchicht/ die ſich bey Lebens zeiten Chriſtlich dar zu bereiten/ vnnd
mit allerley Gottſeligen Gedancken gefaſt machen/ vnd ſonderliche
Fuͤrſorge darauff tragen/ wie an den fuͤrnembſten Heyligen zu ſe-
hen/ welcher Bekaͤnntniß der H. Geiſt excipirt/ vnd der H. Bibel
einverleibt hat: Als da ſeynd die letzten Wort deß Patriarchen vnd
æ reden vor ſeinem Ende/ in ſeinem
æ am 2. Capitel. Die Heyden haben ſich zwar auch be-
muͤhet/ jhre Reden vnd Thaten bekandt zu machen/ welche doch
nichts ſind gegen die Symbola vnnd Bekaͤnntniſſen Gottſeliger
Leute/ darinnen Gott geehret vnd gepreiſet wird/ dieſe ſind ja frey-
lich werth/ daß ſie mit Eyſern Grieffeln auff Bley vnd Stein ge-
graben werden.
Worauff beruhet nun Hiobs Bekaͤnntniß/ das er ſo fleiſſig
wil auffgezeichnet haben? Das gibt er ſelbſten zu erkennen/ da er
ſpricht: Scio quod Redemptor meus vivit: Jch weiß/ ſpricht er/ Was
weiß Hiob? Vielleicht iſt jhm die Stunde ſeines Sterbens ange-
kuͤndet worden/ vnd weiß/ daß es ein Ende mit ſeinem Leben hat?
Mit nichten/ dann da heiſt es/ wie der Prediger Salomon ſagt/ am
9. Capitel: Neſcit homo tempus ſuum, Der Menſch weiß ſein Zeit
nicht/ ſondern wie die Fiſch gefangen werden mit einem ſchaͤdlichen
Hammen/ vnd wie die Voͤgel mit einem Strick werden gefangen/
Alſo werden auch die Menſchen beruckt zur boͤſen Zeit/ wenn ſie
ploͤtzlich vber ſie fellet. So bezeugt auch Hiob ſelbſten im 38. Capi-
tel. So wenig als ein Menſch die Zeit ſeiner Geburt habe wiſſen
moͤgen/ ehe er ein Menſch geweſen/ ſo wenig ſey jhm auch die ſtund
ſeines Todts vnnd Sterbens bekandt. Derowegen ein jeder ſa-
gen vnd bekennen muß/ wie Jſaac im erſten Buch Moſis am 27.
Capitel ſpricht: Jch weiß nicht/ ſagt er/ wenn ich ſterben werde. E-
bener maſſen iſt vns auch der Ort/ die Statt/ Weiſe vnnd Maß zu
ſterben vnbewuſt/ vnd were dem Menſchen nichts damit gedienet/
wenn er ſein Sterbſtuͤndlein/ vnd die Weiſe deſſelben wuͤſte/ es were
jhm ein gedoppelte Plag/ dann die eine were der Todt an jhm ſelb-
ſten/ vnd die Andere/ die bewuſte Zeit zu ſterben. Was weiß denn
Hiob? Jch weiß/ ſpricht er/ daß mein Erloͤſer lebet. Das iſt: Jch
glaube vnd weiß gewiß/ daß mein Erloͤſer vnnd Heyland/ der fuͤr
mich leyden/ ſterben/ widerumb von den Todten aufferſtehen/ vnd
fuͤr meine Suͤnde buͤſſen wuͤrd/ lebet/ derſelbige/ wie er iſt Gottes
Sohn/ vnd das Leben ſelbſt/ ja der auch das Leben außtheilet/ der le-
bet. Obwol meine Haut verſchrumpffen/ mein Fleiſch verſchwun-
den/ So weiß ich doch/ vnd glaube gewiß/ daß mein Erloͤſer lebet/
der mir durch ſeine Auff
das Leben widerumb geben wird. Das iſt nun ein fein herꝛlich Be-
kaͤnntniß/ ſo recht vberein ſtimmen thut/ mit der Außlegung deß An-
dern Artickels/ vnſers Chriſtlichen Glaubens/ da wir ſprechen:
Jch glaube/ daß Jeſus Chriſtus warhafftiger Gott vom Vatter in
Ewigkeit geboren/ ꝛc. ſey mein HErꝛ/ der mich verlornen vnd ver-
dampten Menſchen erloͤſet hat ꝛc. So viel bekennet Hiob: Jch
glaube vnd weiß gewiß/ daß der gebenedeyte Weibsſamen/ Jeſus
Chriſtus/ Gottes Sohn/ ſey mein HErꝛ/ der mich armen verlor-
nen Menſchen noch erloͤſen wird. Nennet Chriſtum/ auff den er
damals noch hoffete/ vnd der nunmehr vor 1606. Jahren/ vns al-
len zu gutem vnd ewigen Heyl erſchienen/ vnd auff die Welt kom-
men/ ſeinen Erloͤſer. Die Erloͤſung/ Rettung vnd Huͤlff auff die-
ſer Welt iſt mancherley: Es kan offt einer jemand erꝛetten vnd er-
loͤſen/ auß Waſſersnoth/ Als wir leſen von Moſe in ſeinem Andern
Joſephus
lib. 2. An-
tiq. c. 6.
