Respice finem Bedencke das End. Oder Christliche Predigt/ Bey dem LeichProcess Ehr- vnd Erden-Bestattung Deß Ehrenvesten vnd Wolgelahrten Herrn Michael Saubers

ES fuͤhret mich/ Geliebte vnnd Außer- wehlte in Chriſto dem HERREN/ der allerhoͤchſte GOtt/ der da wunderbahr iſt in ſeinen Wercken/ auch auff dieſe Cantzel/ an ei- nem vngewoͤhnlichen Orth/ vnd bey einem vn- verhofften Fall.

Vngewoͤhnlich iſt das Orth/ in dem ich/ alß ein Evan- geliſcher Prediger/ allhier zu Muͤnchen ſoll auff offener Cantzel aufftretten vnnd predigen/ welches von keinem gehoͤrt/ von nie- mand jemahls geſehen noch erfahren worden: Dann was wir (Lutheriſche genandte) in Beyerland/ ſonderlich aber allhier zu Muͤnchen/ (da man manches ſcharpffes Scriptum wider vns publicirt) fůr Platz/ iſt menniglich bekant/ doch gehet es al- les nach Gottes willen.

Ein vnverhoffter Fall iſt es/ in dem der weiſe GOtt gantz vnverſehen in ſeiner bluͤhenden Jugendt/ nach ſeinem zwar vn- erforſchlichem/ doch allein guten Willen/ auß dieſem betrůbten Zehrenthal zu ſich in den himliſchen Frewdenſaal hat abgefor- dert den Weylandt Ehrenveſten vnnd Wohlgelehrten/ Herꝛn Michael Saubert, deß Hoch Wolgebornen vnſers Gnaͤdigen Herꝛn/ Herꝛn Guſtav Horns/ Herꝛn zu Hering vnd Malla/ ꝛc. Rittern/ ꝛc. Koͤnigl. May. zu Schweden Raht vnd Feldtmar- ſchalcks geweſenen Secretarium, welchem wir das Glaid hieher gegeben/ vnd den letzten Dienſt zuerweiſen im Werck ſeyn. Auff daß wir aber den Weg nicht vbel anlegen/ ſondern auch was A ijnutzlichs nutzlichs mit vns naher Hauß bringen/ wollen wir ein kurtzes Spruͤchlein auß dem ſeligmachendem Wort Gottes zu erklaͤ- ren vornehmen/ zu nutzlicher Abhandlung aber deſſelbigen/ vmb Gnad vnd Beyſtandt deß H. Geiſtes/ ein andachtiges Vatter vnſer betten.

Vatter vnſer der du biſt im Himmel/ ꝛc.

TEXTVS. Pſalm. 91. Herꝛ lehre vns bedencken daß wir ſter- ben muͤſſen/ auff daß wir klug wer- den/ ꝛc.

EXPLICATIO.

ES wil ja freylich/ Geliebte in Chriſto Je- ſu/ der liebreiche Gott/ daß allenMenſchen geholf- fen werde/ vnd ſo wahr er lebt/ begehret er nicht den Todt deß Suͤnders/ ſondern vielmehr daß er ſich bekehre vnd lebe/ Ezech. 33. Darumb er auch alle darzu dienſtliche Mittel jhnen an die Hand gibt: Jnſonderheit aber/ weil jhm wol bewuſt/ daß die jmmerwehrende Betrach- tung deß Todes darzu ſehr dienſtlich: Alß hat er ſolche allen frommen Chriſten vielfaͤltig vnd auff mancherley Weiß incul- eirn vnd einbilden wollen.

Alßbal-

Alßbalden nach dem vnſeligen Suͤnden Fall/ machet er vnſern erſten Eltern Kleidung von Fellen/ das iſt von todten Thierheuten. Ach was will er darmit? Erjnnern wille ſie/ daß/ gleich wie ſie jhre Roͤck vnnd Kleidung von todten Thieren ge- nommen haben/ alſo tragen ſie auch den Todt in jhrem Buſen vnd eygenen Leibern: Sie muͤſſen zur Erden werden/ darvon ſie genommen ſeynd/ Gen. 3. lerem. 18 fuͤhret Gott den Prophe- ten hinab ins Toͤpffers Hauß/ da ſiehet er wie der Toͤpffer bald dieſes bald ein anders Gefaͤß widerumb zubricht/ vnnd vnter den Thon wirfft: Deß Toͤpffers Hauß iſt deß Todts Werckſtart/ wir arme Erden Wůrmlein ſeynd Thon vnd Leimen/ die GOtt zwar zu Gefaͤſſen ſeiner Gnaden berenet/ aber vmb vnſerer Suͤn- den willen/ werden wir einer nach dem andern/ bald dieſer bald je- ner wiederumb zerbrochen/ vnnd zu nicht gemacht. Dann das macht deß HErꝛen Zorn/ daß wir ſo vergehen/ vnnd ſein Grim/ daß wir ſo ploͤtzlich dahin muͤſſen/ vnſer Miſſethat ſtellet er fuͤr ſich/ vnd vnſer vnerkandte Suͤnd ins Liecht fuͤr ſein Angeſicht/ ſagt Moſes im 90. Pſalmen.

Weiln dann an ſolcher Betrachtung ſo viel gelegen/ alſo daß auch David GOtt ſehnlich angeruffen/ im 39. Pſalmen/ Ach HERR lehre mich bedencken/ daß es ein End mit mir hat/ vnd mein Leben ein Ziel hat/ vnd Moſes in dieſen abgele- ſen Spruͤchtein deßgleichen thut: Alß wollen wir fuͤr dißmahls 1. Das Bild deß Todts mit einander in etwas anſchawen.