Zach. 3.
erhalten hat. Ein anderer kan in Fewersnoth Rettung thun/ wie
Zacharias am 3. Capitel vom Hohenprieſter Joſua/ Joſedechs
Sohn ſchreibet/ der auß dem Fewer/ als ein Brandt gezogen vnd
ledig gemacht worden iſt. Gideon hat die Kinder Jſrael erloͤſet von
der Midianiter Hand. Symſon/ von der Philiſter Hand. Jn
leiblichen Noͤthen vnd Anfechtungen/ koͤnnen Menſchen offtmals
einander beyſpringen/ die Hand bieten/ vnd auß einer Gefahr helf-
fen. Aber vnſer Hiob redet hie von einem ſtarcken vnd maͤchtigen
Erloͤſer/ der nicht allein auß leiblichen Noͤthen retten/ ſondern auch
von allem Vbel/ wie es mag Namen haben/ erloͤſen kan/ von dem
rael erloͤſen wird/ auß allen ſeinen Suͤnden.
Anfaͤnglich erloͤſet er vom Schaden der Erbſuͤnd/ welches ge-
ſchicht alßbalden in der H. Tauff/ da wir auß dem Reich deß Teuf-
nach erloͤſt er vns von der Tyranney/ Gewalt vnnd Boßheit deß
boͤſen Feindes/ deß Teuffels/ welcher herumb ſtreichet/ wie ein bruͤl-
lender vnd reiſſender Loͤw/ vnd ſuchet/ welchen er verſchlinge. Er
erloͤſet vns von allerley Gefaͤhrligkeiten/ die vns offtmals fuͤrſtehen.
Die letzt vnd hoͤchſte Erloͤſung geſchicht am letzten Ende/ da wir
von allerley zeitlichem Jammer/ Elend vnd Vngemach erꝛettet
werden/ wie wir ſingen: Sein Jammer/ Truͤbſal vnd Elend/ iſt
kommen zu einem ſeligen End. Jn der Welt muͤſſen wir jmmer-
dar vnter dem Creutz ſeyn/ dahin ſihet die Kirche/ in dem/ daß man
den kleinen Kindlein in der Tauff ein Creutz an die Stirn vnnd
Bruſt zu machen pfleget/ zur Anzeig/ daß ſolche Kindlein nun vn-
ter dem Creutzreich leben müſſen. Aber am letzten Ende hoͤrt ſol-
ches alles auff/ da werden wir von allerley Creutz vnd Truͤbſal erloͤ-
ſet. Wenn ein Menſch da erloͤſet iſt/ ſo kan fortan keine Plage zu
ſeiner Huͤtten ſich nahen. Auff dieſe Erloͤſung ſihet David im 31.
Pſalm/ da er ſpricht: Jn deine Haͤnde befehl ich dir meinen Geiſt/
du haſt mich erloͤſt du trewer Gott. Dieſes nennet nun Hiob ſeinen
Erloͤſer/ das iſt ein Wort voller Glaubens/ vnd ſetzet hinzu/ daß
derſelbig lebe. Dieſes hat Hiob zu ſeiner Zeit von Chriſto mit War-
heit bekennen koͤnnen/ dann er mit Gott dem Vatter vnd H. Geiſt
von Ewigkeit her gelebet vnd geregieret/ ja das rechte Leben ſelbſt
geweſen iſt/ ehe er Menſchliche Natur an ſich genommen/ vnd das
Werck der Erloͤſung in Menſchlicher Geſtalt verꝛichtet hat. Jm
Newen Teſtament koͤnnen wir jhn gedoppelt einen lebendigen Er-
loͤſer nennen: Einsmals/ daß er ſeiner Goͤttlichen Natur nach/ ewig
lebet/ vnd das Leben (wie zuvorn gemeldet) ſelbſten iſt: Darnach/
nach ſeiner Menſchlichen Natur/ ſo er an ſich genommen/ den
Todt von vnſert wegen/ vnd vns zu gut/ erlitten/ aber im Todt nit
blieben/ ſondern/ als ein Hertzog deß Lebens/ widerumb auff erſtan-
den/ lebet vnd regieret ein Koͤnig ewiglich/ deſſen frewet ſich nun ein
jeder Chriſt/ vnd wie kan einem Chriſten troͤſtlichers widerfahren/
dann daß er mit Hiob weiß/ daß ſein Erloͤſer lebet.
Als dem Patriarchen Jacob angemeldet wurde/ daß ſein Sohn
ten/ ſprach er mit Frewden: Sufficit mihi, ſi filius meus adhuc vivit, Jch
habe genug/ daß mein Sohn Joſeph noch lebet. Vielmehr wil vns
Chriſten gebuͤhren/ von Chriſto zu ſagen/ daß wir genug haben/
weil Chriſtus/ welcher vnſer Leben iſt/ noch lebet. Dann mit Chri-
ſto in ſeiner Aufferſtehung vnſer Leben/ Heyl vnd Seligkeit erſtan-
〃 get: Gott/ der da Reich iſt/ von Barmhertzigkeit/ vnd ſeine groſſe
〃 Lieb/ damit er vns geliebet hat/ da wir Todt waren in den Suͤnden/
〃 hat er vns ſampt Chriſto lebendig gemacht/ ꝛc. Jn der 1. Corinth.
folgen/ daß auch Chriſtus nicht aufferſtanden were. Nun iſt ja
Chriſtus warhafftig von den Todten aufferſtanden. Derowegen ſo
muß auch folgen/ daß wir im Todt nicht bleiben/ dann in Krafft der
Aufferſtehung Chriſti muͤſſen auch vnſere Leibe widerumb auffer-
ſtehen. Wer das weiß vnd gewiß glaubet/ der hat gut ſterben/ er
darff ſich fuͤr dem Todt nicht entſetzen. Jm Pabſthumb laut es viel
anderſt/ da hat man die Klag dieſer Geſtalt gefuͤhret.
Jch lebe/ vnd weiß nicht wie lang/
Jch ſterbe/ vnd weiß doch nicht wann.
Jch fahre/ vnd weiß nicht wohin/
Mich wundert/ daß ich froͤlich bin.
Wir aber zu vnſern Zeiten wiſſens/ Gott ſey lob vnd danck/
viel anderſt vnd beſſer/ dann wir wiſſen/ daß vnſer Erloͤſer lebet/ zu
dem fahren wir auß dieſem Zeitlichen in das ewige Leben. Darumb
hat Lutherus ſeliger dieſe Reymen geaͤndert/ vnd alſo geſetzet:
Jch lebe/ vnd weiß nicht wie lang/
Jch ſtirbe/ vnd weiß doch nicht wann.
Jch
Jch fahre/ vnd weiß wol wohin/
Mich wundert/ daß ich trawrig bin.
Dahero lieſet man von dem H. Maͤrterer Stephano/ da er ge-
ſehen hat den Himmel offen/ vnd Jeſum ſtehen zur Rechten Got-
tes/ vnd geſagt: HErꝛ Jeſu/ nimme meinen Geiſt auff. Machet
alſo hiemit ſeinem zeitlichen Leben ein froͤliches vnd ſeliges Ende/
wie in den Geſchichten der Apoſtel am 7. Capitel zu leſen iſt. Jtem
Luc. 2.
der alte Gottſelige Simeon/ da er Chriſtum geſehen/ faͤnget er an
fuͤr Frewden: Nun HErꝛ leſſeſtu deinen Diener im Frieden fah-
ren/ ꝛc. Vnd der H. Apoſtel Paulus ſeufftzet gleichſam nach ſei-
nem Abſchied/ in dem er ſagt/ Philip. 2. Jch begere auffgeloͤſt zu
werden/ vnd bey meinem HErꝛn Chriſto zu ſeyn. Vnd wer auch/
wie Hiob ſein Zuflucht zu Chriſto ſeinem Erloͤſer hat/ der kan dem
zeitlichen Todt gantz froͤlich vnter die Augen ſehen. Vnd diß ſey
fuͤr das Erſte geſagt.
WAs haͤt dann nun Hiob in ſeinen Noͤthen fuͤr Zuflucht zu
ſeinem Erloͤſer/ vnnd was guts verſihet er ſich zu jhm?
Da hoͤret/ lieben Chriſten/ was er ſagt: 1. Er wird
mich hernacher auß der Erden aufferwecken. 2. Vnd
werde mit dieſer meiner Haut vmbgeben werden.