Zum 2. Die Vrſach behertzigen/ warumb man ſo vn- gern an den Todt gedencke.

Vnd zum 3. andeuten/ Wie viel vns an jmmerwehrender Betrachtung deß Todts gelegen ſey.

Der Gott/ Welcher Leben vnnd Todtin ſeinen Haͤn- A iijden den hat/ helffe daß wir Chriſtlich leben/ ſelig ſterben/ vnnd der- maleins am Juͤngſten Tag eine froͤliche Himmelfahrt haben/ Amen/ Amen.

Quid Mors!DEr Todt iſt ein Beraubung deß Lebens/ vnd aller deren Ding/ ſo dieſem jrꝛdiſchen Leben vnterworf- fen ſeynd. So hat nun ein todter Menſch kein Leben oder Seel mehr/ die zwen beſte Freund Leib vnnd Seel ſeynd ge- ſchieden/ mit den Augen kan er nicht mehr ſehen/ mit den Oh- ren nicht mehr hoͤren/ mit dem Mund nicht mehr reden: Er ligt da/ ſtreckt alle Vier/ hat kein Vernunfft noch Verſtandt:

Daß Angeſicht jhm fallet ein/ Die beyde Augen brechen/ Daß Hertz thut ſelbſt in Angſten ſeyn/ Der Mund kein Wort kan ſprechen. Die ſchoͤne Gſtalt muß werden alt/ Die Pulß wird nimmer lauffen/ Deß Todes Schweiß macht jhm gar heiß/ Da kompt die Noth mit hauffen.

Er verleſſet Eltern/ Geſchwiſtere/ Ehegatten/ Guth/ Ehr/ vnd alles was jhm hier lieb war/ bekommet auch deren keins mehr/ weiln die Welt ſtehet. Das kommet nun Fleiſch vnd Blut hart an: Dann ſo man vber einen geringen Verluſt bekuͤmmert iſt/ wie viel mehr/ wann man vmb alles kommet/ da iſt Angſt vnnd Noth/ Wemmern vnd Wehklagen/ Leid vnd Trawrigkeit.

Vnnd gleich wie ein Menſch alles Zeitliches verlaͤſt/ alſo wird er auch hingegen von allen/ ja von den intimis vnnd beſten Freunden verlaſſen/ vor dem todten Leichnam fleucht man/ helt Mund vnd Naſen zu/ man ſicht wie man jhn auß dem Hauß bringet/ vnd heiſet nach den gemeinen Reimen:

Dein Dein Freundtſchafft thut ein kleine Zeit Vmb deinen Todt ſich klagen/ Ein Mantel vnd ein ſchwartzes Kleid Ein halbes Jaͤhrlein tragen: Dann ſpricht die Rott/ genad jhm Gott/ Sie hat dein bald vergeſſen/ Man theilt dein Haab wann du im Grab/ Von Wuͤrmern wuͤrſt gefreſſen.

Ja man foͤrchtet ſich wohl auß Vnverſtand vor dem Ver- ſtorbenen/ vnd ſorgt/ er komme wieder/ mache ein Geſpenſt/ die Guͤter werden transferirt, das Ampt vnd Pfruͤnd einem andern vbergeben/ ja wol ehe verſprochen/ alß der Todte begraben iſt. Vnd gehet eben her wie in einer Comœdien, da mancher im wehrendem Actu Koͤniglich verkleidet iſt/ aber ſo bald das Spiel ein Endt/ leget er den Habit ab/ vnnd iſt der wieder/ was er zuvor war: Alſo weil der Menſch im Leben iſt/ bedienet er wohl hohe Aempter/ hat herꝛliche Gaben/ ſtattliches Vermoͤgen/ hoͤffliche Wolluſt/ vornehme Freund: Wann aber die Comœdia ſeines Lebens auß iſt/ verlaͤſt er alles was er hatte/ vnnd wird wieder zur Erden darvon er genommen iſt/ Geneſ. 3. Cap.

Vnd dieſes wiederfehret allen Menſchen/ keiner iſt vor derMors in o- mnes tran- ſit. Gewalt deß Todts exempt vnd priuilegirt.

Der Todt friſt alle Menſchen Kind Wie Er ſie find/ Acht nicht was Standts oder Ehrn ſie ſind.

Alß der Kaͤyſer Auguſtus die Statt Peruſiam einge- nommen/ hat er ſehr viel Buͤrger laſſen hinrichten/ den jenigen aber/ ſo vmb Genad bathen/ nur dieſe Antwort gegeben: Mori- endum eſt: Jhr muͤſt ſterben. Alſo ſeit der Todt durch deß Teuffels Liſt iſt eingedrungen/ vnnd die gantze Welt hat einge- nommen/ nom̃en/ heiſt es nun mit jederman/ moriendum eſt, Du muſt ſterben: Da hilfft nichts vor/ es iſt der alte Bundt Hebr. 10. Reiche vnd Arme muͤſſen ſterben/ Schoͤn vnd Heßliche muͤſ- ſen ſterben Gelehrte vnd Vngelehrte muͤſſen ſterben/ Obrig- keit vnd Vnterthanen muͤſſen ſterben/ Schwach vnd Star- cke muͤſſen ſterden. Was halff Cræſum ſein Reichthumb? Er muſte fort. Was halff Helenam jhre Schoͤnheit? ſie muſte fort. Was halff Ciceronem, Demoſthenem vnd andere jhre Beredtſambkeit/ ſie muſten fort.