3. Vnd werde in meinem Fleiſch Gott ſehen. 4. Jſts
nicht genug/ ſondern ſetzt noch hinzu: Denſelben werde ich
mir ſehen/ vnd meine Augen werden jhn ſchawen/ vnd
kein Frembder. Da hoͤrt lieben Chriſten/ wie dem lieben Hiob
ſeine Wort daher flieſſen/ er weiß nicht/ wie er ſeines Hertzen Ver-
langen vnd Begierde ſoll gnugſam an den Tag geben/ vnd wie er
ſich der Aufferſtehung am juͤngſten Tage/ vnnd deß froͤlichen An-
ſchawens vnſers Heylands vnd Erloͤſers Jeſu Chriſti/ auffs ge-
floſſen/ ſondern von Gott dem Himmliſchen Vatter/ durch den
hoͤchſten Troͤſter/ den H. Geiſt/ gegeben worden/ Wie Chriſtus
Matthæj am 16. zu Petro ſagt: Fleiſch vnd Blut hat dir das nicht
offenbaret/ ſondern mein Vatter im Himmel/ ꝛc.
Doctrina
derer am juͤngſten tag in aufferſtehung der todten/ aufferwecket wer-
de. Eben dieſe Haut/ in deren wir jetzo ſtecken/ werden wir wider-
umb bekommen/ vnd damit vmbgeben werden. Dieſe Gliedmaſ-
ſen/ ſo wir jetzo brauchen/ die Augen/ damit wir dieſer Zeit ſehen/
werden wir widerumb erlangen/ vnnd damit vnſern trewen Hertz-
liebſten Heyland vnd Seligmacher/ Jeſum Chriſtum anſchawen/
Gregor.
M. Mor.
lib. 14.
cap. 29.
maln/ als er gleich ſterben wollen/ vnd auff ſeinem Todtbettlein ge-
legen/ auch zu erkennen gegeben/ dann er auff ſeiner Hand die Haut
mit ſeinen Fingern gefaſſet vnd geſagt: Credo, quod in hac carne re-
ſurgemus omnes, Jch glaube/ daß wir in dieſem Fleiſch alle aufferſte-
Veteris
Eccleſiæ
Confeſ-
ſio.Symbolum Apoſtolicum, er-
zehlet/ vnd kommen ſind auff den Artickel/ Jch glaube ein Auffer-
ſtehung deß Fleiſches/ Haben ſie mit jhren Haͤnden auff ſich ſelb-
ſten gezeigt vnd geſagt: Credo reſurrectionem huius carnis, Jch glau-
be eine Aufferſtehung DIESES Fleiſches. Hiehero kan man
auch ziehen das ſchoͤne Geſicht deß Propheten Ezechielis/ Da
jhm gezeigt einen ſehr groſſen Hauffen verdorꝛete Todtenbein/ vnd
gefragt/ ob er auch darfuͤr halte/ daß dieſelben widerumb koͤndten le-
bendig werden? Darauff der Prophet mit dieſen Worten ant-
wortet: HERR/ das weiſeſtu wol. Hierauff heiſt jhn der HErꝛ
weiſſagen/ vnd die Gebein anſprechen/ welches denn alßbalden ge-
ſchehen/ vnnd haben darauff die Gebein angefangen ſich zu regen
vnd zu rauſchen/ iſt eines zum andern kommen/ vnd mit Fleiſch vnd
Adern vmbgeben worden. Weil aber noch kein lebendiger Athem
in jhnen war/ So hat Gott dem Propheten weitter dieſen Befehl
Odem in ſie bringen ſolten/ welches auch geſchehen/ vnnd ſind alſo
die Todtenbein alle widerumb lebendig worden/ haben ſich auff ge-
richtet/ vnd ſind auff jhre Fuͤß getretten/ vnd ſtehet im Text darbey/
daß jhr ein ſehr groſſes Heer geweſen ſey.
Hier auß hat man nun leichtlich zu gedencken/ warumb wir vn-
ſere Verſtorbene fein Chriſtlich vnd Ehrlich zur Erden beſtatten/
Nemblichen darumb/ dieweil ſie hie geweſen ſind/ Tempel vnd
Wohnungen Gottes deß H. Geiſtes/ Wie in der Erſten Epiſtel
an die Corinther am 3. vnd 6. Capitel zu vernemen. Vnd dann/
dieweil ſie am juͤngſten Tage widerumb warhafftig aufferſtehen/
vnd vnverweßlich werden herfuͤr gehen. Darzu vermahnet Sy-
rach am 38. Capitel/ mit dieſen Worten: Mein Kind/ wenn einer
ſtirbt/ ſo beweine jhn/ als ſey dir groß Leyd geſchehen/ verhuͤlle ſei-
nen Leib gebuͤhrlicher weiß/ vnd beſtatte jhn ehrlich zur Erden/ ꝛc.
Das aber/ ſo jetzo vermeldet/ haben die armen Heyden nicht ge-
wuſt/ darumb ſie offtermaln gar grewlich mit jhren Verſtorbenen
vmbgangen/ etliche haben ſie ins Waſſer verſencket/ etliche haben
ſie den wilden Thieren zu verzehren/ fuͤrgeworffen. Die Roͤmer
haben dißfals vor andern Nationen wollen geſehen ſeyn/ in dem ſie
jhre Todten verbrandt/ vnnd hernacher die Aſchen fuͤr groß Hey-
ligthumb auffgehaben. Wir Chriſten aber/ die wir den Artickel
von der allgemeinen Aufferſtehung glauben vnd wiſſen/ begraben
vnſere Verſtorbene Ehrlicher weiß/ vnd ſind die ſchoͤnen Ceremo-
nien darzu geſtifftet vnd geordnet/ als da iſt das Geleut/ da man mit
den Glocken ein Gedoͤn machet/ zur Anzeigung/ wann Chriſtus
kommen wird mit dem Hall vnd Schall der letzten Poſaunen/ vnd
deß Ertzengels/ daß wir da bald auffwachen/ vnd Chriſto entgegen
gehen werden/ Wie Paulus in der Erſten Theſſ. am 4. ſchreibet.
Man pflegt an vielen Orten deß Chriſttnthumbs/ den Verſtorbe-
nen einen weiſſen Sterbkittel/ auch anderer Orten ſonſten ein rein-
lich vnd ſauber Kleid anzuziehen/ zur Anzeigung/ daß ſie nun den
Suͤndenrock außgezogen haben/ vnd dargegen deß ſchoͤnen Ehren-
Apoc. 7.
die Gerechten in groſſer Anzahl ſtehen fuͤr dem StuelGottes/ ange-
than mit weiſſen Kleidern/ ꝛc.
Man braucht auch feine Chriſtliche Geſaͤnge/ von ſchoͤnen
Worten vnd herꝛlichen Melodeyen componirt vnd zuſammen ge-
ſetzet/ in welchen feinen Geſaͤngen wir nicht allein der Sterbligkeit
vns erinnern/ ſondern auch zugleich wider dieſelbige/ der gewiſſen
froͤlichen Aufferſtehung am juͤngſten Tage/ Chriſtlich gedencken.
Deßgleichen pflegt man den Verſtorbenen ein Creutz vorzu-
tragen/ damit ſo viel wird zu erkennen gegeben/ daß dieſelben auff
das Creutz vnd den Todt Chriſti ſeliglich geſtorben vnd eingeſchlaf-
fen ſeyen/ vnnd in jhrem Abſcheiden auß dieſer Welt das Creutz
Chriſti abgeſiegt habe.
Man flegt auch wol an vielen Enden brennende Kertzen oder
Fackeln vorzutragen/ wie noch im Papſthumb geſchicht/ dardurch
wird bedeutet/ daß der verſtorbene Chriſtum erkandt/ vnd jhm ſein
Wort/ die Leuchten zum ewigen Leben habe ſeyn laſſen.
Jn gleichem wird dieſer Brauch gehalten/ daß man die Abge-
ſtorbene auß jhren Haͤuſern/ in denen ſie bey Lebenszeiten gehauſet/
vnd jhre Wohnung gehabt/ herauß auff den Gottsacker zu tragen
pflegt/ vmb deß willen/ vnd damit anzuzeigen/ oder zu bedeuten/ daß
ſie allhie keine bleibende Statt oder Stelle haben.
An etlichen Orten pflegt man fuͤr die jenigen Haͤuſer/ in wel-
chen ein todter Leichnam liget/ ein Banck oder ein Stuel zu ſetzen/
zur Anzeig/ vnd damit dieſelb zu bedeuten/ daß im ſelben Hauß ein
ſolcher Menſch vorhanden/ der ſeinen Stuel fort geſetzt/ auß dieſem
in ein ander Leben gewandert ſey/ vnd ſich in die Himmliſche Buͤr-
gerſchafft begeben habe.