Was halff Iulium Cæſarem Alexandrum Magnum, vnd andere jhre Macht/ Simſonem ſeine Staͤrcke/ ſie muſten an deß todes Reihen: da hilfft weder Doctor oder Apotecker:

Kein Kraut fuͤr den Todt gewachſen iſt/ Mein frommer Chriſt/ Alles was lebet ſterblich iſt.

Dannenhero iſt jenes todten Bild zu loben/ da man den Todt gemahlet ohne Augen/ weiln er keine Schoͤnheit/ kein Adel vnd Hochheit/ kein Dignitaͤt vnnd Wuͤrde/ kein Sammet vnd Seiden/ kein Gold vnd Edelgeſtein anſiehet. Gleich wie ein Maͤher auff einer Wieſen ohne Vnterſchied die ſchoͤne liebliche Bluͤmlein vnd das gemeine Graß mit ſeiner Senſen abmeihet: Alſo auch der Todt. Er ward gemahlet ohne Ohren/ weiln bey jhm kein Supplicirn, kein Advocirn, kein Proteſtun, kein ſubti- liſirn vnd diſputirn kein Seufftzen oder Liebkoſen/ keine Kunſt/ kein Beredtſambkeit ſtatt findet. Er wird gemahlet ohne Haar/ ohne Fleiſch vnd Blut O du ſchoͤnes FrawenZimmer/ dein ſchoͤne Locken/ dein frembdes Haar/ dein zart vnnd ſubtiles Fleiſch wird nichts geachtet/ er machet nur viel vnd mancherley Wuͤrmer darauß/ dein glaͤntzende Stirn/ vnnd alle dein Haupt- Ziert muß zu Nicht werden.

Gehe

Gehe hin ins Beinhauß/ Such mir ein edlen Kopff her- anß: Sagt jene gottſelige Jungfraw. Er wird gemahlet ohne Haͤndt/ er leſt ſich mit Gold vnnd Geld nicht beſtecken/ ſonſten wuͤrden ſich die Reichen wol loß kauffen/ vnd das Spiel nur vber die Armen gehen/ Ach nein? Es muß alles zugleich fort.

Siehe zuruͤck auff deine Vorfahren/ mein liebes Hertz/ wo ſeynd ſie? Sie ſeynd geſtorben/ vnd den Weg aller Welt gan- gen/ dahin muſtu auch/ der Todt macht dir nichts beſonders/ non es melior Patribus tuis, die Natur kan nimmermehr ſo viel Menſchen auff die Welt bringen/ der Todt nimmet ſie alle hin- weg: Ja wann die Natur gleich viel Jahr ſich bemuͤhet vnnd ar- beitet/ biß ſie einen Menſchen auffbringet/ verſtoͤſſet jhn doch der Todt wol in einer Stund/ ja in einem Augenblick vnter der Erdẽ.

Darumb wer dem fluͤchtigen Leben zu viel trawet/ der ba- wet ein Caſtell in dem Lufft/ vnd betreugt ſich ſelbſtẽ gantz ſchaͤnd- lich. Es ſeynd ja die Menſchen/ Alle alle/ keinen außgenommen/ nichts alß Baͤch vnd Fluͤß/ welche gar ſchnell in das bittere Meer deß Todts eylen/ vnnd ſo bald ſie dahin gelangen/ ſich verlieren/ alß waͤren ſie zuvor nie geweſen.

Vnd welches am aller meiſten/ ſo gewiß der Todt/ ſo vnge- wiß iſt auch die Stund deß Todts.

Zwar im Anfang der Welt war der Todt gleichſamb ein junger Jaͤger vnd ein vngewiſſer Schuͤtz/ da dorffet man dem Leben noch etwas trawen: Dann nach Adam ſchoſſe er 930. Jahr/ biß er jhn fellet. Nach Seth 912. Jahr. Nach Enos 905. Jahr. Nach Lamech 777. Jahr. Nach Mahaleel 895. Jahr. Nach Jahred 962. Jahr. Nach Mathuſalem 969. Jahr. Aber weh jetzt? Weh jetzt vns armẽ Erdenwuͤrmlein? Jetzt iſt der leidige Todt/ der ſchroͤckliche Jaͤger durch langwuͤrige V- bung ſo geſchwind vnd kunſtreich worden/ daß er die Sache mit Bdem dem Menſchen gantz vnverſehens/ auch in einem Augenblick kan außmachen. Wie offt ſcheuſſet er in der Geburt auff einẽ Schuß Mutter vnd Kind/ daß ſie beyde todt bleiben. Wie offt begibt er ſich garin Mutterleib hinein/ vnnd erwuͤrget die Frucht vnd das arme Kindlein vnter dem Muͤtterlichen Hertzen. Ach Jammer Jammer. Ach Elend Elend?

Er graſſieret freylich in Oriente, da nimbt er Kinder hinweg/ in Meridie, da er die Menſchen in bluͤhenden Alter todt machet. In Septentrione, weiln er der gewachſenen zimblich Alten vnd Erkalten nicht verſchonet. In Occidente, wann er zum hoͤch- ſten Alter kommen. Jn allen dieſen Altern/ muͤſſen wir jmmer- dar in Forcht vnd Sorgen ſtehen. Dann

Kein Menſch auff Erd vns ſagen kan/ Wann wir von hinnen muͤſſen/ Wann der Todt kombt vnd klopffet an/ So muß man jhm auffſchlieſſen: Er nimbt mit Gwalt hin Jung vnd Alt/ Thut ſich vor niemand ſcheuhen: Deß Koͤnigs Stab bricht er bald ab/ Vnd fuͤhrt jhn an den Reihen.