Ferꝛner haben wir auß Hiobs abgeleſenen Worten auch die-
ſen Troſt/ daß er vom zeitlichen Todt nicht anderſt/ als von einem
Schlaff redet/ in dem er das Woͤrtlein (Aufferwecken) braucht/
welches eigentlich auff die Schlaffenden zu ziehen iſt/ vnnd billich
deß Tages ſich abgearbeitet/ zu Abend ſich in ſein Schlaffkaͤmmer-
lein begeben/ ſeine Kleider von ſich werffen/ ſich niderlegen/ ſeine
Augen zu/ vnnd die Nacht vber ruhen/ am folgenden Morgen/
wann er gewecket wird/ ſeine Augen widerumb oͤffnen/ vnd jhn be-
duncken thut/ wann er ſchon ein gut Theil in den Tag hinein ge-
ſchlaffen/ daß er kaum eine Stund im Schlaff gelegen vnnd ge-
ſchlummert: Alſo wirds am juͤngſten Tag auch ſeyn/ dahero denn
vnſere Grabſtellen Cœmiteria, Dormitoria, Das iſt/ Schlaffkam-
mern/ genennet werden/ wie Eſa. 26. zu ſehen iſt. Mit dieſen Wor-
ten ſollen nun wir vns vnter einander troͤſten/ wie der H. Paulus
1. Theſſ. 4. vermahnet.
Ob nun ſchon vnſere Leibe in der Erden vermodern vnd ver-
faulen/ etliche in dem Waſſer von den Fiſchen gefreſſen/ von wilden
Thieren verzehret/ etwan mit Fewer zu Pulffer vnd Aſchen ver-
brannt werden/ So kan ſie doch vnſer getrewer Heyland vnd Er-
loͤſer/ welcher heiſt Jeſus Chriſtus/ widerumb lebendig machen/ die
Steublein widerumb zuſammen tragen/ vnd ſo leichtlich/ als ein
Schlaffender Menſch auffzuwecken/ herfuͤr bringen/ vnd mit ſich
zur ewigen Seligkeit einfuͤhren.
Obs auch gleich mit etlichen der Aufferſtehung halben ſich
lang verzeucht/ Jnmaſſen dann eins Theils ſchon etliche tauſent
Jahr vnter der Erden gelegen/ ſo iſts doch Gott dem HErꝛn ein
gar kurtze Zeit/ vnd wird vns beduncken/ daß wir kaum eine Stund
vnter der Erden gelegen/ Dann im 90. Pſalm ſtehet klar/ daß vor
Gott tauſent Jahr ſeynd wie ein Tag/ ꝛc. So viel bey dem an-
dern Puͤnctlein dieſer fuͤrgenommenen Leichpre-
digt/ kuͤrtzlich hat ſollen vermel-
det werden.
WAs nun vnſere verſtorbene Mitſchweſter/ deß
Achtbarn vnnd Wolgelahrten/ Herꝛn Bal-
thaſarn Friderichs/ Offenbaren Keyſerlichen Notarij
allhie zu Vnfind/ in Gott ſeligen verſtorbene geliebte
Haußfraw/ jhr Leben vnd jhren ſeligen Hintritt auß
dieſem Jammerthal belangen thut/ iſt ſolches alles
menniglichen dieſes Orts/ vnnd allenthalben herumb
dermaſſen bekandt/ daß es meines ſonderlichen Geden-
ckens vnnd Anzugs nicht von noͤthen zu ſeyn/ ſcheinet.
Doch weiln ſie/ als ein Tugentſame Matrona/ ein fein
erbar Chriſtlich Leben gefuͤhret/ als wil ich hiemit/ ſo
viel mir jhrenthalben wiſſend/ entdecken. So viel jhre
Ankunfft thut beruͤren/ iſt ſie in der Loͤblichen/ Fuͤrſtli-
chen Statt Coburg/ von ehrlichen/ Chriſtlichen vnd
frommen Eltern erzeugt vnd geboren worden/ daſelb-
ſten jhr Vatter/ ſeines Namens Balthaſar Betz/ ein
Burger geweſen/ alda ſie von ſolchen jhren Eltern zur
Chriſtlichen Tauff gefuͤrdert/ auß dem Reich der
Suͤnden in das Reich Chriſti gefuͤhrt worden. Weiln
nun ſolches orts/ wie wiſſentlich vnd offenbar iſt/ die
reine Lehre des heiligen Euangelij/ vnd alſo das recht-
ſchaffene Wort Gottes/ Gott hab lob/ in voͤlligem
Schwang gehet/ vnnd nunmehro vber Menſchenge-
dencken daſelbſten die rechte Religion exercirt worden/
ſo den Grund Chriſtliches Glaubens/ alda gelernet
vnd ergriffen. Nach dem aber ihr jhre liebe Eltern/
ſonderlich die rechte Mutter (dann ſie auch eine Stieff-
mutter bekommen) etwas zeitlich entfallen/ hat ſie
ſich vnter frembde Leute muͤſſen begeben/ bey denen ſie
ſich allenthalben ehrlich/ wol/ vnd eines guten Zeug-
niß wirdig verhalten. Endlichen jhr der Allmaͤchtige
ein Chriſtliche Heyrath beſcheret/ vnd in Anno Chri-
ſti, 1584. am Tag S. Andreæ ſich zu Meder/ aber halb
Coburg gelegen/ mit vor genandtem jhrem nunmehro
von jhr verlaſſenem lieben Herꝛn vnnd Haußwirt in
Gegenwart jhrer zu beyden Theilen erbettenen/ ehrli-
chen Freund vnd Beyſtand/ Manns vnd Weibsper-
ſonen/ in Ehegeluͤbniß eingelaſſen/ jhren ehrlichen
Kirchgang in der Biſchofflichen Statt Wirtzburg/
(daſelbſten er ſich zuvor etliche Jahrlang/ bey Rechts-
verſtaͤndigen Dienſtsweiß auffgehalten) im hohen
Stifft/ in Anno 1585. den 6. Julij/ S. V. gehalten/ de-
ro Meynung/ ſolches Orts (als da er ſeines Ampts
halben zu aller hand Sachen vnd Verꝛichtungen gute
Gelegenheit gehabt/ vnd haben koͤnnen) ſich mit ein-
ander zu ſetzen/ vnd haͤußlich nider zu laſſen. Dieweiln
ſich aber eben dazumaln die bekandte Veraͤnderung der
Religion angeſponnen/ vnnd in das Werck vnverſe-
hens gerichtet worden/ So hat ſie ſich mit ermeldem
Promotiones
vnd Foͤrderungen/ ſo ſie ſelbigen Orts/ ſo viel das Zeit-
liche anlangt/ mit einander hetten haben koͤnnen/ hind
angeſetzt) auß der Statt gemacht/ viel lieber (wie die
Exilium ziehen/ weder
jhres Glaubens Bekaͤnntniß endern wollen/ nicht zu
allezeit das Wort Gottes viel lieber/ als die zeitlichen
Guͤter/ Weltliche/ Nichtige/ ſeyn laſſen: Sie iſt (wann
ſie Leibsſchwachheit nicht gehindert) gern zur Kirchen
vnd Gottes Wort kommen/ auch mit vielen Perſonen
zu Grab gangen/ welches der HErꝛ gegen jhr nicht
vergeſſen/ ſondern jhr auch ein herꝛlich/ ſtattlich Ge-
leyt (wie vor Augen) zu jhrem Ruhebettlein beſcheret.
Jn jhrem Eheſtand hat ſie trewlich bey jhrem Herꝛen
vnd Haußwirt gehalten/ in den angehenden Jahren
jhres Eheſtands (welche etwas geſchwind geweſen/
vnd ehe er diß Orts/ als ſie beyde in Anno 1587. anhe-
ro gelangt/ ſo woln in dieſer Refier/ vnnd ſonſten be-
kandt worden) mit jhm fuͤr lieb genommen/ biß ſo lang
derſelb/ ſo wol bey denen vom Adel vnnd andern fuͤrne-
men Leuten/ als bey dem gemeinen Mann/ in Kund-
ſchafft kommen/ vnd alßdann ſeines tragenden Ampts
halben in ſehr vielen/ zum Theil anſehenlichen Sa-
chen vnd Haͤndeln/ wie kundbar vnd am Tag/ gebrau-
chet worden. Von hinnen hat er ſich/ vnd ſie mit jhm/
in Anno
Chriſti 1597. geſchehen/ etliche Jahr lang auff dem
Liechtenſteiniſchen/ Adelichen Anſitz daſelbſten/ vmb
ein gewiſſe/ Jaͤhrliche Beſtallung verharꝛet.
Vnd nach dem ſie/ vnſer Chriſtliche/ in Gott ſelig
ruhende Mittſchweſter/ deſſelben Orts auß/ die Kir-
chen/ Predigt vnd Gottes reines Wort/ nirgend be-
quemer/ als zu Junckersdorff (welcher Ort jhr gleich-
woln etwas entlegen) beſuchen koͤnnen/ vnd doch alles
nicht allemal/ oder ſo offt/ als ſie gerne gewolt: Sinte-
mal ſie (ſonderlich im nechſtverſchienen Jahr/ vnd den
Winter vber) offt vnd viel auffſtoͤſſig/ vnd zu wandeln/
wegen der verlornen Kraͤfften vntuͤchtig worden/ Als
hat ſie ſich ſtaͤtig widerumb hiehero geſehnet/ jhr haͤuß-
liche Wohnung widerumb zu beziehen gewuͤnſchet/ vnd
hierzu ein ſonderliches Verlangen gehabt/ auch deßwe-
gen Gelegenheit zu ſuchen/ nicht nach gelaſſen/ biß end-
lich jhr Wunſch erfuͤllet worden/ vnd ſie beyde mit ein-
ander ſich widerumb hiehero begeben/ welches denn
vmb nechſtverſchienen Petri Cath. geſchehen.