Ach mein Gott? Wie viel Menſchen kommen vrploͤtzlich vmb/ wie mancherley Weg vnd weiß ſeynd zu dem Todt? Dieſer wird verbrent/ jener erhenckt/ einer erſaufft im Waſſer/ der ander wird von der Erden verſchlungen? Wie viel werden in jhren ey- genen Heuſern erwuͤrgt? Wie viel auff dem Feld? Wie viel in frembden Haͤuſern? Vielen wird das Leben verkůrtzet/ durch Gifft/ durch Hunger/ Froſt/ vnd andere Mittel.

Plinius, Empedocles vnnd Socrates ſeynd verbrunnen. Æſeulapius, Zoroaſter vñ lulius Hoſtilius ſeynd vom Don- ner erſchlagen worden. Menandrum, Terentium vnd Marcũ Marcellum hat das Waſſer erſeufft/ Diomedem vnd Lucium die die Roͤmiſche Keyſer haben die Pferdt zu todt gebiſſen/ Seuerus vnd Iovianus habẽ ſich zu todt gefreſſen/ Demoſthenes, Han- nibal, Themiſtocles, Lucullus, Seneca, vñviel viel andere võ Gifft ſterbẽ muͤſſen/ Tarquinius Priſcus iſt an einer Fiſchgrad/ Anacreon an einem Weinbeer/ Fabius Prætor an einem Haar erſtickt. Sophocles vnd Diagoras ſeynd von lauter Frewd ge- ſtorben/ Philæmon hat ſich zu todt gelacht. Einer ſtirbt vnter dem Eſſen/ der ander im Schlaff/ ja es wird wol einer mitten in der Miſſethat ergriffen/ vnd vmbgebracht:

Der Todt vrploͤtzlich alß ein Dieb Thut gehling einher ſchleichen/ Es ſey dir gleich leid oder lieb/ Du kanſt jhm nicht entweichen: Sein Pfeil iſt Gifft/ wann er dich trifft/ Muſt du dich bald auffmachen/ Er nimbt dich mit/ es hilfft kein Bitt/ Drumb ſieh zu deinen Sachen.

Er iſt vns allezeit auff dem Ruͤcken/ wir moͤgen vns vor jhm nicht verbergen/ dann er durchwandert alle Orth/ alle Winckel/ folget vns nach wie der Schatten dem Leib/ wann wir vns am we- nigſten verſehen/ da vberſiehet er keine Occaſion vnnd Gelegen- heit. Mitten wir im Leben ſeynd/ mit dem Todt vmbfangen: Singet die Kirch recht vnd wol auß langer Erfahrenheit.

II. PARS.

JSt dann nun dem alſo? Muͤſſen die Menſchen ſterben/ ja alle Menſchen ſterben/ ja ſie ſterben zu gantz vngewiſſer Stundt vnd Zeit/ keiner iſt einen Tag/ ja eini- gen Augenblick befreyet/ wie kommet es dann/ daß man ſo ſicher vnd ſorgloß dahin lebet/ alß haͤtte man gar mit dem Todt einen Bundt/ vnnd ein Salvam Quardiam vor allen ſeinen Auſtoͤſſen B ijvnd vnd Einfaͤllen. Es findẽ ſich/ Geliebte im HErꝛn/ vnterſchied- liche Vrſachen/ dardurch der arme Menſch in dieſe Blindtheit gereth/ daß er ſo wenig an den Todt gedencket. Deren iſt die 1. 1. Cauſa. Satanæ Calliditas.Von welcher alle andere herꝛuͤhren deß Teuffels liſtige Ver- ſuchnung/ welcher ſich vmb nichts ſo ſehr bemuͤhet/ alß wie er dem Menſchen moͤge diß Sterbſtuͤndlein auß dem Sinn brin- gen/ vnd ſicher machen/ dann wann es ſo weit kommet/ ſtehet jhm ſchon Thuͤr vnnd Thor offen/ jhn alß einen armen gefangenen von einer Suͤnd zu der andern/ vnd entlich gar in das Verderben Hiſtoria vom Cyro.zu ſchloͤppen. So machet es Cyrus mit den Scythiern. Er ſtellet ſich/ alß wann er floͤhe/ vnd ließ ſein Feldtlaͤger hinder jhm voll deß beſtens Weins/ vnd der herꝛlichſtẽ Speiſe/ darauff platz- ten die Scythier mit allen Vieren/ wurdẽ aber/ alß ſie am froͤlich- ſten waren/ von jhren liſtigen Feind dem Cyro vnverſehens vber- fallen/ vnd neben der Koͤnigin Tomyris einigen Sohn/ jaͤmmer- lich erſchlagen vnd vmbgebracht. O Satan/ Satan! Wie viel bringſtu eben vff ſolche Weiß in vnwiederbringlichen Scha- den/ du kanſt wol leyden/ daß der Menſch in aller Vppigkeit/ in Frewd vnd Wolluͤſten/ in Suͤnd vnd Laſtern lebe/ bildeſt jhm ſo lang ein/ es hab kein Gefahr vnd Noth mit jhm/ biß er vnverſehe- ner weiß/ wie ein armes Voͤgelein/ von dem Todt vberfallen vnd jaͤmmerlich hingerichtet wird. Darumb bedencke es wol liebe Seel/ ſchlage ſolche verdampte Sicherheit auß dem Sinn:

Vieleicht iſt heut der letzte Tag/ Den du noch haſt zu leben/ O Menſch/ veracht nicht was ich ſaͤg/ Nach Tugendt ſolt du ſtreben. Wie mancher Mann wuͤrd muͤſſen dran/ So hofft noch viel der Jahren/ Vnd muß noch heut weil die Sonn ſcheint/ Zur Hoͤll hinunter fahren. 2. Die