Mittler weil hat ſie (vngeachtet bey jhr die angefal-
lene Schwachheit ſich von Tag zu Tag gemehret) mit
Hertzens Luſt vnd Liebe die Kirchen vnd den Gottes-
dienſt/ all dieweiln ſie fort kommen koͤnnen/ fleiſſig be-
ſucht: Auch neben jhrem lieben Herꝛn vnd Haußwirt
am dritten Sontag nach Trinitatis jhr Bekaͤnntniß
Nachtmal vnſers HErꝛn Jeſu Chriſti/ beſucht vnd
empfangen/ ſich deſſen biß an jhr letztes Ende zum
hoͤchſten getroͤſtet. Mit jhrem Herꝛn vnd Haußwirt
hat ſie ſich friedlich vertragen/ auch ſich in ſeine Weiß
fein ſchicken koͤnnen/ wann jhn zu Zeiten ein Vnmuth
vbergangen/ wie denn einem ſolchen Mann/ dem ſo viel
vnd mancherley Haͤndel vnnd Sachen fuͤrſtoſſen/ vnd
vnter die Hand kommen/ leichtlich kan geſchehen/ iſt ſie
jm mit guter Beſcheidenheit begegnet/ vnd hat den Vn-
muth fein abwenden koͤnnen/ welches jhm nunmehro
ſonder Zweifel zu Hertzen gehen/ vnd er jhr ſehr vermiſ-
Ein haͤußlich Weib ſey eine Zierd im
Hauß/ wie die Sonne am Himel. Wenn
die Sonne vntergehe/ ſo werde alles fin-
ſter vnd betruͤbt in der Welt. Alſo gibt vnd
bringt es auch einem frommen Eheman ein ſehr groſ-
ſe Truͤbſal vnd Finſterniß in ſeinem Hertzen vnd Hauß/
wenn jhm ſein Chriſtlich Ehrenweib durch den zeitli-
chen Todt hingeriſſen/ vnnd von jhm auff dieſer Welt
geſcheiden wird.
Da nun jhre Leibsſchwachheit/ welche lang zuvor
an jhr vermerckt worden/ vberhand genommen/ Alſo/
ſen/ hat ſie bald jren willen in Gottes willen geſtellet/ jr
Creutz gantz gedultig getragen/ ſich mit Gottes Wort
fleiſſig getroͤſtet/ viel ſchoͤne Spruͤch vnnd Chriſtliche
Gebet ohn vnterlaß von ſich hoͤren laſſen/ zwar ſolche/
vnd deren ſo viel/ daß ſich zu verwundern geweſen/ vnd
die man bey einer ſolchen Perſon/ als/ welche weder
ſchreiben noch leſen gelernet/ nicht geſucht hette/ wel-
ches neben mir vnd andern Chriſtlichen Perſonen/ die
ſich in waͤrender jhrer Schwachheit beſucht/ vnd ange-
deute Chriſtliche Troſtſpruͤch vnnd Gebet von jhr viel-
feltig gehoͤrt vnd vernommen: Jnſonderheit die Ehr-
wirdigen vnd Wolgelahrten Herꝛn/ Nemblich/ Herꝛ
Johannes Agricola/ Diaconus zu Koͤnigsberg/ vnd
Herꝛ Johannes Cæſar/ Pfarꝛherꝛ zu Junckersdorff/
von denen ſie auch vnterſchiedlich beſucht vnd getroͤſtet
worden: Gleicherweiß bezeugen auch nicht weniger/
die es bekraͤfftigen koͤnnen/ je haͤrter jhr die Kranckheit
zugeſetzt/ je fleiſſiger ſie zu Gott geruffen vnnd gebetet:
Auch offtmals geſagt: Auff dem Kirchhoff wil
ich/ ob Gott wil/ fein ſanfft ruhen. Vnd
was ſie ſonſten mehr vor viel feine Wort von ſich gege-
ben/ auß denen jhres Hertzen Chriſtliche Gedancken
zu vernemen geweſen: Zu Gott jeder Zeit nicht an-
derſt/ als ein Kind zu ſeinem Vatter geſchryen/ auffge-
jmmerzu ſehnlich begert/ auch das gemeine Gebet in
der Kirchen vnd Schuel zu mehrmaln ſuchen vnnd bit-
ten laſſen/ biß ſie endlich gnaͤdig iſt erhoͤret worden/ der
Seelen nach/ vorgeſtern zwiſchen neun vnd zehen Vhr/
in der Nacht/ auß dieſer Welt gefahren/ vnnd Chriſt-
lich/ ja ſeliglich eingeſchlaffen.
Gott der Himmliſche Vatter wolle vns allen/ wenn
vnſere Stuͤndlein kommen/ auch ein ſelige Heimfahrt
zum ewigen Leben geben vnnd verley-
hen/ AMEN.