2. Die andere Vrſach/ warumb ſo wenig an jhr Sterbftuͤnd-2. Cauſa. Viuendi cupiditas. lein gedencken: iſt vivendi cupiditas, die groſſe Begierd zum jr- diſchen Leben/ von denen ſagt Syrach am 41. O Todt wie bit- ter biſtu/ wann an dich gedencket ein Menſch/ der gute Tag vnd genug hat/ vnd ohne Sorg lebet/ vnnd dem es wohl gehet in allen Sachen/ vñ der noch wol eſſen mag. Deſſen haben wir ein Exem- pel an dem Reichen Luc. 12. Liebe Seel (ſprach er) du haſt ei- nen groſſen Vorꝛaht auff viel Jahr/ habe Ruhe/ jß/ trinck/ vnnd hab einen gutẽ Muth/ da gedenckt er nur ſeines Vorꝛahts vff viel Jahr/ aber deß Tods gantz nicht/ was ſagt aber Gott darzu? Du Narꝛ/ ſpricht er/ heint wird dein Seel von dir genommen wer- den/ weß wird dann ſeyn/ alles was du geſamblet haſt! O daß wir nit auch alſo geſinnet waͤren/ vnd vnſerer Gebrechligkeit ſo gar vergeſſen/ wie viel beſſer wuͤrde es vmb vns ſtehen? Wie viel froͤmmer vnd Gottſeliger wuͤrden wir ſeyn. Aber es gehet leyder nach den Reimen:

O Fleiſch du ſchnoͤder Madenſack Wie viel haſt du betrogen. Vnd durch den Geitz durch Fraß vnd Glack Zur Sicherheit gezogen: Wer dir vertrawt ſeh auff ſein Haut/ Er wuͤrds wol muͤſſen zahlen Jm hoͤlliſchn Fewr nur allzu thewr Der Speck ligt auff der Fallen:

3. Vrſach ſolcher verdambtẽ Sicherheit Abuſionis miſe-3. Cauſa. Abuſionis miſericor- diæ diuinæ multiplici- tas. ricordiæ diuinæ multiplicitas. Der Mißbrauch der Barmher- tzigkeit Gottes/ der iſt nur leyder allzu groß/ da der Teuffel dem Menſchẽ vorbildet/ er ſoll ſich nur friſch halten/ vñ thun was das Hertz geluͤſtet/ vnd den Augen gefalle/ Eccleſ. 12. Gott ſey barm- tzighertzig/ ja die Barmhertzigkeit ſelbſten/ es ſey genug/ wann man im Alter/ im Todtbett fromb werde/ hab er doch den Schecher am B iijCreutz Creutz in der letzten Noth nit verlaſſen/ ſondern zu Genaden auff- genommen/ wie viel mehr werde es jhm widerfahren/ der ſo viel Bubenſtuͤck nicht begangen hab? Aber jrꝛe dich nit/ liebes Hertz/ Gott laͤſt ſich nicht ſpotten/ Er hat wol Genad/ aber dir den morgenden Tag zu leben nicht verſprochen/ vnd du weiſt nit ob dich der Todt nicht vrploͤtzlich ergreiffen moͤcht/ zu deme wer- den einem Geſunden viel Verhinderung zu der Buß obijcirt, vielmehr einem Todtkrancken/ vnd GOtt iſt freylich wol barm- hertzig/ aber darbey auch gerecht/ wann man ſeine Langmut ſo ſchaͤndtlich mißbraucht/ weder Moſen noch die Propheten will hoͤren/ ſo erzuͤrnet er ſich in ſeinem Grim/ verſtoͤſt wol ſolche cra- ſtinatores in Ewigkeit/ daß ſie ſein Abendtmahl nimmermehr ſchmecken ſollen/ wie er troͤhet Luc. 14. vnnd gehet es wie die Chriſtliche Kirch ſinget:

Vnd wann er nimmer leben mag/ So fehter an ein groſſe Klag/ Will ſich erſt Gott ergeben: Jch foͤrcht fuͤrwar die goͤttlich Gnad/ Die er alzeit verſpottet hat/ Werd ſchwerlich ob jhm ſchweben.

III. PARS.

DJeſes alles nimmet Moſes der groſſe Prophet Gottes wol zu Hertzen/ darumb bittet er im abgeleſenen Die Klug heit beſte- het 1. In Amoris rerũ mun- danarum moderatio- ne.Spruͤchlein: HErꝛ lehre vns bedencken daß wir ſterben muͤſſen/ auff daß wir klug werden. Dieſe Klugheit beſtehet 1. In mundanorum amoris moderatione, daß wir vns in das jrꝛdi- ſche nit zu ſehr verlieben ſollen/ ſondern Welt Welt ſeyn laſſen/ vnd mehr gedencken an das ſo droben iſt/ in Betrachtung/ daß al- les Zeitliches vergaͤnglich vnd fluͤchtig/ vnd in deß Todes Angſt im wenigſten helffen koͤnne. Dann:

Die Die Ehr/ das Gluͤck/ das Geld vergehr/ Der Menſch auch ſelber nicht beſteht: Dann alle Ding nehmen ein End/ Was die Welt hat/ vergeht behend.

Darumb wird das gantze Leben in H. Schrifft bald ver- glichen einer Wolcken vnd Nebel/ Sapient. 4. Einem Wind/ Iob. 7. Einem Dampff/ Iac. 4. Einem Schatten Iob. 14. Ei- nem Graß/ vnd Blum auff dem Feld. Jtem dem Staub Pſal. 103. Einem Rauch/ Pſal. 101. Der Spinnenweb/ Pſal 96. Wie das Eyß von der Sonnen Hitz zerſchmeltzet/ ein Glaß zerbricht/ ein Blat von Baͤumen fellet/ ſo gehet auch der Menſch vrploͤtz- lich dahin/ vnd iſt vanitas vanitatum, ein Eitelkeit vber alle Ei-Pharao. Senacherib. Herodes. Goliath. Alexander Magnus. Iulius Cæ- ſar. Cræſus. telkeit/ das haben erfahren der verſtockte Pharao Exodi 14. Der ſtoltze Senacherib leſai. 37. Der auffgeblaſene Herodes Acto- rum 12. Der ſtarcke Goliath. 1. Samuel. 17.

Alexander Magnus hat viel Sieg erlanget/ aber er muſte doch ſterben/ Iulius Cæſar viel Feind erlegt/ aber er muſte doch ſterben/ Cræſus viel Gold geſamblet/ aber es halff jhn nichts/ die Welt vnd alles was Weltlich/ muß man doch verlaſſen:

Allein das ewig Guth Macht rechten Muth/ Darbey ich bleib/ Wag Gut vnd Leib/ Gott helff mir vberwinden.

2. Beſtehet ſolche Klugheit in peccatorum intermiſsione,2. In peccato- rum inter- mißione. in Ablaſſung von Suͤnden. O wer fleiſſig vnnd offt ſich ſeines Todts vnnd Sterbſtuͤndleins erjnnert/ dem wird der Suͤnden- Kuͤtzel wol vergehen/ was will der viel Schinden vnd Schaben/ viel Wuchern vnd Geitzen/ der da bedencket/ daß er alles dahin- den/ ja ſein Geld vnd Gut wollachenden Erben laſſen muß? We- me ſolt nicht der Kleider Stoltz/ vnd eygene Lieb vergehen/ der da behertzigt/ behertzigt/ wie ſein armer Leib in der Erden verfaulen vnd vermot- tern muß! Wer wolt an Pancketirn/ Freſſen/ vnd Sauffen viel Luſt haben/ der da offt jhm einbildet/ wie er ſelbſtẽ den Wuͤrmern vnnd Schlangen zur Speiß werden ſolle? Solte nicht einem Rachgierigen aller Zorn vergehen/ wann er taͤglich jhm zu Ge- muͤht zoͤge/ wie ſein Mundtverſtummen/ ſein Haͤnd erlahmen/ vnd alle ſeine Kraͤffte ſich durch den Todt gaͤntzlich verliehreun wuͤrden? Nach dem Todt habẽ wir alle außgebocht. Solte nicht einem GottsLaͤſterer das Fluchen vnd Schwoͤren erlaubet werden/ wann er alle Tage jhme einbildete/ wie ſein Zung in dem Todt erſtarꝛen/ vnnd am Juͤngſten Gericht/ ſo ein ſchwere Re- chenſchafft auch von einem jeden Wort werde erfordert werden. Summa die ſelige offtmahlige Betrachtung deß Todts iſt ein gewiſſe Artzeney wider alle Suͤnde: Wer wolt mitten vnter ſei- nen Feinden gantz vngewapnet jubilirn vnd froͤlich ſeyn? Wer wolte vff dem Meer in hoͤchſter Vngeſtuͤmb vnd Fortun, Spie- len vnd Kurtzweil treiben? Ach das thun ja alle die jenige/ die deß Todts vergeſſen/ ſich in Suͤnden vnd aller Vppigkeit uͤben/ vnd nicht wiſſen wollen/ in was Gefahr ſie ſtecken/ in was Elend ſie hangen/ vnd in was Jammer vnd Noth ſie vrploͤtzlich gerahten koͤnnen.

3. Satanæ vi- ctione.3. Die fleiſſige Betrachtung deß Todts/ vnd die Klugheit ſo darauß kommet/ beſtehet auch in Satanæ victione, in Vber- windung vnſers Ertz- vnnd Erbfeinds deß leidigen Sathans.

Hannibal.Von Hannibale dem trefflichen Obriſten der Carthagi- nenſer leſen wir/ daß die gantze Zeit/ in welcher er wieder Scipio- nem zu Feldt gelegen/ er niemals ſein Gewehr von ſich geleget/ oder/ da er nicht von ſeinen Officirern mit Fleiß verwachet/ ge- Iphycrates.ſchlaffen habe. Alſo Iphycrates der Athenienſer Obriſter iſt auch vnter den Freunden ſtaͤtig in Waffen geſtanden/ vnd da er er gefragt wurde/ warumb er ſolches thaͤte/ geantwortet? damit ich nicht vnverſehens vberfallen werde: Wie viel mehr ſollen wir durch jmmerwehrende Voraugenſtellung vnſeres Endes vns kluͤglich vor dem hoͤlliſchen Leviathan vorſehen: Dann wir ha- bẽ ja nit mit Fleiſch vnd Blut zu kaͤmpffen/ ſondern mit dem Fuͤr- ſten der Welt/ der da herumb gehet wie ein bruͤllender Loͤw/ vnnd ſuchet welchen er koͤnne verſchlingen. 1. Pet. 5. Solchen Feind aber vberwinden wir/ wann wir ſeiner Eingebung nicht folgen/ in die boͤſe Luͤſt vnnd Begierd/ die er jmmerdar einblaͤſet/ nicht be- willigen/ viel weniger aber zu groben euſſerlichen Todtſuͤnden vns bereden laſſen. Welches alles durch vielfaͤltige Betrachtung deß Todts geſchehen kan.

O Nun/ du barmhertziger Vatter/ vnnd Liebhaber derPraxis. gantzen Chriſtenheit? Lehre vns bedencken daß wir ſterben muͤſſen/ auff daß wir klug werdẽ/ vnd vns ſelig darzu bereiten. Bedencke du lieber Chriſt/ wie noͤhtig dir ſolche Betrachtung ſey/ wie viel dir daran gelegen/ damit du der Welt abſagen/ die Suͤnde meyden/ vnd den Satan vberwinden koͤnneſt. Ach wie der Baum faͤllet/ ſo bleibt er ligen/ wer es da vberſiehet/ hat alles vberſehen/ nach dem Todt folget das Gericht/ nach dem Gericht die Execution, da wuͤrd ein jeder em- pfangen nach ſeinem Verdienſt/ vnd die Gottloſe in die ewige Pein ein- gehen/ aber die Gerechten in das ewige Leben. Matth. 25. Gedencke nit daß es daſelbſt werde zugehen wie auff der Welt/ da es offtmals heiſt:

Dat veniam Corvis vexat cenſura Columbas, Der diebiſch Rab kompt wol darvon/ Die arme Taub kriegt boͤſen Lohn.

Ach nein nein/ Gott iſt ein gerechter Gott/ der nicht kan verfuͤhrt werden mit Geſchenck vnd Gaben/ dann er iſt der Allerreicheſt/ vnd darff deß vnſerigen nicht/ corrumpirt wuͤrde er nicht von Lieb/ dann er gibt nit Achtung auff die Perſon vnd Freundſchafft/ nicht von Neid/ dann er haſſet keine ſeiner Creaturn/ nicht von Forcht/ dann er iſt vber alles/ vnd hat ſich vor niemand zu foͤrchten.

CHier

Hier in der Welt heiſt es/ Allerdurchleuchtigſter/ Vnvber- windlichſter Großmaͤchtigſter/ Ehrwuͤrdigſter/ Hoch- wol Edelgeborner/ ꝛc. da weiß man nit/ wie man auß verdambter Heucheley vnd Hoffart nur breite Titul genug machẽ vnd außteilẽ ſoll: Aber im ewigen Leben werdẽ ſich ſolche alle verlierẽ/ nur dieſe 2. werden gehoͤret werden: Du Geſegneter/ vnd 2. Du Vermaledeyter.

Geſegnete werden genennet werden/ die allhier in jren Gedancken taͤglich ſterben/ vnd ein ſolch Chriſtlich Leben fuͤhren/ alß wann ſie alle Stund vnd Augenblick fortmuͤſten/ zu dieſen wird Chriſtus am letzten Gericht ſagen: Kom̃et her jhr Geſegnete meines Vatters/ erer- bet das Reich/ dz euch bereitet iſt von Anbegin der Welt her. Hingegen werden verflucht ſeyn alle die/ ſo da nim̃er an den Todt gedencken/ in Suͤnd vnd Laſtern die Zeit jhres Lebens ſich wuͤhlen vnd weltzen/ mit dem Haman ſtoltzieren/ mit den Sodomitern Vnzucht treiben/ mit dem Reichen Mann ſchlemmen/ praſſen vnd Vnbarmhertzigkeit uͤben/ mit Pharaone tyranniſiren/ mit Herode morden/ mit Achan ſtehlen/ ja mit allen Gottloſen den Namen deß Allerhoͤchſten/ vnd die Wunden/ Marter vnd Sacramenta vnſers liebſten HErꝛn Jeſu Chri- ſti ſchaͤnden vnd laͤſteren/ dieſe alle/ ſie ſeynd Koͤnig oder Kaͤyſer/ Fuͤrſten oder Herꝛn/ Graffen oder Edeleuth/ Biſchoff oder Bader/ Koch oder Keller/ werden jhre Ehrentitul/ ſo ſie in der Welt gehabt haben/ alle ver- lieren/ vnd die ſchroͤckliche Stim deß gerechten Richters anhoͤren muͤſ- ſen: Gehet hin jhr Verfluchtẽ in das hoͤlliſche Fewr/ welches bereit iſt dem Teuffel vnd ſeinen Engeln/ wie er jhnen Matth. 25. Cap. troͤhet. Ach ſo werdet nun klug lieben Chriſten/ werdet klug ſag ich noch einmal/ bedencket das End/ ſo werdet jhr nicht ſuͤndigen.

Sigiſmun- dus Rex Craſtinus.Sigiſmundus 2. der Koͤnig in Polen ward Rex Craſtinus oder der morgende Koͤnig genennet/ weiln er alle ſeine Geſchefft protrahirt vnd vffzoge: Ach laſt ſolches von vnſerer Buß nit geſagt werdẽ? Es iſt groſ- ſe Gefahr darbey: Heut/ heut da jhr deß HErꝛen Stimme hoͤret/ da jhr Exempel vor Augen ſehet/ verſtopffet ewre Ohren nit/ die Axt iſt ſchon dem Baum an die Wurtzel geleget/ der Todt ſchlaͤgt vnd hacket jmmer- dar darein/ biß der Baum einmal gar fellet/ ſo viel Tag/ ja ſo viel Stũd von vnſern Leben dahin gehen/ ſo viel Streich vnd Schlaͤg geſchehen. Der Der letzte Streich dardurch der Baum gantz fellet/ iſt vns vnverborgen. Muſterte doch dort der Koͤnig Alexander ſeinen Sol-Alexander. daten mit hoͤchſten ſpott auß/ weiln er erſt die Wafen woͤlt ſcherpfen/ da er in die Schlacht ſolte gehen/ was wuͤrd Gott thun/ wann wir in der wichtigen Sachen/ daran vns nit Geld vnd Gut/ ſondern vnſerer See- len Seligkeit gelegen/ ſo nachlaͤſig ſeyn wollen/ vnd vns zu dem Todt nit bey zeit gefaſt machen/ ſeynd wir Alt/ koͤnnen wir nitlang mehr lebẽ/ wir ſehen dẽ Todt vnd das Grab taͤglich vor Augen/ ſeynd wir jung/ haben wir gleichfalß keinen Brieff darvor/ er ſtellet vnſern jungen Leben vff dem Fuß nach/ vnd ehe wir vns in der Welt recht vmb geſehen/ wuͤ- ſchet er hinder vns her/ vnd maͤhet vns wie Graß vff der Wieſen hin- weg? Summa: Selig iſt der alle Tag/ ſeliger/ der alle Stund/ am ſeligſten/ der alle Augenblick den Todt betrachtet.

ANlanget dieſen vnſern in GOtt verſtorbenen Mit Bruder/ HerꝛnPerſonalia. Michael Saubern/ iſt derſelbe von Ehrlich vñ Chriſtlichen El- tern geboren wordẽ. Wie dañ ſein Vatter Herꝛ Sebaſtian Sauber ein vornehmer Buͤrger/ vnd deß Raths zu Leutershauſen geweſen. Von ſolchem iſt er bald nach ſeiner Geburt durch die H. Tauff Chriſto einverleibt/ vnd in das Buch der Außerwoͤhlten gezeichnet worden.

Alß er etwas erwachſen/ hat er jhn mit fleiß zur GottesFurcht vnd den Schulen gehalten/ da er dann ſo weit kommen/ daß er nicht al- lein ſeine Lateiniſche Sprach wohl verſtanden: Sondern auch neben einer fertigen Handt ein gut Coucept machen koͤnnen.

Vnd damit er dermahl eins dem Vatterland vnd feinen Freun- den koͤnte mit Nutz bedienet ſeyn/ hat er ſolches ſein Talentum nicht ver- graben/ ſondern viel mehr in der Jugendt wol gebrauchen/ vnd durch das Exercitium vermehren wollen/ derowegen ſich naher Oettingen begeben/ allda er ſich in der Graͤfflichen Cantzeley vff die 5. Jahrlang vffgehalten/ vnd alſo erzeyget/ daß vermoͤg ſeines ehrlichen Abſchieds/ man mit jhm allerdings wol content geweſen.

Von dannen hat er vmb was mehrers zu erfahren/ Herꝛn Feld- Marſchalcks Excellent ſeine Dienſt præſentirt, vnnd in der Kriegs- Cantzeley ſich mit willigem Fleiß vnd gebuͤhrlicher Verſchwiegenheit alſo erzeygt/ daß jhre Excellent jhn gewißlich vngern verlohren/ vnnd da da es Gottes gnaͤdiger Will waͤre geweſen/ gern laͤnger bey ſich haͤtte loiden moͤgen.

Ob er zwar auch kein Engel geweſen/ ſondern ſeine menſchliche Gebrechen an ſich gehabt: daruͤber dann alle Heiligen zu klagen/ Pſ. 51. v. 7. Eph. 2. 3. Eſai. 59. 2. Iob. 14. v. 4. Rom. 3. v. 12. Jedoch hat er Gottes Wort geliebet/ gern gehoͤrt/ weder Fruͤh- oder AbendtGebet/ da es jhme Amptshalben moͤglich/ demſelbigẽ beyzuwohnen/ verſaͤmbt/ ſich vor euſerlichen Laſtern mit fleiß gehuͤtet/ vnnd ſeinen Chriſtlichen Glauben in den Wercken gegen maͤnniglich alſo erwieſen/ daß jeder- man jhn geliebet/ vnd bey der gantzen Hoffſtatt gewiß nicht einer zu fin- den/ der ob ſeinen vor menſchlichen Augen fruͤhzeitigen Abſterben nicht hertzlich bekuͤmmert waͤre.

Vor 10. Tagen hat jhn Gott mit einem hitzigen Fieber angegrif- fen/ welche Kranckheit er mit groſſer Gedult außgeſtanden/ auch/ da er geſehen/ daß (vngeacht es an guten Mitteln vnd fleiſſiger Warth bey Tag vnd Nacht nicht gemangelt) die Schwach- heit je mehr vnd mehr vberhand nehme/ ſeine Suͤnd erkennet/ gebeich- tet/ die troͤſtliche Abſolution vnnd das H. Abendmahl begehrt/ welches auch jhme von mir iſt mitgetheilet worden/ worauff er dann ſeine See- le dem Allerhoͤchſten befohlen: vnnd den 15. Maij vmb 1. Vhr Nach- mittag von ſeiner Qual erloͤſet/ vnd von dieſem betruͤbten Jammerthal ſelig abgeſchieden iſt.

Wer wol lebt kan nicht vbel ſterben/ wer an Chriſtum glaubt kan nicht verlohren werden. Wir bitten den Vatter aller Barmhertzigkeit/ er wolle alle die/ ſo vmb ſeinet willen trawrig/ durch ſeinen heiligen Geiſt troͤſten vnd alſo regieren/ daß wir gleichfals auch allhier ritterlich Kaͤmpffen/ Glauben vnd gut Gewiſſen behalten/ vnd dermaleins die Kron der Ehren darvon tragen: Das verleyhe vns die Hochgebenedeyete Dreyeinigkeit/ Gott Vatter/ Sohn/ vnd heiliger Geiſt/ vmb dero vnaußſprechlichen Guͤt vnd Genad willen/ Amen/ Amen/ Amen.

ENDE.